II Kronika 32 - Labrador Inuttitut Heritage Bible

Hiskiab piulijauninga tattamnadlartok Sanherib agganginit, ᴋannimasernermillo.

¹ Pijoᴋartullo tamakkoa, nertornarnerublo kingorngane, ᴋaivok Sanheribe Assiriamiut attanningat, tikkilunelo Judamut, tangmarlunelo iglugasaksuit sôngojut sivurânut, aksarnigarijomanasugivaillo nangmineliutilugit.

² Hiskialo takkogame Sanheribe tikkilermat, kênangalo torarmat Jerusaleme sorsugvigijomavlugit;

³ Angajoᴋâᴋotine, sôngojoᴋotinelo kachimioᴋattigivait, immektârvit iglugasaksuit sillatânêtut mattujomavlugit; ikajorpâllo.

⁴ Innugasaksuillo kattimalerput, mattuvaillo puailavît illunaita, kôllo nunakut kôktut, oᴋarpullo: Assiriamiut attanningit, tikkilutik immiksarsijuksauᴋonagit unnuktunik.

⁵ Maksoalaukporlo, ᴋarmaillo avaluksuit sujuksimaningit âᴋiksorpait, ᴋallerêktipaillo nuvugutsit tikkilugit, sillatânelo ᴋarmaliorivok sulle assianik, Millolo Davidib iglugasaksoangine sôngotipa, sakkoliorsavorlo, sappulutaliorsalunelo unnuktunik.

⁶ Angajoᴋâᴋartitsivorlo innugasaksoarnik, kattitilugillo ingminut iglugasaksuit apᴋosiningane silliktome, upᴋoaᴋsub ᴋannitangane, oᴋauseᴋarlunelo tapᴋonunga illanârnartunik, oᴋarlunelo:

⁷ Maksoaleritse pitsartuluselo, Assiriamiullo attanningat, unnuktoksuillo illagijangit sivuraginiarassigik, maksujarutiginassigiglo; illagijavut unnurnersaungmatta illagijanginit.

⁸ Talliub uviniôjub tamna aipariva, uvagulle Nalekab Gudipta illagivâtigut, ikajorluta, aulalugolo sorsungnivut. Innugasaksuillo Hiskiab Judakut attanningata oᴋausingit tattigivait.

⁹ Tamakkoa kingorngane Sanherib Assiriamiut attanningata kivgane tillivait Jerusalemut (tamna Lachisib sivurâne tangmarsimangmat, nalaktine illunaita illagellugit) Hiskiamut Judakut attanninganut, Judakunullo illunainut Jerusaleme najutijunut, oᴋautsauᴋovâlo:

¹⁰ Imâk Sanheribe Assiriamiut attanningat oᴋarpok: Suna sungertutigivissiuk, Jerusaleme illumatjaumajomêtuarapse?

¹¹ Hiskiab tilliorlungipasse tunniluse toᴋᴋomut, ᴋângmullo ᴋêlernermullo, oᴋarlune: Nalekab Gudipta piuliniarpâtigut Assiriamiut attanningata agganginit?

¹² Hiskiaôlungilâk, poktojoᴋotinginik, Altareᴋotinginiglo pêjailauktok, oᴋarlauktorlo Judakunut Jerusalemiunullo: Altaretojub sângane tuksiartuksauvose, ᴋânganelo isserluanititsijuksauvose?

¹³ ᴋaujimangilase, sunamik uvanga atâtagijamalo nunat illunatik innugasaksoangit pinniarvigilauraptigit? Nunat innugasaksoangita Gudingita nunaᴋotitik piulijungnalaurivattigik aggamnit?

¹⁴ Kia innuᴋattigêksuit taipkoa atâtagijama pêjarlauktangita Gudinginit tamainit innuᴋotine piulijungnarlaukpagit aggamnit, Gudipse illipse piulijaksarinajarmasse aggamnit?

¹⁵ Taimak mana uivêrijautailititse, tilliortautailitiluselo, okperiniarasiuglo. Innugasaksuille attanniôvillo Gudingita nalliata innuᴋotine piulijungnarlaungimagit aggamnit, atâtagijamalo agganginit, tagva Gudigijapse piulinianginivâse aggamnit.

¹⁶ Kivgangillo sulle unnurnersanik oᴋauseᴋarput Nalegak Gude akkerartorlugo, kivgangalo Hiskia akkerartorlugo.

¹⁷ Aglangniktauk aglakpok Nalegak Israelib Gudinga mittautigivlugo, oᴋautigivâlo oᴋarlunelo: Sorlo innugasaksuit nunane Gudingita innuᴋotitik piulilaungimattigik aggamnit, taimak Hiskiab Gudingata innuᴋotine piulinianginivait aggamnit.

¹⁸ Nippeᴋortôvlutiglo Judit oᴋausingit attorlugit innugasaksuit Jerusalemiut ᴋarmaksuit (avaluksuit) ᴋânganêlauktut nipliarvigivait sivurasaromavlugit ᴋoaᴋsartitsomavlugillo, iglugasaksuit salagilugit piᴋovlugit;

¹⁹ Jerusalemiullo Gudingat oᴋautigivat, innugasaksuit nuname Gudingoangititut, innuit aggangita sannajangititut.

²⁰ Attanerlo Hiskia nallautaijorlo Jesaiase tuksiarpuk tamanna pivlugo, nipliadlarlutiglo ᴋillangmut.

²¹ Tagva Nalekab Engelit illangat tilliva, tapsoma sorsuktuksat sôngojungit illunaita, attannillo angajoᴋaunerôjullo illunaita Assiriamiut attanningata tangmarviane nungupait, kangusuklunelo utterpok nunaminut. Gudigijamelo iglunganut ittermat, ochotipâk tagvane saviksoarmut, timinganit nangminerijanganit pilauktuk.

²² Taimak Nalekab Hiskia Jerusalemiullo ikajorpait Sanherib Assiriamiut attanningata agganginit, assingitalo illunatik agganginit, serngnigivaillo avatingine illunâne.

²³ Unnuktullo Nalegak pilliutinik âtsivigivât Jerusalemut, Hiskialo Judakut attanningat pivianartunik. Kingornganelo angijolaukpok innuᴋattigêksuit illunatik ijingita sângine.

²⁴ Nalliutome taipsomane Hiskia ᴋannimalaukpok toᴋᴋoajarlune, tuksiarporlo Nalekamut, tapsomalo oᴋarvigiva tunnitsivigilugolo nallonaikutamik tattamnadlartomik.

²⁵ Hiskiable ajungitullivionine akkiniarutigilaungila, omattingale ᴋagverpok, tamanna pivlugo ningautsib tamna, Judamiullo, Jecccrusalemiullo tikkipait.

²⁶ Tagva Hiskia mannigotitipok omattime ᴋagverninga pivlugo; tamna, Jerusalemiullo tamanna pivlugo Nalekab ningausingata tikkilaungilait Hiskia innôtillugo.

²⁷ Hiskialo akluineᴋadlalaukpok, nertortauneᴋadlalunelo, perᴋutetalititsilunelo ingminut, Silbereôjunik Goldeojuniglo, ujarᴋaniglo pivianartunik mingoarutiksaniglo tippitsiariktunik, sappulutaksaniglo illulerᴋutiniglo pivianartunik sunatuinarnik.

²⁸ Kematulliviᴋartitsivorlo perortunut ᴋaitaujunut ᴋaᴋᴋojaksanut, Weinemullo, orksumullo; igloliorsalunelo nergjutit sunatuinait igluksanginik, avaluliorsalunelo saukanut.

²⁹ Iglugasaliorlunelo ingminut, nergjuteᴋalaukporlo saukanik, tuktuvângniglo unnuktovaksoarnik, Gudib tunnitsivigingmago perᴋutevaksoarnik.

³⁰ Hiskiablo oma puailaviub Gihonemik attiggub pânga kogvasiktok simmikpa kôktilugolo unnunga Davidib iglugasaksoangita ᴋangianut. Hiskialo pilloridlalaukpok pinniarnermine tamaine.

³¹ Babelemiulle attanningita tillijangit tikkinamik tattamnartok pilauktok nuname apperᴋutigilugo, Gudib taimak ᴋemakpâ ôktoramiuk, illitarileromavlugit tamaita omattingata illumigijangit.

³² Pijoᴋalauktulle assingit Hiskia pivlugo, pinniarningillo idluartut, ahâk tamanna aglaksimavok Jesaiasib Amozib erningata nallautaijub takkotitauningine, Judakullo Israelitillo attanningita aglangine.

³³ Hiskialo sinnisilerpok atâtagijaminut ailune, illijartorpâllo Davidib erningita illuvingita poktojungane. Judakullo illuêngarlutik Jerusalemiullo opigivât toᴋᴋungane. Erningalo Manasse attanningorpok innangêrdlugo.