II Kronika 33 - Labrador Inuttitut Heritage Bible

Manassib, Amoniblo attanniotinikik.

¹ Manasse Jareᴋalaukpok 12 nik attanningorame attanniotilunelo Jarinik 55 ginik Jerusaleme.

² Pinniarporlo Nalekab idluigijanginik, innuᴋattigêksuit Nalekab pêjarlauktangita Israelib ᴋittorngangita sivurngane, makkojungnartulliningit malliklugit.

³ Poktojullo atâtame Hiskiab serᴋomilauktangit sattortautipait, Altareᴋartitsivorlo Baalemut, sannalunelo nappartunik Gudingoalingnik, tuksiarvigivaillo uvloriagasaksuit illunaita, kivgartorlaitalo.

⁴ Altariniglo sannavoktauk Nalekab iglungane, Nalekab oᴋautigilauktangane: Attera Jerusalemêtsainartuksauvok issoᴋangitomut.

⁵ Altareliorsavaillo ᴋillaub kattimgajungit sunatuinait, Nalekab iglungata innigingne avaluliorsimajungne tamangne.

⁶ Erninelo ikkomakorᴋovait Hinomib erningata naksangane, tingmitjello nipjarningit kamagivait, uvlullo annerivait, angakoktorlunelo, nallautainarluklarmelo, elisênarlunelo, pinniarporlo unnuktunik Nalekab idluigijanginik, ningaksarlugo.

⁷ Innungoallo, Gudingoallo sannajauᴋojane pitipaittauk Gudib iglunganut, Nalekab Davidemut erninganullo Salomomut oᴋautigijanganut: Iglomut tamattomunga, Jerusalemullo annerilauktamnut Israelib kinguvarênginit tamainit, attera pititsomavara soraijuitomik;

⁸ Israelitillo ittiggangit aularᴋojomairpakka nunamit, tunnilauktamnit atâtagilauktanginut, kamatsiartuinarpatta pinniarlutik perᴋojat tamaita, innatsillo, idluarijaunerillo, Mosesekut perᴋolauktakka tapᴋonunga, malliklugit.

⁹ Manassible Judakut Jerusalemiullo uivêrivait, sugaluluartomik pinniarᴋovlugit innuᴋattigêksoarnit Nalekab pêjarlauktanginit Israelib ᴋittorngangita sivorngane.

¹⁰ Nalekablo Manasse innuᴋotingillo oᴋarvigivait, kamalungilelle tamattominga.

¹¹ Tamanna pivlugo Nalekab tikkitauᴋovait Assiriamiut attanningata sorsuktuksangita angajoᴋânginut, tapᴋoa Manasse parngnanairsortautipât niksinut, ᴋellaksorlâllo ᴋellaumgujanut, tikkiutipâllo Babelemut.

¹² Kappianartomênamelo ᴋennuvok Nalekamut Gudiminut mannigotitilunelo Nalekab atâtagijame Gudingata sângane.

¹³ Tuksiarporlo ᴋennulunelo tapsomunga. Tagvalo ᴋennuninga tussarpa, uttertilâlo Jerusalemut, attanniovinganut. Tagva Manasse illitarksilerpok Nalegak Gudeôngmat.

¹⁴ Kingorngane Davidib iglugasaksoangita ᴋarmangit (avaluksoangit) ungardlerpât, sannavait ᴋângianit Gihonemit naksarmêtomit, ittervik upᴋoaᴋsoarmut mingeritjanik attelingnut tikkilugo, Ofeliblo avatâne, pôktosilaitalo, pittaᴋartitsivorlo angajoᴋaksoarnik sorsuktuksanut Judakut iglugasaksoangine sôngojune illunaine.

¹⁵ Pêjarpaillo Gudit tujormitjat, Gudingoallo Nalekab iglunganit, Altarillo illunaita sannalauktane Nalekab iglungata ᴋaᴋᴋangane Jerusaleme, egilaitalo iglugasaksuit sillatânut.

¹⁶ Sattortautipâlo Nalekab Altaringa, tunnijilunelo ᴋângane tunnergutinik nertordlerutiksanik, ᴋujalijutiksaniglo, perᴋovaillo Judakut Nalegak Israelib Gudinga kivgartoraksaringmatsuk.

¹⁷ Innugasaksuille tunnergutinik tunnijivut poktojune, Gudemut Nalekamingnuvalloak.

¹⁸ Unipkautsille assingit Manasse pivlugo, tuksiarninga Gudiminut, takkojullo Nalekab Israelib Gudingata attingane oᴋautjingita oᴋalâningit, ahâk, tamakkoa Israelib attanningita pijoᴋarningita akkornganêput.

¹⁹ Tuksiarningillo, ᴋannorlo tussartauninga, ajorningillo, idluitulliningillo, innillo sannavigilauktangit poktojunik, nappartuniglo Gudingoalingnik, Gudingoaniglo, manigotitiᴋârtinago, ahâk, tamakkoa aglaksimavut takkojut unipkausingine.

²⁰ Manasselo sinnisilerpok atâtagijaminut ailune, illijartorpâllo iglungane. Erningalo Amon attanningorpok innangêrdlugo.

²¹ Amon Jarekalaukpok 22 ginik attanningorame, attanniotilunelo Jarik magguk nâlugik Jerusaleme.

²² Pinniarporlo Nalekab idluigijanginik sorlo atâtanga Manasse pinniarlaungmat. Amonelo tunnergutinik tunijilaukpok Gudingoanut illunainut atâtame sannalauktanginut, kivgartorlaitalo.

²³ Manigotitilaungilarlo Nalekab sângane, Manassetut atâtangatut; tamna Amon idluitullingmat unnuktunik.

²⁴ Kivgangillo angerᴋattigêngneᴋartitsivut akkerartorlugo, toᴋᴋopâllo iglungane.

²⁵ Tagva innugasaksuit nuname ullimârpait illunaita angerᴋattigêngneᴋartitsilauktut, attannek Amon akkerartorlugo. Nunablo innugasaksoangita Josia erninga attanningortipât innangêrdlugo.