II Kronika 30 - Labrador Inuttitut Heritage Bible

Hiskia Passamik uvloksiorᴋojivok innugasaksuit ᴋuviasutiksanginut.

¹ Hiskialo tilliklerpok Israelitinut illunainut, Judamiunullo, aglangniglo aglakpok Efraimekunut Manassekunullo, ᴋaiᴋovlugit Nalekab iglunganut Jerusalemut, Passamik uvlosiorlutik Nalekamut Israelib Gudinganut.

² Attanniublo angajoᴋâᴋotine illagêllo illunaita kachimiolerᴋattigivait Passa attoromavlugo taᴋᴋib aipangane,

³ Attorungnarlaungimatsuk nalliutome taipsomane, ajochertuijut ivsornaitisimajut ikkitoluarlaungmatta, innugasaksuillo tikkilungimatta Jerusalemut.

⁴ Attanniublo illingatitaunek tamanna idluariva, illagêllo illunamasiatik,

⁵ Perᴋojivullo tamanna akpautigijauᴋovlugo Israelitine illunaine Bersebamit Dane tikkidlugo, ᴋaiᴋovlugit Passamik uvloksiorlutik Nalekamut Israelib Gudinganut Jerusaleme; akkunît attorlaungimatsuk sorlo aglaksimangmat.

⁶ Tagva akpangertut aivut, aglait attanniub angajoᴋaᴋotingitalo agganginit pijut, naksarlugit, Israelitit, Judakullo illunatik akkorngattigut, attanniublo perᴋojanga malliklugo oᴋarput: ᴋittorngaujose Israelemut, sâleritse Nalekamut, Abrahab, Isaakiblo Israeliblo Gudinganut; tagva tamna sâlerniarivok amiakojunut illipsingnit, ᴋemâlauktunut Assiriamiut attanningata agganginit;

⁷ Atâtagijapsetullo ᴋattangutigijapsetullo idluitullilauktutitut Nalekamut atâtagijamik Gudinganut, tunnilauktangititullo tamanna pivlugo asserornartomut, sorlo nangminek takkogapse, îniarase.

⁸ Tagva tappatôniarase manna atâtagijapsetut, aggassele tunnissigik Nalekamut, ᴋaititselo ivsornaitoviᴋotinganut ivsornaitilauktanganut issoᴋangitomut, Nalegarlo Gudise kivgartorsiuk, ningarninga illungertortok sangulerᴋovlugo illipsingnit.

⁹ Illipsele sâlerniarupse Nalekamut, tagva ᴋattangutise ᴋittorngaselo napkigijauneᴋarniarput parnanairsortimingne, nunamut tamattomunga utterᴋovlugit, Nalegak Gudise saimarsaigosungmat, napkigosuklunelo, kênanelo sânguniangilâ illipsingnit, illipse sâvigigupsiuk.

¹⁰ Akpangertullo aivut iglugasaksoarnit iglugasaksoarnut Efraimekut, Manassekullo nunangane, Sebulonekullo tikkidlugit, ijorutigivaille mittautigilaitalo.

¹¹ Illangille Asserekunit, Manassekunillo, Sebulonekunillo manigotitiput ingminik tikkigalloarlutiglo Jerusalemut.

¹² Nalekab aggangita Judakuttauk tikkipait adsigêktunik issumaᴋartimagit, pinniarᴋovlugit attanniub angajoᴋaunerôjullo perᴋojangat, Gudib oᴋausinginit pijok, malliklugo.

¹³ Innugasaksuillo unnuktut kattimalerput Jerusaleme uvloksiorvik ᴋaᴋᴋojanik sêrnaᴋangitunik uvloksioromavlugo, taᴋᴋib aipangane, illagêt unnuktovaksuit.

¹⁴ Parngnailerpullo Altarillo Jerusalemelauktut pêjarpait, Altarillo isserluanititsivit illunaita pêjarpait, êgilugillo kôngmut Kidronemut;

¹⁵ Toᴋᴋotsivullo Passasiorutiksamik taᴋᴋib aipangata uvlungita 14 ingane. Ajochertuijullo Levitillo kangusulaukput ivsornaitilutiglo, atsilutiglo tunnergutiksanik ôtaksanik Nalekab iglunganut;

¹⁶ Nangerpullo innimingne, sorlo illusiolaungmat Mosesib Gudib anguteᴋotingata perᴋojangit malliklugit. Ajochertuijullo auk serᴋerartipât Levitit agganginit.

¹⁷ Unnuktolaungmatta illagêktune ivsornaitilaungitut ingminik, tamanna pivlugo Levitit saugarsuit passasiorutiksat toᴋᴋopait, illunaita sujungaitilungitut akkisartorlugit, ivsornaitilaitalo Nalekamut.

¹⁸ Innugasaksoarnillo unnuktut, Efraimekunillo unnuktut, Manassekunillo, Isascharekunillo, Sebulonekunillo sujungaitilaungitut ingminik, nerrilutiglo Passamik aglait malliklugiungitok. Hiskiable tuksiupait oᴋarlunelo: Nalekab ajungitub illunaita issumagijungnaivigiligit,

¹⁹ Omattimingnik torartitsilauktut Gude Nalegak, atâtagijamik Gudingat ᴋennerlugo, unêt ivsornaimarilungigalloarlutik.

²⁰ Nalekablo Hiskia tussarpa nakkoksitilaitalo innugasaksuit.

²¹ Taimak Israelib ᴋittorngangita Jerusaleme najutijut uvloksiorvik ᴋaᴋᴋojanik sêrnaᴋangitunik uvloksiorpat uvlut 7 it nalugit ᴋuviasuvaksoadlarlutik. Levitillo ajochertuijullo Nalegak uvlut tamaita nertorpât Nalekab noakseraliᴋotingit nipliadlartut attorlugit.

²² Hiskiablo Levitit illunaita sungiusimajut kivgartornermik ânanâmik Nalekamik, pitsiarlune oᴋarᴋattigivait. Nerrivaillo uvloksiorviub tunnergutingit uvlut 7 it nâlugit, tunnijilutik tunnergutinik ᴋujalijutiksanik, imgerlutiglo nertordlerutiksanik Nalekamut atâtagijamik Gudinganut.

²³ Kattimajullo illunatik kajusimavut, ama uvlut 7 it uvloksioromavlugit; tapᴋoalo uvlut 7 it uvloksiorpaittauk ᴋuviasuklutik.

²⁴ Hiskiab Judakut attanningata kattimajut tunnitsivigingmagit tuktuvângnik angusallungnik 1,000 dinik, saukaniglo 7,000 dinik. Angajoᴋajallo illagat tunnitsivigivait tuktuvangnik 1,000 dinik, saukaniglo 12,000 dinik. Taimak ajochertuijut unnuktut ivsornaitiput ingminik.

²⁵ Kattimajullo Judakut, illunamasiatik ᴋuviasudlalaukput, ajochertuijut Levitillo, kattimajullo Israelitinit tikkimalauktut, tujormitjello Israelitit nunanganit tikkimalauktut Judamelo nunaᴋartut.

²⁶ ᴋuviasuvaksoadlarneᴋarporlo Jerusaleme. Salomonib Davidib erningata, Israelitit attanningata nalliuninganit taimaitoᴋalaungilak Jerusaleme.

²⁷ Ajochertuijullo Levitillo nikkovilerput saimartilaitalo innugasaksuit, nippingallo tussartaulaukpok, tuksiarningallo tikkilerpok takpaunga innigijanganut ivsornaitomut ᴋillangmut.