II Kronika 31 - Labrador Inuttitut Heritage Bible

Hiskiab asseroininga kivgartornermik Gudingoanik; pattangaititsiningalo ajochertuijunik.

¹ Tamakkoa tamaita pijarêrlaungmatta Israelitit illunamasiatik, najutigut tagvane, aularput Judakut iglugasaksoanginut, serᴋomipaillo nappajoksuit, nakᴋarlugillo nappartut Gudingoaggit, poktojullo, Altarillo serᴋomipait, Judakunêtut, Benjaminekunêtullo, Efraimekunelo, Manassekunelo, nungutaumariᴋârtinagit; tagva Israelib ᴋittorngangit illunatik utterput attunît perᴋutigijamingnut, iglugasaksoaᴋotimingnullo.

² Hiskiablo ajochertuijut Levitillo ingmigolinganingit pitipait, attunît ingmigolinganingit malliklugit, ajochertuijut Levitillo, tunnijinermut tunnergutiksanik ôtaksanik, tunnergutiksaniglo ᴋujalijutiksanik, imgernermullo nertordlerutiksanik, nertordlernermullo Nalekab tangmarviata upᴋoaᴋsoangine.

³ Attanniublo perᴋutime illangit tunniᴋattarpait tunnergutiksanut ôtaksanut uvlaksiutinut, unnuksiutinullo, tunnergutiksanullo ôtaksanut, Sabbatesiutinut, taᴋᴋêlasiutinullo, uvloksiorviksiutinullo; sorlo Nalekab perᴋojangine aglaksimangmat.

⁴ Innugasaksuillo Jerusalemiut perᴋovait, ajochertuijut Levitillo pijaksangit tunnilugit piᴋovlugit, tapᴋoa katsungainersaujungnarᴋovlugit perᴋojanut.

⁵ Perᴋojarlo tamna tunnijaujarêrmat Israelib ᴋittorngangit âtsivut innerᴋârtunik ᴋaᴋᴋojaksanik, Weiniblo paungangita iptinginik, orksumiglo, igupsaujartullo orksunginik, perorsêviublo perortunginik sunatuinarnik; tamaitalo tallimaujortungit âpait unnuktut.

⁶ Israeliblo Judablo ᴋittorngangit, Judakut iglugasaksoangine nunnaᴋartut, âtsivuttauk tuktuvait saukallo tallimaujunginik, ivsornaititaumajullo, ivsornaitilauktamik (tunnilauktamik) Nalekamut tallimaujunginik, kattititaᴋartitsivullo mânelo ikkanelo.

⁷ Taᴋᴋit pingajuane pigiarput, kattititat kattitilerlugit, taᴋᴋillo 7 ingane namaksilerpait.

⁸ Hiskialo angajoᴋaunerôjut illagilugit ittermat kattititaumajullo takkogamigit, tagva Nalegak innuᴋotingillo Israelitit nertorpait.

⁹ Hiskiablo ajochertuijut Levitillo apperivait kattititaumajut pitjutigellugit.

¹⁰ Asarjablo ajochertuijub, angajoᴋaunerôjub Zadokekunit, oᴋautiva: Taimangamit pigiarlaungmatta tunnergutit âlugit Nalekab iglunganut nerrilaukpogut aᴋᴋeartorlutalo, amiakoᴋartitsivogullo sulle unnuktunik; Nalekab innuᴋotine pitsartutilaungmagit, tamanna pivlugo kattititaumajut ukkoa amiakovut.

¹¹ Tagva attannek perᴋojivok inniorᴋovlugit Nalekab iglungane. Sannajauvullo;

¹² Ittertipaillo illuanut nertornarlutik, tunnergutit perᴋutit tallimaujungit, ivsornaititaumajullo. Kananjalo Levitiôjok angajoᴋaulaukpok tapᴋonunga, Simeilo ᴋattangutine ikajortigiva.

¹³ Jehiello, Asasjalo, Nagatelo, Asahello, Jerimotelo, Eliello, Jesmachjalo, Mahatelo, Benajalo aulatsijôlaukput, Kananja ᴋattangutalo Simei ikajorlugik, attanniub Hiskiab perᴋojanga malliklugo. Asarjale attanniolaukpok Gudib iglungane.

¹⁴ Korelo Jemnab erninga Leviteôjok, udsertorte upkoamik kittanêtomik angajoᴋaulaukpok Gudib tunnergusianginut, pijarellune tunnijaulauktunut, aulailugit tunnergutit Nalekamut, ivsornainerpângôjunullo.

¹⁵ Aulatsijoninganêlaukpullo: Edene, Minjaminelo, Jesualo, Semjalo, Amarjalo, Sachanjalo, ajochertuijut iglugasaksoangine, tunnijiᴋovlugit ᴋattangutimingnut nertornarlutik, attunît illinganingit malliklugit, mingnerpâk anginerpâktut;

¹⁶ Angutit kittitaumajut Jarelingnit pingasunik, unnurnersaniglo, sanniane, illunainut Nalekab iglunganut tikkitunut uvlut tamaita kivgartornermingnut sullijaksamingne, ingmigolinganingit malliklugit.

¹⁷ Ajochertuijunullo kittitaumajunut atâtagijangita iglungit (kinguvângit) malliklugit, Levitinullo Jarelingnit 20 ginik unnurnersaniglo, sullijaksangine, ingmigolinganinginelo;

¹⁸ Kittitaumajullo ᴋittornganginut, nullianginut, erninginut, panninginullo illunamasianginut; nertornarlutik ingminik ivsornaitingmatta kivgartornermut.

¹⁹ Aronib erningit, ajochertuijut pivlugittauk iglugasaksuit illunatik aiparusingita perorsêvingine anguteᴋarᴋojauvok attermikut taijaumajunik, tunnijiᴋovlugit angutinut ajochertuijojunut, Levitinullo aglaksimajunut illunainut, pijaksanginik.

²⁰ Taimailiorlaukporlo Hiskia Judame illunane, pinniarporlo Nalekab Gudime namagijanginik, idluarijanginiglo, nallagôrtorijanginiglo,

²¹ Pinniarnermine tamaine, pinniarnerijamine Gudib iglungane, innatsinelo, perᴋojanelo Gudine ᴋennerlugo; omamut tamânut pinniarpait, sullidlarlunelo.