II Kronika 25 - Labrador Inuttitut Heritage Bible

Amaziab Judakut attanningata attanniotininga.

¹ Amazia Jareᴋalaukpok 25 ginik attanningorame; attanniotilunelo Jarit 29 it nâlugit Jerusaleme. Anânanga atteᴋalaukpok Joadamik, Jerusalemiok.

² Pinniarporlo Nalekab namagijanganik, omamulle tamânûngitok.

³ Attanniovinga manna pallangersimangmat, kivgaᴋotine nakterpak, attannermik atâtanganik ullimarnilauktuk.

⁴ ᴋittorngangille toᴋᴋolaungilait. Taimak aglaksimangmat perᴋojane, Mosesib aglangine, Nalegak perᴋojingmat, oᴋarlunelo: Atâtat toᴋᴋotaujuksaungilat ᴋittorngat pivlugit, ᴋittorngallonêt atâtat pivlugit; nallialle ajornine pivlugit toᴋᴋotaujuksauvok.

⁵ Amaziablo Judakut kattiᴋovait, pitipaillo atâtat kinguvângit (iglungit) malliklugit, angajoᴋait 1,000 dinut 100 dinullo malliklugit, Judakut illuêngarlutik Benjaminekullo; kittipaillo Jarelingnit 20 ginik unnurnersaniglo, naipipaillo 300,000 diojut annerimajut, aularungnartut unatadlarnermut, ᴋallugialijarungnartut, sappulutalijarungnartullo.

⁶ Tapᴋoa tappilugit Israelitinit ikajortiksarsivok angutinik sôngojunik unatadlarnermut 100,000 dinik, Talentinut 100 dinut Silberemik.

⁷ Gudible anguteᴋotingita illangata tikkipa, oᴋarlunelo: Attannek Israelitit sorsuktuksaksoangit illauᴋoniarnagit illingnut, Nalekab Israelitit Efraimib ᴋittorngangillonêt illagingimagit.

⁸ Igville aularit, sôngoniarlutillo sorsungnerme, Gudib sapᴋoniarajarmattit omigijivit sângine; Gudeme pitsartuneᴋarmat ikajorlune, sapkutsilunelo.

⁹ Amaziab Gudib anguteᴋotinga tamna oᴋautiva: Kannorlo Talentit 100 dit tunnimalauktakka sorsuktuksanut Israelitinit pinniarvigijaujuksauvât? Gudib anguteᴋotinga oᴋarpok: Nalegak unnurnersaᴋarpok sulle makkonangat, tunnijungnartaminik illingnut.

¹⁰ Tagva Amaziab sorsuktuksat tapᴋoa Efraimekunit tikkilauktut tapsomunga apterpait, aularᴋovlugit nunamingnut. Tagva ningarningita Judakut illungertutigilerpait, aularlutiglo nunamingnut, ningarnermut illungertorlutik.

¹¹ Amaziale maksoalerpok, innuᴋotinelo aularutivait naksarmut sioraujalingmut, Seiriblo ᴋittorngangit 10,000 dit ullimarpait.

¹² Israeliblo ᴋittorngangita anguvait tapᴋonangat 10,000 dit innôtillugit; tapᴋoa tassiorpait ᴋairtub sinâkjuata ᴋânganut, ijuᴋartipaillo ᴋairtub sinâkjuanit, illunatik ᴋârᴋovlugit.

¹³ Sorsuktuksalle Amaziab utterᴋolauktangit, innuᴋotine illagilugit sorsungnermut aikonagit, ittârput Judakut iglugasaksoanginut Samariamit Beth-Horon tikkidlugo, ullimarpaillo tapᴋonangat 3,000 dit, aksarnigaujoᴋartitsivullo unnuktunik.

¹⁴ Amazialo utterame Edomiterit sâlagijauninganit, Seirib ᴋittorngangita Gudingoangit naksarpait Gudiotilugillo ingminut, tuksiarvigilugillo isserluanititsivigilaitalo.

¹⁵ Tagva Nalekab ningarningata Amazia illungertutigiva, nallautaijullo illangat tilliva tapsomunga, oᴋautilalo: Sôg innugasaksuit Gudingoangit ᴋennerpigit, innuᴋotimingnik piuliklerungnarlaungitut aggangnit?

¹⁶ Oᴋarᴋattigingmagolo (Amaziab) oᴋautiva: Igvit attannertuijungortitaumavit attannermik? Nippangerit. Sunna pivlugo annaulertaujomavit? Tagva nallautaijok nokᴋarpok, oᴋarlunelo: Mallugosukpunga, Gude kajusimangmat asseroromavlutit, taimailioravit attannertuineralo nalanginangne.

¹⁷ Amazialo Judakut attanningat issumalerpok, tilliklerlunelo Joasemut Joahasib erninganut Jehub erningata, Israelitit attanninganut, oᴋautsauᴋovâlo: ᴋait takkonautilauluk!

¹⁸ Joasele Israelitit attanningat tilliklerpok Amaziamut Judakut attanninganut oᴋautsauᴋovâlo: Orpik Dornemik attelik, Libanonemêtok, tilliklerpok Cederemut Libanonemetomut, oᴋautsauᴋovâlo: Pannît tunnileruk ernimnut, nulliangoᴋovlugo tapsomunga; omajulle nujuartut Libanonemêtut, orpik Dorneôjok tullerajakpât tullerlugolo serᴋomipât.

¹⁹ Issumavotit: Ahâk Edomiterit salagilaukpakka; tamanna omattit piojorijutigiva, nertornautiksarsiorlutillo; manna nunangnêtualerit. Sôg ᴋannoêtoksiorkit, ochoᴋovlutit, Judakullo illagellutit?

²⁰ Amaziale nalalaungilak; tamannale Gudemit pilaukpok, tunnilugit piᴋovlugo, Edomiterit Gudingit ᴋennerlaungmagit.

²¹ Tagva Joase Israelitit attanningat majorarlune takpaungarpok, takkonautivuglo, tamna Amazialo Judakut attanningat, Bethsemeseme Judamêtome.

²² Judakulle salagijauvut Israelitinut, ᴋemâlutiglo attunît iglomingnut.

²³ Joasiblo Joahasib erningata Israelitit attanningata Amazia Judakut attanningat Joasib erninga tiguva Bethsemeseme, tikkiutilâlo Jerusalemut, Jerusalemiblo ᴋarmangit (avaluksoangit) serᴋomipait, itterviksoarmit Efraimemik attelingmit, terreᴋub itterviksoanga tikkilugo, tallitut 400 ditut takkitigijomik.

²⁴ Goldillo Silberillo tamaita, illulerᴋutillo tamaita Nalekab iglunganêlauktut Obed-Edomeme, attanniublo iglungata perᴋutitalingane, sorrutsillo sattoraksauvlutik tiguvait, naksarlugillo Samariamut.

²⁵ Amazialo Joasib erninga Judakut attanningat innôlaukpok sulle Joasib Joahasib erningata Israelitit attanningata toᴋᴋungata kingorngane Jarinik 15 nik.

²⁶ Unipkautsit assingit Amazia pivlugo, sivurlit kingorlillo, ahâk, tamakkoa aglaksimavut Judakut Israelitillo attanningita aglangine.

²⁷ Nalliutomillo taimangat Amaziab allaivianit Nalekamik, angerᴋattigêngneᴋartitsivut Jerusaleme akkerartorlugo; kemâvorlo Lachisemut. Tagva malliklugo tilliklerput Lachisemut, toᴋᴋopâllo tagvane.

²⁸ Horsekullo âpât, illijartortauvorlo atâtagijamine Judakut iglugasaksoangine.