II Kronika 21 - Labrador Inuttitut Heritage Bible

Joramib toᴋᴋotsininga nukkaminik, kivgartorningalo Gudingoanik, toᴋᴋungalo.

¹ Josafatelo sinnisilerpok, atâtagijaminut ailune, illijartortauvorlo atâtagijamine Davidib iglugasaksoangine; erningalo Jorame attanningorpok innangêrdlugo.

² Nukkaᴋalaukporlo Josafatib erninginik, Assarjamik, Jehielemiglo, Sachariamiglo, Azarjamiglo Michaelemiglo, Sefatjamiglo, tapᴋoa illunaita Josafatib Judakut attanningata ernerilaukpait.

³ Atâtangatalo tunnitsivigivait tunnergutinik unnuktunik Silberemik Goldemiglo, pivianartuniglo, iglugasaksoarniglo sôngojunik Judamêtunik illaliudjilune, attanniovingmigle Jorame tunnitsivigiva, erniangoᴋârtongmat.

⁴ Joramele attanningortitaujarêrame, atâtame inningane, pallangaijarêramelo, nukkane illunaita toᴋᴋopait saviksoarmut, illagilugillo angajoᴋaunerôjut Israeleme illangit.

⁵ Jorame Jareᴋalaukpok 32 ginik attanningorame, attanniotilunelo Jarit 8 it nâvlugit Jerusaleme.

⁶ Agvertarlunelo Israelitit attanningita apᴋosiningine, sorlo Ahabekut pinniarmatta, Ahabib pannia nulliaringmago; pinniarlunelo Nalekab idluigijanginik.

⁷ Nalekable Davidib iglunga (kinguvangit) asseroromalaungila, angerᴋattigêngnek pivlugo Davidemut angernerilauktanga, sorlolo oᴋalaungmat, tamnalo ᴋittorngangillo ᴋaumauteᴋartitsomavlugit nalliutune tamaine.

⁸ Tapsoma nalliuningane Edomiterit apterput Judakunit attanneᴋartitsivullo ingmingnut.

⁹ Tagva Jorame angajoᴋâᴋotine ᴋamuteᴋotinelo aksalloaggit illagalluit, aularpok taipkonunga, unnuamelo parngnailerpok, ullimarpaillo Edomiterit illumajine, ᴋamutillo angajoᴋangit.

¹⁰ Taimaglo Edomiterit apterput Judamit uvlok tamanna tikkidlugo. Nalliutome taipsomane Libna (iglugasaksuit) apterivut, Nalegak atâtagijame Gudingat ᴋemangmago.

¹¹ Poktôjuniglo sannavok ᴋaᴋᴋane Judamêtune, Jerusalemiullo ajortullitipait, Judamiullo uivêrivait.

¹² Aglangniglo tikkitoᴋarpok tapsomunga, nallautaijomit Eliamit pijunik, imâk oᴋartunik: Imâk Nalegak, atâtagijavit Davidib Gudinga oᴋarpok: Tamanna pivlugo agvertarlaunginavit atâtavit Josafatib apᴋosiningine, Assablo Judakut attanningata apᴋosiningine;

¹³ Agvertaraville Israelitit attanningita apᴋosiningane, Judamiullo Jerusalemiullo ajortullitigangne, Ahabekut ajortulliningit malliklugit; nukkatillo, atâtavit iglomioᴋotingit idluarᴋijattit nakterlaukpattit;

¹⁴ Ahak, tagva Nalekab pagvisarnartoksoarmik tikkiᴋojiniarpok, innuᴋotingnut, ᴋittorngaᴋotingnullo, nulliaᴋotingnullo, perᴋutingnullo illunainut.

¹⁵ Igville ᴋannimaseᴋarniarpotit unnuktunik; ᴋannimasermik erchavingne, erchavitit kannimasermut annilerᴋârtinagit uvlormit uvlormut.

¹⁶ Taimaglo Nalekab Filisterit annerningit, Arabiamiullo Aethiopiamiut sannianetut annerningit akkerartortipait Joramemut.

¹⁷ Majorarpullo takpaunga Judamut ittârpâllo, aksarnigarivaillo perᴋutit tamaita attanniub iglunganêlauktut, taimaglotauk erningit, nulliangillo, amiakoᴋalungimat ernermik, Joahasib nuᴋardlerpângojub assianik.

¹⁸ Tamakkoalo tamaita kingorngane pagvisarpa ᴋannimasernermut erchavingine âᴋiktaujungnangitomut.

¹⁹ Taimailingalaukporlo uvlormit uvlormut; Jariglo magguk nângmanik erchavingit annilerput tapsomangat ᴋannimasermut, toᴋᴋovorlo serlidlarlune. Ikkoalaneᴋartitsilungilallo ᴋângane, sorlo atâtagijangine pinniarlaungmatta.

²⁰ Jareᴋalaukpok 32 ginik attanningorame, attanniotilunelo Jarit sittamaujortut nâvlugit Jerusaleme, agvertarneᴋalunelo ânanaulungitomik, annernêngerporlo oggurijaunane. Illijartorpâllo Davidib iglugasaksoangine, attannille illuvinginêungitok.