II Kronika 22 - Labrador Inuttitut Heritage Bible

Ahasjab atlanniotininga, toᴋᴋungalo. Anânangata Athaljab pinniarlungningit.

¹ Jerusalemiullo Ahasja, erningita nuᴋârdlerpângat attanningortipat innangêrdlugo. Sorsuktuksalle Arabiamiunit tikkitut tangmarvingmut, angajuklit illunaita nakterlaukpait. Taimaglo Ahasja Joramib Judakut attanningata erningata attanningorpok.

² Ahasja Jareᴋalaukpok 42 ginik attanningorame, attanniotilunelo Jaremik attautsemik Jerusaleme. Anânanga atteᴋalaukpok Athaljamik, Amrib panninga.

³ Agvertarporlotauk Ahabekut apᴋosiningane. Anânangata attannertormago idluitulliᴋovlugo.

⁴ Tamanna pivlugo pinniarpok Nalekab idluigijanginik Ahabekutitut. Taipkoa atâtangata toᴋᴋungata kingorngane attanneringmagit asserortaujutiksanganut.

⁵ Taipkoalo attannertuiningat malliklugo agvertarpok. Joramelo Ahabib Israelitit attanningata erninga aularᴋattigiva unatadlarnermut Ramotemut Gileademêtomut, Hasaele Siriamiut attanningat sorsugvigijomavlugo. Siriamiulle Jorame ikkilerpât;

⁶ Tagva utterpok mammititaujomavlune Jesreeleme, ikkinit pilauktaminit Ramoteme Gileademêtome, Hasaele Siriamiut attanningat sorsugvigingmago. Ahasjalo Joramib erninga Judakut attanningat attersarpok Jorame Ahabib erninga Jesreeleme ᴋannimavlune nallajok takkojartoromavlugo.

⁷ Ahasjablo asserortauninga Gudemit pilaukpok, tikkininganut Joramemut, tikkisimagamelo Jorame aularᴋattigiva Jehu, Nimsib erninga, Nalekab mingoarlauktanga Ahabekut pêjarlugit, pachreartorlugo.

⁸ Pijoᴋalaukporlo Jehub Ahabekut pitlarmagit, Judakut angajoᴋangit Ahasjablo angajungita erningit, Ahasjamik kivgartortut naipipait, toᴋᴋopaillo.

⁹ Ahasjalo ᴋennerpa, tiguvâlo, ijersimatillugo Samariame, âpâllo Jehumut, toᴋᴋopâllo, illijartorlâllo. Oᴋarmatta: Josafatib ᴋennerlauktub Nalekamik omamut tamânut erneriva. Ahasjablo iglungane kinaᴋalaungilak attanniolerungnarajartomik.

¹⁰ Athaljalo Ahasjab anânanga takkogame ernine toᴋᴋungmat, parngnailerpok toᴋᴋotsilunelo Judakut attanningata kinguvânginik illunainik.

¹¹ Josabeatible attanniub najangata Joase Ahasjab erninga tiguva, tiglilalo attanniub ᴋittorngangita toᴋᴋotaujut akkornganit, pitipâlo pairijinga aiparellugo innemut sinnigvingmut. Taimak Josabeatib attanniub Joramib panniata ajochertuijub Jojadab nulliangata ijerpa Athaljamit, (Ahasjab najagingmago) toᴋᴋotauᴋonago.

¹² Illagilugillo Gudib iglungane ijersimalaukpok Jarit pingasojortut nâvlugit, Athalja attanniotillugo nuname.