II Kronika 3 - Labrador Inuttitut Heritage Bible

Tempelib igloliortauninga.

¹ Salomolo pigiarpok Nalekab iglunga igloliorlugo Jerusaleme, ᴋaᴋᴋame Morijamik attelingme, atâtaminut Davidemut unertutigijaulauktome, inneme Davidib âᴋiksorlauktangane, Arnanib Jebusitereôjub ᴋaᴋᴋojaksaliorvingane.

² Pigiarporlo igloliorlune attanniotime Jaringita sittamangata takkingita aipangata uvlungita aipangane.

³ Tungaviglo Salomob illilauktanga Nalekab iglungata igloliortauninganut imailaukpok: tukkimutoninga tallitut 60 gitut, sannimutoninga tallitut 20 gitut.

⁴ Torksuksoarlo iglub sannimutoningata sânganêlauktok, tallitut 20 gitut takkitigijolaukpok, poktoningale tallitut 120 gitut îlaukpok; illuanelo illupiarutserpa Goldemik illaᴋangitomik.

⁵ Iglolo angijok illupiarutserpa sâtujanik Cipressiojunik, peᴋartipâlo Palmingoanik, ᴋellaumgujangoaniglo.

⁶ Iglolo sillapârpa ujarᴋanik pivianartunik ânanausijutiksanganut; Goldele attortaujok Parwaimemit pilaukpok.

⁷ Iglolo, ikᴋaitjallo, ᴋattallo, iglublo sannerangit, upkoallo illupiarutserpait Goldemik, ittersalliorᴋojilunelo sannerᴋane Kerubingoanik.

⁸ Iglolo ivsornainerpângojok sannagiva, tapsoma tukkimutoninga, iglub sannimutoninga malliklugo tallitut 20 gitut îlaukpok, sannimutoningalo tallitut 20 gitut îlaurivok; illupiarutserpâlo Goldemik pivianarnerpangôjomik Talentinik 600 dinik.

⁹ Kikkitsello oᴋumainingit, Seᴋᴋelititut Goldeojutitut 50 gitut îlaukput. Innillo ᴋollanêtut illupiarutserlaurivaittauk Goldemik.

¹⁰ Iglomelo ivsornainerpangôjome pittaᴋârtitsivok Kerubingoangnik, sannangoarnik ᴋepperuktut illusingit malliklugit sannajaumajungnik, sillapârpâglo Goldemik.

¹¹ Kerubingoaglo esarungita takkingat tallitut 20 gitut îlaukpok, taimak esarok attausek tallitut tallimatut takkitigijolaungmat, aktoalune iglub sanneranganut; esarkublo igloa tallitut tallimatut îlaurivok, aktoalunelo Kerubingoab aipata esarunganut.

¹² Taimak Kerubingoab aipata esarukita aipa tallitut tallimatut takkitigijolaurivok, aktoalunelo iglub sanneranganut, esarkublo iglua tallitut tallimatut îlaurivok, aktoalunelo Kerubingoab aipata esarunganut;

¹³ Kerubingoak esarungit issangatillugit tallitut 20 gitut takkitigijolaukput; nangerpuglo ittikamingne, kênatiglo sângavuk iglomut.

¹⁴ Upkomiglo sannagivok Purpuremit aupaluktomit, tungojoktamillo, ᴋarmesinemillo, Bissusemillo, Kerubingoaᴋartipâlo.

¹⁵ Iglublo sângane nappajoᴋartitsivok maggungnik, tallitut 35 gitut poktutigijungnik, niaᴋojartomiglo ᴋanganut nuvuanut, tallitut tallimatut poktotigijomik.

¹⁶ ᴋellaumgujaniglo sannavok, taipkotitunak inneme kinguanetomêtutitut, illijilunelo tapᴋoninga nappajuk ᴋângangnut. Paungâlungoaniglo Granatinik attelingnik 100 dinik sannavok, nivingatipaillo ᴋellaumgujangoanut.

¹⁷ Nappajuglo nappartipâk Tempelib sângane, aipa tallerpingmut, aipalo saumingmut; tallerpingmetorlo Jachinemik atserarpa, saumingmêtorlo Boasemik.