II Kronika 26 - Labrador Inuttitut Heritage Bible

Usiab attanniotininga.

¹ Tagva innugasaksuit Judakut illunamasiatik Usia Jareᴋalauktok 16 nik tiguvât attanningortilâllo atâtangata Amaziab inningane.

² Tapsoma Elothe iglugasaliorpait, sattortautilaitalo Judamut, attannek sinnisilauᴋârdlune atâtagijane illagellugit.

³ Usia Jareᴋalaukpok 16 nik attanningorame, attanniotilunelo Jarinik 52 ginik Jerusaleme. Anânanga atteᴋalaukpok Jechaljamik, Jerusalemiok.

⁴ Pinniarporlo Nalekab namagijanganik, sorlo atâtanga Amazia pinniarlaungmat.

⁵ Gudelo ᴋennerpa taimak akkunêrtigijomik Sacharja, tukkisijok Gudib takkotitanginik, innôtillugo; taimaglo akkunêrtigijomik Nalegak ᴋennerlaungmago, Gudib sullidlarᴋolaukpa.

⁶ Aularporlo, Filisterillo sorsukpait, Gatiblo ᴋarmangit (avalungit) Janiblo ᴋarmangit, Asdodiblo ᴋarmangit serᴋomipait; iglugasaliorporlo Asdodib avatâne, Filisterillo akkorngane.

⁷ Gudiblo ikajorpa Filisterit akkerartorlugit, Arabiamiut Gurbaaleme nunaᴋartut akkerartorlugit, Meuniterillo akkerartorlugit.

⁸ Amoniterillo Usia tunnitsivigivât pilliutinik, attingalo oᴋausiolaukpok Egipten tikkidlugo; sôngopalliatsainarmat.

⁹ Usiablo nuvugutsit igloliorpait Jerusaleme, terreᴋub itterviksoangane, naksablo itterviksoangane, terreᴋullo assingine, sôngotipaillo.

¹⁰ Igloksuillo avaluliorsimajut igloliorsavait sunaᴋajuitome, aggarlunelo immektarvingnik unnuktunik, nergjuteᴋalaurame unnuktunik naksarne, naternanelo; perorsaijoᴋuteᴋalaurivok perorsêvingne, ᴋaᴋᴋanelo Weineliksalingne, ᴋarmelemelo; perorsainek ᴋuviasutigigamiuk.

¹¹ Usialo sorsuktuksaᴋuteᴋalaukpok sorsugungnartunik, aulartunik unnatadlarnermut, kattimgajovlutik ingmigolingatitauvlutik, sorlo kittitaumangmatta Jejelib aglakpaktub agganginut, Masejamullo aulatsijomut, Hananjab attanniub angajoᴋaᴋotingita illangata aulatsininganut.

¹² Atâtallo angajoᴋaunerôjut, sorsuktuksat sôngojut akkorngane unnurningit, 2,600 diolaukput.

¹³ Tapᴋoalo aulatsiningine sorsuktuksanik 307,500 dinik sorsugungnartunik, sôngudlarlutik attannek ikajorlugo omigijingit akkerartorlugit.

¹⁴ Usablo sorsuktuksat illunaita pittaᴋartipait sappulutanik, ᴋallugiarniglo, nassâlungniglo, sagvingmiutaniglo, pittikseniglo, ujarᴋaniglo illoereumut.

¹⁵ Tallutiniglo sannavok Jerusaleme tattamnadlartunik, nuvugutsit ᴋânginêtuksanik, terreᴋullo ᴋânginêtuksanik, pittikserviksaniglo ᴋârgjunik, illoerearviksaniglo ujarᴋanik. Tussaumajauvorlo ᴋanningitomut, tattamnadlartomik ikajortaulaungmat, sôngoᴋârtinago.

¹⁶ Sôngoleramele omattinga piojorilerpok asserortaujutiksaminut. Idluitullivorlo Nalekamut Gudiminut, ailunelo Nalekab Tempelinganut, isserluanititsijomavlune isserluanititsiviub Altaringane.

¹⁷ Asarjablo ajochertuijub illagellugo ajochertuijut 80 git, angutit erᴋomatsiartut, mallikpât,

¹⁸ Kiglornilâllo Usia attannek, oᴋautilugolo: Igvit Usia isserluanititsijuksaungilatit Nalekamut; ajochertuijulle, Aronib erningit, ivsornaititaumajut isserluanititsiᴋovlugit. Annit ivsornaitovingmit, tammaravit; nertortaujutiksarnullo Gudib Nalekab sângane illinganiangilak.

¹⁹ Usiale ningalerpok illulerkullo isserluanititsivik tigumiarpa aggangminut, ajochertuijunullo oᴋaloitillugo, kallak annilerpok ᴋaungane ajochertuijut takkoane, Nalekab iglungane, isserluanititsiviub Altaringata sângane.

²⁰ Asarjablo ajochertuinerôjub, ajochertuijullo illunatik takkosarmatsuk, ahâk, tagva kallaksimalaukpok ᴋaungane, annitipâllo. Nangminerlo tuaviluᴋarpok annileromavlune, Nalekab annaulaungmago.

²¹ Taimak Usia attannek kallaliôlaukpok toᴋᴋone tikkilugo, iglolo ingmigolingajok innigiva kallaliôvlune, avisimagame Nalekab iglunganit. Jothamible attanniub erningata attanniub iglunga aulapa, idluarsarlaitalo innugasaksuit nuname.

²² Unipkautsille tamakkoa assingit Usia pivlugo, sivurlit kingurlillo nallautaijub Jesaiasib Amozib erningata aglagutigilaukpait.

²³ Usialo sinnisilerpok atâtagijaminut ailune, illijartorpâllo atâtagijangine, natername attannit illijartortauvingane. Oᴋarmatta: Kallaliovok. Erningalo Jothame attanningorpok innangêrdlugo.