II Kronika 24 - Labrador Inuttitut Heritage Bible

Tempelib aᴋiktauninga. Joasib nakkilersininga toᴋᴋotsiningalo nallautaijomik; toᴋᴋotauningalo.

¹ Joase Jareᴋalaukpok 7 nik attanningorame, attanniotilunelo Jarit 40 git nâlugit Jerusaleme. Anânanga atteᴋalaukpok Zibjamik, Bersebamiok.

² Joaselo pinniarlaukpok Nalekab namagijanganik, ajochertuijok Jojada innotillugo.

³ Jojadablo nulliaᴋartipa maggungnik; ernetarlunelo pannetarlaukpok.

⁴ Kingornganelo Joase kajusimalerpok Nalekab iglunga nutangortitsomavlugo,

⁵ Ajochertuijullo Levitillo kattiᴋovait, oᴋautilaitalo: Aularitse Judakut iglugasaksoanginut illunainut, kattersoiluselo kênaujanik Israelitinit illunainit Nalekab Gudipse iglungata âᴋiktaujutiksanganut illingajuksanik Jaremit Jaremut, errinesukluselo taimailioritse. Levitille tuavilaungilat.

⁶ Tagva attanniub Jojada ajochertuijersoak ᴋaiᴋova, oᴋautilâlo: Sôg Levitit kammagingipigit, kattersoiᴋovlugit Judamiunit Jerusalemiunillo, tunnergutinik, Mosesib Nalekab kivgangata kattersortauᴋojanginik Israelitit akkorngane, perᴋojaktaliub tuppinganut?

⁷ Athaljable Gudeᴋangitub, erningitalo Gudib iglunga serᴋomilaukpât, tamaitalotauk Nalekab iglunganut ivsornaititaumalauktut, perᴋutautilaukpait Baalemut.

⁸ Tagva attannek perᴋojivok iklervingmik sannaᴋovlugit, illivâllo Nalekab iglungata itterviksoangata sillatânut.

⁹ Akpartauᴋojilunelo Judame Jerusalemelo, ᴋaitsijuksaungmatta Nalekamut Mosesib Gudib kivgangata tunnijauᴋojanginik Israelitinut sunaᴋajuitome.

¹⁰ Tagva angajoᴋajat illunatik innugasaksuillo illunatik ᴋuviasulerput, ᴋaipaillo, egilugillo iklervingmut, tattaᴋârtinago.

¹¹ Nalliutileraikpallo iklervik âtaujuksaulaungmat Levitinut, attanniub perᴋojanga malliklugo, takkopatta kênaujaᴋarmat unnuktunik ᴋammane, tagva attanniub aglakpaktoᴋotinga, ajochertuijersoarmullo perᴋojaujut ᴋaiᴋattarput navilâllo iklervik, tiguvâllo âpsarlugolo inninganut. Taimailiorput uvlut tamaita, kattersoilutiglo kênaujanik unnuktunik.

¹² Attanniublo Jojadabio tunnivait sannajunut sullijaksanik Nalekab iglungane, sullijaksaᴋartitsijunullo, ujaralerijunik, igloliorteniglo Nalekab iglunga nutângortilugo, sabviorteniglo kikkiangmik, kannujarmiglo Nalekab iglunga âᴋiksorlugo.

¹³ Sannajullo sannavut, âᴋiktaunerlo pivalliavok tapᴋoa aggangittigut, innermarikpâllo Nalekab iglunga sattortautimilugo, sôngotipâllo.

¹⁴ Pijarêramiglo kênaujat amiakojut sulle, âpait attanniub Jojadablo sângangnut; tapᴋonangallo illulerᴋutit Nalekab iglunganut illingajuksat sannajauvut, illulerᴋutit kivgartornermut illingajuksat, tunnergutinullo ôtaksanut, allupsautit, illulerᴋutit Goldeôjut, Silbereôjullo. Tunnergutiniglo ôtaksanik tunnijitsainarlaukput Jojada innôtillugo.

¹⁵ Jojadale innutoᴋaulaukpok, namaksilunelo innoserminik, toᴋᴋolarmelo; Jareᴋalaukporlo 130 ginik toᴋᴋogame.

¹⁶ Illijartorpâllo Davidib iglugasaksoangine, attannit akkornganut, ajungitullilaungmat Israelemut, Gudemullo, iglunganullo.

¹⁷ Jojadablo toᴋᴋungata kingorngane, Judakut angajoᴋaunerôjungit tikkiput, tuksiarvigilugolo attannek; attanniublo nalakpait tagva.

¹⁸ Nalekablo atâtagijamik Gudingata iglunga ᴋemmakpât, kivgartorlugillo nappartut Gudingoaggit, Gudingoallo assingit. Tagva Judakut Jerusalemiullo ningautsimut tikkitauvut, idluitullinek tamanna pitjutigellugo.

¹⁹ Tapsomalo nallautaijut tillivait tapᴋonunga, uttertitsomavlugit ama Nalekamut, tennersarpaillo; kissianele kammagingilât.

²⁰ Gudible annerningata Zacharja Jojadab ajochertuijub erninga tupvigilerpa, nangeriartorporlo innugasaksuit ᴋollânut, oᴋautilaitalo: Gude imâk oᴋarpok: Sôg Nalekab perᴋojangit tappagivissigîk? Sulliniatsangilase. Nalegak ᴋemagapsiuk, ᴋemaniarivâse.

²¹ Angerᴋattigêngneᴋartitsivulle akkerartorlugo, millorpâllo inneme avaluliorsimajome Nalekab iglunganêtome, attanniub perᴋojanga malliklugo,

²² Attanniublo Joasib napᴋoarnek erᴋarlaungila, Jojadab Zachariasib atâtangata pinniarlauktanga tapsomunga; innuarpâle erninga. Toᴋᴋovlunelo oᴋarpok: Nalekab takkova, akkiniarutigivâlo.

²³ Pijoᴋalaukporlo Jare ᴋângermat Siriamiut sorsuktuksangit majorarlutik takpaungarput Judamut Jerusalemullo, toᴋᴋopaillo innugasaksuit angajoᴋangit illunaita; aksarnigarijatiglo tamaita tillikliutivait Damaskusemiut attanninganut.

²⁴ Siriamiut sorsuktuksangit ikkitotuinarlutik tikkilauralloarput, Nalekable tapᴋoa agganginut tunnivait sorsuktuksat kattimgajoksuit unnuktut; tamanna pivlugo Nalegak atâtagijamik Gudingat ᴋemalaungmatsuk. Joaselo pitlarpât.

²⁵ Aularmattalo tapsomangat, (ᴋemakpât ᴋannimadlartillugo) kivgaᴋotingit angerᴋattigêngneᴋartitsivut akkerartorlugo, Jojadab ajochertuijub erningita aungit pivlugit, nakterpâllo innangavingane, toᴋᴋovorlo. Illijartorpâllo Davidib iglugasaksoangine, attannille illuvingita akkornganeungitok.

²⁶ Tapᴋoangôvugle angerᴋattigêngneᴋartitsilauktuk tapsomunga: Sabade Simeatib erninga, arnab Amonitereôjub, Josabadelo Simritib erninga, arnab Moabitereôjub.

²⁷ Erningille, tunnijariaᴋarningitalo unnurningit, Gudiblo iglungata igluliortauninga, ahâk, tamakkoa aglaksimavut, unipkautsine attannit aglangine. Erningalo Amazia attanningorpok innangêrdlugo.