II Kronika 29 - Labrador Inuttitut Heritage Bible

Hiskiab kivgartornek Gudemik sattortautipa.

¹ Hiskia Jareᴋalaukpok 25 ginik attanningorame, attanniotilunelo Jarit 29 it nâlugit Jerusaleme. Anânanga atteᴋalaukpok Abjamik Sacharjab pannia.

² Pinniarporlo Nalekab namagijanganik atâtamitut Davidetut.

³ Attannionimelo Jaringita sivurlerpângata taᴋᴋingita sivurlerpângane Nalekab iglungata upkoangit pallangairudjarpait, âᴋilaitalo;

⁴ Ittertipaillo ajochertuijut Levitillo, kattiᴋolugillo apᴋosinerme nerrotôjome kittanêtome,

⁵ Oᴋautivaillo: Nalaksinga Leviteôjose: Manna ivsornaitileritse, Nalekablo atâtagijapse Gudingata iglunga ivsornaitilugo pititse, ivsornartut annitisigik ivsornaitovingmit.

⁶ Atâtagijavut tammarlaungmatta, pinniarlaukpullo Nalekab Gudipta idluigijanginik, ᴋemmalaukpâllo. Kênatik sangulaungmagit Nalekab iglunganit, tunnulaukpâllo;

⁷ Upkoarlo torksungme pallangairlaukpât, ᴋollillo ᴋammilaukpait, isserluanijutiksaniglo isserluanititsilaungilat, tunnijilaungilallo tunnergutinik ôtaksanik ivsornaitovingme Israelib Gudinganut.

⁸ Tamanna pivlugo Gudib ningausingata Judakut Jerusalemiullo tikkipait, tunnilaukpaillo siorniornartunut kakkilarnartunullo, mittautigijaunermullo, sorlo ijipsingnut takkogapse.

⁹ Ahâgle, tamanna pivlugo atâtagijavut ochosimavut saviksoarmut, ernivullo pannivullo nulliavullo aulartitaumavut.

¹⁰ Manna kajusimavunga Nalegak Israelib Gudinga angerᴋattigijomavlugo ningarninga, ᴋaningaumajarningalo allaiᴋovlugik uvaptingnik.

¹¹ Manna ernikka katsunganiarasse; Nalekab illipse annerilaungmasse nangertuksaugapse sângane, kivgaujuksauluselo isserluanititsijôjuksaugapse tapsomunga.

¹² Tagva parngnailerput Levitit tapᴋoa: Mahat, Amasaib erninga, Joello, Asarjab erninga, Kahatib erninginit; Merariblo erninginit: Kis, Abdib erninga, Asarjalo, Jehaleelib erninga; Gersoniblo erninginit: Joabe, Simmab erninga, Edenelo, Joab erninga;

¹³ Elizafaniblo erninginit: Simri, Jejelelo; Assafiblo erninginit: Sacharja, Matanjalo.

¹⁴ Hemaniblo erninginit: Jehiel, Simeilo; Jedutuniblo erninginit: Semaja, Usielelo.

¹⁵ Tapᴋoalo ᴋattangutitik kattitipait, ivsornaitilutiglo, tikkilerpullo attanniub perᴋojanga, Nalekab oᴋausinginit pijok malliklugo, Nalekab iglunga sujungaitilugo.

¹⁶ Ajochertuijullo itterput Nalekab iglunganut sujungaititsomavlugo, ivsornartullo tamaita, nachvartaujut Nalekab iglungane, annipait innemut avaluliorsimajomut Nalekab iglunganêtomut; Levitillo tiguvait akjartorlaitalo kôngmut Kidronemut.

¹⁷ Pigiarpullo ivsornaitilutik taᴋᴋit sivurlerpângata uvlungita sivurlerpângane; taᴋᴋiblo tapsoma uvlungita 8 ingane itterput Nalekab torksuᴋotinganut, ivsornaitipâllo Nalekab iglunga uvlut 8 it nâlugit; takkiblo sivurlerpângata uvlungita 16 ingane innersimavât.

¹⁸ Tagva itterput attannermut Hiskiamut oᴋarlutiglo: Nalekab iglunga illunât sujungaitimavavut, tunnergutiksat ôtaksat Altaringat, illulerᴋutingillo tamaita, ᴋaᴋᴋojallo takkojaksat sângat, illulerᴋutingillo tamaita.

¹⁹ Illulerᴋutillo illunaita, attanniub Ahasib attanniôvlune egilauktangit idluitullilune, tapᴋoa sattortautimavavut ivsornaitilugillo; ahâglo Nalekab Altaringata sânganêput.

²⁰ Tagva attannek Hiskia uvlârorpok, iglugasaksuillo angajoᴋaunerôjungit kattitipait, takpaungarlunelo Nalekab iglunganut.

²¹ Atsivullo tagvunga tuktuvângnik angusallungnik 7 nik, saukaniglo angusallungnik 7 nik, saugârsungniglo 7 nik, tuktungajuniglo angusallungnik 7 nik, tunnergutiksamut ajortoêrutiksamut illingajuksanik, attanniôvik pivlugo, ivsornaitovik pivlugo, Judakullo pivlugit. Tapsomalo ajochertuijut, Aronib erningit perᴋovait tunnijiᴋovlugit tunnergutiksanik Nalekab Altaringata ᴋângane.

²² Tagva tuktuvait toᴋᴋopait, ajochertuijullo auk tiguvât serᴋerartipâllo Altarib ᴋânganut;

²³ Apaillo tuktungajut angusalluit tunnergutiksamut ajortoêrutiksamut illingajut attanniub illagêllo sânginut, pattikpaillo.

²⁴ Ajochertuijullo toᴋᴋopait, aungillo ajortoêrutiksauvlune serᴋerartipât Altarib ᴋânganut, Israelitit illuêngarlutik ullapᴋoserlugit. Attannek perᴋojilaungmat tunnergutit ôtaksat, ajortoêrutiksallo tunnilugit, Israelitit illunamasiangit pivlugit.

²⁵ Pitipaillo Levitit Nalekab iglungane, Cimbelijarlutik, Psalterijarlutiglo, Harfesijarlutiglo, sorlo Davide, Gadelo attanniub takkojoᴋotinga, Nathanelo nallautaijok perᴋojilaungmatta, Nalekamille perᴋojak tamna pivok, nallaitaijoᴋotingittigut.

²⁶ Levitillo nangerput, Davidib noakseraliᴋotinginik najorteᴋarlutik, ajochertuijullo Trompetinik.

²⁷ Hiskialo perᴋojivok tunnergutit ôtaksat tunnilugit Altareme. Pigiarmattalo tunnergutiksak ôtaksak tunnilugo, tagva imgernek Nalekamut, trompetesijarnerlo, attornerlo Davidib Israelib attanningata noakseraliᴋotinginik sunatuinarnik pigiarivut.

²⁸ Illagêllo illunatik pamakterput; imgernerlo tussaksaulaukpok, Trompetillo nipliadlarput tunnergut ôtaksak tunnijaujarêrᴋârtinnago.

²⁹ Tunnergullo ôtaksak tunnijaujarêrmat, attannek okkovok, illunatiglo najuganêlauktut, opigosulutiglo.

³⁰ Attanniublo Hiskiab angajoᴋaunerôjullo, Levitit perᴋovait Nalegak nertorlugo Davidib Assafiblo takkojub imgerutingit attorlugit piᴋovlugit. ᴋuviasuklutiglo nertordlerput okkolutiglo, opigosularmiglo.

³¹ Hiskialo kiovlune oᴋarpok: Manna tigumiaralijarluse ikkipose Nalekamut, tamaungariartoritse, ᴋaitsiluselo tamaunga tunnergutiksanik, tunnergutiksaniglo nertordlerutiksanik Nalekab iglunganut. Illagêllo âtsivut tunnergutinik, tunnergutiniglo nertordlerutinik, illunatiglo ᴋunnutuitut tunnergutinik ôtaksanik.

³² Tunnergutillo ôtaksat illagêt ᴋaitangita unnurningit tuktuvangôlaukput 70 git, saukat angusalluit 100 dit, saugârsuillo 200 dit, tapᴋoa illunatik tunnergutiksaulaukput ôtaksat Nalekamut.

³³ Ivsornaitipaillo tuktuvait 600 dit, saukallo 3,000 dit.

³⁴ Ajochertuijulle ikkitoluarlaukput tunnergutiksat ôtaksat illunaita aktorungnarlaungilait tamanna pivlugo ᴋattangutinginut Levitinut ikajortaulaukput pinniarnek tamanna pijarêrᴋârtinago, ajochertuijullo ivsornaitiᴋârtinagit. Levitit illungertornersaulaungmatta ivsornaitilutik ingminik ajochertuijunit.

³⁵ Tunnergutille ôtaksat, tunnergutit ᴋujalijutiksat orksungit illaliudlugit, tunnergutiksallo immiksat tunnergutinut ôtaksanut illingajut unnuktolaukputtauk. Taimaglo kivgartornek Nalekab iglungane âᴋiktaumalaukpok.

³⁶ Hiskialo ᴋuviasulaukpok innugasaksuit illunatik illagilugit, Gudib innugasaksuit oppalungaijarlaungmagit, tagvainak pinniartaulaungmat.