II Kronika 28 - Labrador Inuttitut Heritage Bible

Ahasib attanniotininga pinniarningillo.

¹ Ahas Jareᴋalaukpok 20 ginik attanningorame, attanniotilunelo Jarit 16 it nâlugit Jerusaleme, pinniarlungilarlo Nalekab namagijanganik atâtagijamitut Davidetut.

² Agvertarporle Israelitit attanningita apᴋosiningine, Gudingoaniglo kovimajunik sannavoktauk Baalemut;

³ Isserluanititsivorlo Hinomib erningita naksangane, erninelo otautipait nallojut Nalekab Israelib ᴋittorngangita sivurngane pêjarlauktangita makkojungnartulliningit malliklugit;

⁴ Tunnergutiniglo tunnijilaukpok isserluanititsilunelo poktojune, ᴋaᴋᴋarulângnelo, nappartullo tungojortut illunatik attâne.

⁵ Tagva Nalekab Gudingata tunniva Siriamut attanningata agganginut; tapᴋoalo ullimarpât, anguvaillo innuᴋotinginit unnuktut, parngnanairsortauvlutiglo aularutivait Damaskusemut. Israelitillo attanningata agganginut tunnijaulaurivok, tapsomalo salagijauneᴋartipa angijomik.

⁶ Pekajablo Remaljab erningata Judakune 120,000 dit ullimarpait uvlorme attautseme, illunatik angutit sorsugungnartut, Nalegak atâtagijamik Gudingat ᴋemmangmatsuk.

⁷ Sichriblo, angutaudlartub Efraimekunit, toᴋᴋopait Maeseja attanniub erninga, Asrikamelo, aulatsijok attanniub iglunganik, Elkanalo attanniub tuglia.

⁸ Israeliblo ᴋittorngangita ᴋattangutimingnit aularutivait parngnanairsortaumajut 200,000 dit, nullit, ernillo pannillo, aksarpaillotauk perᴋutinik unnuktunik, aksarnigaujullo âpait Samariamut.

⁹ Tagvanelaukporle Nalekab nallautaijoᴋotingita illangat, Odedemik attelik, tamna annivok sorsuktuksat Samariamut tikkitut pachreartorlugit, oᴋautilugillo: Ahâk, Nalekab atâtagijapse Gudingata Judakut ningaringmagit tunnilaukpait aggapsingnut; illipsele toᴋᴋolaukpasse ᴋanningaumajarnermut, ᴋillangmut tôngmat.

¹⁰ Mannalo kajusimavose Judamiut Jerusalemiullo ᴋittorngangit attanniotivigijomavlugit, angutillo arnallo kippalungortitsomavlugillo illipsingnut. Idluineᴋangilak illipsingne, illa illipsingne, akkerartortomik Nalekamut Gudipsingnut?

¹¹ Tagva nalaksinga manna, parnanairsortallo aularutimajase ᴋattangutipsingnit, uttertisigik; Nalekab ningarningata illungertorutigingmasse.

¹² Tagva Efraimib ᴋittorngangita angajoᴋaunerôjungita illangit: Asarja, Johananib erninga, Berechjalo, Mesillemotib erninga, Jehiskialo Sallumib erninga, Amasalo, Haldaib erninga, nikkoviput, tapᴋoa unatadlarnermit tikkitut kiglornilugit.

¹³ Oᴋautilugillo: Parnanairsortat, tamaungatitaksaringilasse; idluitullijarêrapta Nalekamut, illipse issumavose idluinivut, tappanivullo illatuinaromavlugit, tappanivut angijovaksongmatta, ningautsiblo Israelitit illungertorutigivait.

¹⁴ Tagva sakkulijartut, parngnanairsortat, aksarnigaujullo ᴋemmakpait angajoᴋaunerôjut illagêllo illunatik sânginut.

¹⁵ Tagva angutit manna attimikut taijaumajut nikkoviput, tiguvaillo parngnanairsortat, illunaitalo annorairsimajut akkorngane, annorarpaillo aksarnigaujunit, annorartipaillo kamiktorlaitalo, tunnitsivigivaillo nerᴋiksanik, immiksaniglo, mingoarpaillo, sangêtullo ikkitipait siuteᴋoᴋtôjunut, âlugillo Jerichomut iglugasaksoarnut Palmitalingnut, ᴋattangutinginut; utterlutiglo Samariamut.

¹⁶ Nalliutome taipsomane attannek Ahase tilliklerpok Assiriamiut attanninginut, ikajorlugo piᴋovlugit.

¹⁷ Edomiterillotauk tikkiput sâlagilugillo Judakut, aularutivaillo illangit.

¹⁸ Filisterillo iglugasaksuit naksarnetut Judablo seᴋᴋernganêtut ittarpait, aksarnigarivaillo Bethsemese, Ajalonelo, Gederotelo, Socholo, aiparusingit illagilugit, Timnalo, aiparusingit illagilugit, Gimsolo, aiparusingit illagilugit, innigivaillo.

¹⁹ Nalekab Judakut mannigotitingmagit, Ahase Judakut attanningat pivlugo, Judakut ussingatimagit, Nalegarlo idluitullivigingmago.

²⁰ Tiglatpilneseriblo Assiriamiut attanningata opaglukpa, tattivâlo, ikajorlungilâlo.

²¹ Ahasib Nalekab iglunga, attanniublo iglunga, angajoᴋaunerôjullo iglungit aksaralloarpait, tunnilaitalo Assiriamiut attanninganut; sullilaungilarle.

²² Tettijaunimelo nalliuningane, Ahase attannek idluitulliganerpok sulle Nalekamut;

²³ Tunnergutiniglo tunnijivok Damaskusemiut, salaᴋarlauktut tapsominga Gudinginut, oᴋarlunelo: Siriamiut attanningita Gudingita ikajorpait tapᴋoa; tamanna pivlugo tunnergutinik tunnijijomavunga tapᴋonunga ikajorᴋovlugittauk uvamnik. Ochojutiksanganulle Israelitillo illunatik ochojutiksanginut illingalaukput.

²⁴ Ahasiblo Gudib iglungata illulerᴋutingit kattitipait, avgorpaillo Nalekab iglungata illulerᴋutingit. Nalekablo iglungata upkoangit pallangairpait; Altareᴋartitsivorlo ingminut Jerusaleme terreᴋune illunaine.

²⁵ Judakullo iglugasaksoangine illunaine poktojoᴋartitsivok, Gudib assingit isserluanititsivigivlugit, Nalegarlo atâtagijame Gudingat ningaksarpa.

²⁶ Unipkautsit assingit tamna pivlugo, apᴋotigijangillo tamaita, sivorlit kingorlillo, ahâk, tamakkoa aglaksimavut Judakut Israelitillo attanningita aglangine.

²⁷ Ahaselo sinnisilerpok, atâtagijaminut ailune, illijartorpâllo iglugasaksoarne Jerusaleme; âtaulungilarlo Israelitit attanningita illuvinginut. Erningalo Jehiskia, attanningorpok innangêrdlugo.