II Kronika 2 - Labrador Inuttitut Heritage Bible

Salomob angerᴋattauninga Tirusemiut attanninganut, Tempelib igloliortauninga pivlugo.

¹ Salomolo issumavok Nalekab attinga iglomik iglolioromavlugo, iglomiglo attannionime innigijaksanganik.

² Kittitsivorlo angutinik akjarsijunik 70,000 dinik, nakᴋartsijuniglo nappartune 80,000 dinik, aulatsijuniglo tapᴋoninga 3,600 dinik.

³ Salomolo tilliklerpok Hiramemut, Tirusib attannertanganut, oᴋautsauᴋovâlo: Sorlo atâtaga Davide pinniarvigilaurangne, tillikliutjivigilugolo Cederinik igloliorungnarᴋovlugo ingminut, taimailiorvigilaungatauk.

⁴ Ahâk, Nalekab Gudima attinga iglomik iglolioromavara, ivsornaititaujutiksamik tapsomunga, isserluanijutiksanik tippitsiariktunik ikkitsiviksamik sângane, ᴋaᴋᴋojaniglo takkojaksanik âᴋiksoiviksamik, tunnergutiksaniglo ôtaksanik tunnijiviksamik uvlâne unnunelo, Sabbatinelo, taᴋᴋêlanelo, Nalekablo Gudipta uvloksiorvingine. Soraijuitomik Israelitit taimailioriaᴋarput.

⁵ Iglolo iglolioromajara angijojuksauvok; Gudivut anginersaungmat Gudinit tamainit.

⁶ Kinale ajoksangilâk tamna igloliorlugo? ᴋillaub ᴋillaillo ᴋillangita illunamasiatik illumajungnangilât. Uvangalo kinaujuksauvîk igloliorungnarlugo? kissiane, isserluanititsivigilugo.

⁷ Tagva manna tilliklervigilaunga angumik sillatôjomik, sungiusimajomik Goldelerilune, Silberelerilunelo, kannujalerilunelo, kikkitjerilunelo, Purpurelerilunelo aupaluktamik, ᴋarmesinelerilunelo, ᴋaujimajomiglo ittersaliorlune ᴋepperuklune illissimajut Judamêtut Jerusalemêtullo atâtama ᴋaiᴋolauktangit illagilugit.

⁸ Tillikliutjivigilaungalo nappartunik Cederinik, Cipressiniglo Sandeliniglo Libanonemit; nallunginama kivgaᴋotitit sungiusimangmatta nappartut nakᴋarlugit Libanoneme; ahâglo, kivgaᴋotima kivgaᴋotitit illagijaksarivait,

⁹ Attuinaruivioᴋovlunga ᴋejungnik unnuktunik; iglo iglolioraksarijara angijojuksaungmat pijariaᴋortojuksaungmallo.

¹⁰ Ahâglo, kivgaᴋotingnut, nappartunik nakᴋarsijunut tunnijijomavunga Korinik 20,000 dinik Weizenik tugaksimajunik, Koriniglo 20,000 dinik Gerstinik, Bathiniglo 20,000 dinik Weinemik, Batheniglo 20,000 dinik orksumik.

¹¹ Tagva Hirame Tirusemiut attanningat aglaktigut oᴋarpok, tilliklerlunelo Salomomut: Nalekab innuᴋotine nagligingmagit, igvit attanningortilaukpâtit tapᴋonunga.

¹² Hiramelo oᴋaranerpok: Nertortaule Nalegak Israelib Gudinga, ᴋillaub nunablo pingortingak, attannek Davide tunnitsivigilaungmago ernermik sillatôjomik poᴋitomiglo illissimajomiglo, igloliorniartomik igluksamik Nalekamut, attannionimelo igluksanganik.

¹³ Mannalo tilliklerpunga angumik illissimajomik, sillatunelingmik, Hurame-Abifemik,

¹⁴ Erniojomik arnamut Danib panninginit pijomut, atâtangale Tirusemiôlaukpok, tamna Goldelerijungnarpok, Silberelerijungnarlarmelo, kannujalerijungnarlunelo, kikkitjerijungnarlunelo, ujaralerijungnarporlo, ᴋejulerijungnarlunelo, Purpurelerijungnarlarmelo aupaluktamik, ᴋarmesinelerijungnarlunelo, ittersaliorungnarporlo ᴋepperuklune sunatuinarnik, sunatuinarniglo ajornartunik, sannajaukojaujunik tapsomunga sannajungnarpok, sillatojoᴋotitit, nalekamalo Davidib sillatojoᴋotingit illagilugit.

¹⁵ Mannalo nalegara tillikliutjile Weizenik, Gersteniglo, orksumiglo, Weinemiglo kivgaminut, sorlo oᴋalaurame.

¹⁶ Tagva ᴋejuit nakᴋaromavavut Libanoneme, pijariaᴋarningititut unnuktigijut, kallingortitautilugillo immarbikut âtsomavavut Joppemut; tagvangallo âtauᴋojungnarpattit takpaunga Jerusalemut.

¹⁷ Salomoblo tujormitjet, Israelitit nunanganetut kittipait, atâtame Davidib kittitsiningata tapᴋoninga unnurningit malliklugit, nachvartauvullo 153,600 dit.

¹⁸ Tapᴋonangallo 70,000 dit akjarsijungortipait, 80,000 dillo nakᴋarsijungortipait ᴋaᴋᴋame nappartune, 3,600 dillo aulatsijungortilaita, aulujititsijut innugasaksoarnik sullijaksane.