II Kronika 20 - Labrador Inuttitut Heritage Bible

Josafatib sâlaᴋarninga Amoniterinik Moabiteriniglo.

¹ Tamakkoa kingorngane, Moab ᴋittorngangit, Amoniblo ᴋittorngangit, illagilugillo Amunitit illangit tikkilerput Josafate sorsugomavlugo.

² Tikkitoᴋarporlo nallojungnaititsijomik Josafatemik, oᴋarlunelo: Tikkitoᴋarpok opaluktunik illingnik unnuktovaksoarnik, immarbiksub akkianit Siriamit; ahâglo Zazezon Tamaremêput, tagva Engeddime.

³ Tagva Josafate sivuravok, kênanelo torartipa Nalegak ᴋenneromavlugo, nerritailineᴋarᴋojivorlo Judakune illunaine.

⁴ Judakullo kattimalerput Nalegak ᴋenneromavlugo, Judakullo iglugasaksoanginit illunainit tikkiput, Nalegak ᴋennerlugo.

⁵ Josafatelo, Judakut Jerusalemiullo kattimaniksangane, inneme avaluliorsimajome nutâmetome, Nalekab iglungata sângane, nangerpok,

⁶ Oᴋarlunelo: Nalegak atâtagijapta Gudingat, igvit Gudeungilatît ᴋillangme, aulatsijolungilatîllo innuᴋattigêksuit illunamasiatik attanniovingine? Aggangnelo pitsartuneᴋarpok sôngoneᴋarlunelo, kialonêllo akkerartorungnangilâtit.

⁷ Igvit Gudivut nunab tamattoma innungit pêjarlaungipigît innuᴋotivit Israelitit sivorngane, tunnilaungipiuglo Abrahab nagligijavit kinguvânginut issoᴋangitomut?

⁸ Nunagilaukpâllo ivsornaitovingmiglo atternut igloliorlaukput tapsomane, oᴋarlutiglo:

⁹ Tikkitauleraikupta ᴋannoêtomut, saviksoarmut, pitlartaunermut, nusilingnartomut, ᴋângnartomullonet, tagva nangeriartoromavogut iglub oma sânganut, sângnullo, (attit iglub oma illuanêmat,) nipliarvigijomavaptigillo kappiagijavut pitjutigellugo, igvillo tussarniarpotit, ikajorniarlutillo.

¹⁰ Mannalo ahâk, Amonib Moablo ᴋittorngangit, taipkoalo Seirib ᴋaᴋᴋanginit, opaktauᴋolaungitattit Israelib ᴋittornganginut, Egiptenemit aulartillugit, sannerᴋojariaᴋalaukpaille, pêjarlaungilaillo;

¹¹ Ahaglo, manna akkiniarlukpâtigut, ᴋailutiglo singitsomavluta perᴋutigijarnit, tunnilauktarnit uvaptingnut pigitsainarlugo.

¹² Gudivut, erᴋartoromangipigit? Uvaptingne pitsartuneᴋangimat unnuktoksuit taipkoa opaluktivut akkerartorungnarlugit. Nallovogut ᴋannok pinniaraksaptingnik, ijiptale torarvigivâtit.

¹³ Judakullo illuêngarlutik nangerput Nalekab sângane, ᴋittorngatik, nulliatiglo, ernitiglo illagilugit.

¹⁴ Jehasiele Zachariab erninga Benajab erningata, Jehielib erningata, Mathanjab erningata, Leviteôjok Assafib ᴋittornganginit, tupviolerpok Nalekab annerninganik, illagêt kattimajut akkorngane.

¹⁵ Oᴋarporlo: Okokse, Judamiôjose illunase, Jerusalemiôjoselo, attanniojotillo Josafate! Imâk Nalegak oᴋarpok illipsingnut: Kattimgajoksuit taipkoa sivuragijaksaringilasse, maksujarutiginagillonêt: illipse sorsuglunginapse, Gudele.

¹⁶ Kaupat attersarvigijaksarivasse; ahâglo, majoᴋame Zizemik attelingme majorarniarput, naipiniarpasselo naksab pângane, sunaᴋajuitub Jeruelemik attiggub sângane.

¹⁷ Illipse sorsugiariaᴋarniangilase pijoᴋartome tamattomane. Nangeriartortuinaritse, nangerluselo takkolerluselo Nalekab illagijipse piuliklerninganik, Judamiojose, Jerusalemiojoselo. Sivuraniarase maksujarniaraselo; ᴋaupat aularitse, pâriartorlugit, Nalekab illagivâse.

¹⁸ Tagva Josafate okkolerpok kênane pûvlugo nunamut; Judakullo, Jerusalemiullo illunamasiatik pamakterput Nalekab sânganut, Nalegarlo opigivât.

¹⁹ Levitillo, Kahatib ᴋittornganginit, Korablo ᴋittornganginit, makkiput Nalegak Israelib Gudinga nertorlugo imgerlutik nippersoarmut ᴋillangmut.

²⁰ Uvlarârsukullo parngnailerput, aularlutiglo Tekoab sunaᴋajuitunganut. Aulartillugillo Josafate nangerpok oᴋarlunelo: Naleksinga Judamiôjose Jerusalemiôjoselo: Nalegak Gudise okperisiuk, tagva ussornarniarpose; nallautaijoᴋotingillo okperisigik, tagva sullidlarniarpose.

²¹ Innugasaksuillo oᴋarᴋattigivait, imgertoᴋartitsivorlo Nalekamut, nertordlerᴋovlugit pinarnarsinerme heiligeôjome, sivurlerᴋovlugillo oppalungêrsimajunik unatadlarnermut, oᴋarᴋovlugillo: Nalegak ᴋujagisiuk napkiningninga sorainiatsangimat.

²² Pigiartillugillo ᴋujalilutik nertordlerlutiglo, Nalegak terliarsijoᴋartitsivok Amonib Moablo ᴋittornganginik, tapᴋoningalo Seirib ᴋaᴋᴋanginit pijunik, tikkitunik Judamut; ullimârtaulaukpullo.

²³ Amoniblo Moabiblo ᴋittorngangita taipkoa Seirib ᴋaᴋᴋanginit pijut nangerdlutik akkingarpait pêjarlugit nungutsomavlugillo, Seiremiullo nungulerêramigit, tagva tapᴋoa illangata illane ikajorpa asserortigêᴋovlugittauk.

²⁴ Judakulle ᴋaᴋᴋab ᴋânganut tikkimatta sunaᴋajuitub sakkânut, tagva sanguvut kattimgajoksoarnut taipkonunga, ahâglo, timingit toᴋᴋungavlutik nallavut nuname, ᴋemâjoᴋalaungilarlo attautsemiglonêt.

²⁵ Tagva Josafate innugasaksoaᴋotine illagilugit tikkipok, perᴋutingit aviklugit, nachvarpullo tapᴋonane unnuktovaksoarnik, perᴋutinik annorangniglo, illulerᴋutiniglo pivianartunik, aksarpaillo tamakkoninga taimak unnuktigijunik, akjartortaujungnangimatta; aksarnigaujallo avikpait uvlut pingasut nâlugit unnuktolaungmatta.

²⁶ Uvlulle sittamangane kattimalerput nertordlernerub naksangane, tagvane Nalegak nertormatsuk. Tamanna pivlugo inne tamna atserartauvok nertordlernerub naksanganik uvlok tamanna tikkilugo.

²⁷ Taimaglo Judamiut Jerusalemiullo angutingit utterput, Josafatelo sivurliovlune, Jerusalemeliarᴋovlugit ᴋuviasuklutik. Nalekab ᴋuviasungnermik tunnitsivigilaungmagit omigijingit pivlugit.

²⁸ Jerusalemullo itterput Psalterijarlutik, Harfesijarlutiglo Trompetesijarlutiglo Nalekab iglunganut.

²⁹ Gudiblo sivuranarningata attanniovit illunaita nunane tupvigilerpait, tussarmatta Nalekab Israelitit omigijingit sorsugvigilaungmagit.

³⁰ Taimaglo Josafatib attanniovinga innilangalaukpok, Gudiblo merngoêrsernermik tunnitsivigiva avatâne illunane.

³¹ Josafatelo attanniotipok Judakunut; Jarekalaukporlo 35 ginik attanningorame, attanniotilunelo Jarit 25 git nâlugit Jerusaleme. Anânanga atteᴋalaukpok Asubamik, Silhib panninga.

³² Agvertarporlo atâtame Assab apᴋosiningine, katsungalaungilarlo pinniarlune Nalekab namagijanganik.

³³ Poktojulle pêjartaulaungilet, sullelo innugasaksuit omattitik torartilaungilait atâtagijamik Gudinganut.

³⁴ Unipkautsit assingit Josafate pivlugo, sivurlit kingurlillo, ahâk tamakkoa aglaksimavut Jehub Hananib erningata unipkausingine, aglalauktangine, Israelitit attanningita aglanginut.

³⁵ Kingornganelo Josafatib Judakut attanningata Ahasja Israelitit attanningat piungitunik pinniarnelik angerᴋattigiva.

³⁶ Angerᴋattigivâlo umijoromavlutik, immarbiksoarmut umiaktortuksanik; umijorpullo Ezeon Gebereme.

³⁷ Tagva Elieser Dodavab erninga Maresamiok nallautailerpok Josafate kiglornilugo, oᴋarlunelo: Tamanna pivlugo Ahasja angerᴋattigilaurangne Nalekab pinniarnît asserorpa. Umiaksuillo serᴋomitauvut, umiaktorungnarlaungilello immarbiksoarmut.