II Kronika 23 - Labrador Inuttitut Heritage Bible

Joasib mingoartauvlune attanningortitauninga Jojadamut. Athaljab toᴋᴋotauninga; kivgartornerub Baalemik asserortauninga.

¹ Jarille 7 ingane Jojada maksoalerpok, angajoᴋajallo 100 dinut, tagva Asarja Jerohamib erninga, Ismaelelo Johannanib erninga, Asarjalo Obedib erninga, Maesejalo Adajab erninga, Elisafatelo Sichrib erninga, tiguvait, angerᴋattigilaitalo.

² Tapᴋoa ingergavut Judakut nunangatigut, kattiᴋovaillo Levitit Judakut iglugasaksoanginit illunainit, atâtallo Israeleme angajoᴋaunerôjungit, ᴋaiᴋovlugit Jerusalemut.

³ Illagêllo illunamasiangita attannek angerᴋattigivât Gudib iglungane. Jojadablo oᴋautivait: Attanniub erninga attanniojuksauvok, sorlo Nalekab Davidib erningit oᴋautigilaungmagit.

⁴ Tagva manna imailiortuksauvose: Illipse pingasoliluse pingajuise attautsit, ajochertuijunit Levitinillo nangeriartortuksauvut Sabbatib iglungane udsertorlutik upkoanik;

⁵ Pingajuiselo attautsit attanniub iglunganêtuksauvut; pingajuiselo attautsit upᴋoaᴋsoarme angijomêtuksauvut, innugasaksuillo illunamasiatik innemêtuksauvut avaluliorsimajome Nalekab iglunganêtome.

⁶ Kinalo Nalekab iglunganut itterᴋonnago, ajochertuijut Levitillo kivgartortut assingat, tapᴋoa ittertuksauvut ivsornainamik; innugasaksuille assingit illunatik udsertortuksauvut Nalekamik.

⁷ Levitillo attanniub avatânetuksauvut, attunît sakkomingnik tigumiarlutik aggangmingnut. Kinalo iglomut ittertok toᴋᴋotaujuksauvok. Tapᴋoalo attanermêtuksauvut annileraikpat itteraikpallo.

⁸ Levitillo Judamiullo illunatik taimailiorlaukput, sorlo Jojada ajochertuijok perᴋojilaungmat, attunîllo innuᴋotitik ingmingnut pitipait, tikkitut Sabbateme nûlertuksat illagilugit, Jojadab ajochertuijub ingmigolingajut nûᴋolaungimagit.

⁹ Jojadablo ajochertuijub angajoᴋajat 100 dinut tunnitsivigivait ᴋallugiarnik, sappulutaniglo, sakkuniglo, Davidib pigilauktanginik, Gudib iglunganêlauktunik;

¹⁰ Innugasaksuillo illunaita pitipait attunît sakkumingnik tigumiarlutik aggangmingnut, iglub sannerangata tallerpianit iglub sannerangata saumianut tikkidlugo, Altareme, iglomelo attanniub avatâne.

¹¹ Attanniublo erninga annitipât, niaᴋoserpâllo, tunnitsivigivâllo perᴋojanik, attanningortilâllo. Jojadablo erningitalo mingoarpât, oᴋarlutiglo: Attannek innôle!

¹² Athaljable innugasaksuit, opaktut, attannermiglo nertordlertut nipliadlarningit tussaramigit, aivok innugasaksoarnut Nalekab iglunganut.

¹³ Takkosarlunelo, ahâglo, attannek nangerpok nangervigijamine ittervingme, angajoᴋajallo, trompetesijartullo attannek nangerᴋattigivat, nunablo innugasaksoangit illunatik ᴋuviasuklutik tiptulausijarlutiglo, imgerpaktullo noakseralingnik sunatuinarnik attorlutik, nertordlerlutiglo. Tagva annorâne allikpait, oᴋarlunelo: Pikkablajoksonek! pikkablajoksonek!

¹⁴ Jojadable ajochertuijub angajoᴋajat 100 dinut, angajoᴋaujut sorsuktuksanut tikkerᴋovait oᴋautilugillo: Annitisiuk, siaktut akkornganut tikkidlugo; malliktorlo tapsominga toᴋᴋotaujuksauvok saviksoarmut; ajochertuijok oᴋarmat: Toᴋᴋoniarassiuk Nalekab iglungane.

¹⁵ Aggatiglo illivait tapsomunga, tikkimallo horsit ittervianut attanniub iglungane, toᴋᴋopât tagvane.

¹⁶ Jojadalo angerᴋattigêngneᴋartitsivok, tapsomane innugasaksoarnelo illunaine, attannermelo innuᴋutaujuksaugamik Nalekamut.

¹⁷ Tagva innugasaksuit illunatik itterput Baalib iglunganut, immitipâllo, Altaringillo, innungoangillo serᴋomipait. Mathanelo Baalib ajochertuijoᴋotinga toᴋᴋopât Altarit sângine.

¹⁸ Jojadablo sullijaksat Nalekab iglungane perᴋovait ajochertuijunut, Levitinullo Davidib ingmigolingatilauktanginut, Nalekab iglungane tunnergutinik ôtaksanik tunnilutik Nalekamut piᴋovlugit, sorlo aglaksimangmat Mosesib perᴋojangine, ᴋuviasuklutik, nertordlerutiksaᴋarlutiglo Davidib illusinga malliklugo.

¹⁹ Udsertortoᴋartitsivorlo upkoanik Nalekab iglungata upᴋoaᴋsoangine, ivsornartomik nallianiglonêt ittertoᴋarᴋonago.

²⁰ Tiguvaillo angajoᴋajat 100 dinut; erkinarnerpâllo nalegaujullo innugasaksoarne, nunablo innungit illunaita, attersartipâllo attannek Nalekab iglunganit, âlâllo upᴋoaᴋsoakut pôktojoᴋut attanniub iglunganut; ingitipâllo attannek attanniub iksivautaksoanganut.

²¹ Nunablo innungit ᴋuviasudlalaukput; iglugasaksuillo innilangalaukput; Athaljale saviksoarmut toᴋᴋolaukpat.