II Kronika 19 - Labrador Inuttitut Heritage Bible

Josafatib suartauninga illanaᴋarninga Ahabemik pivlugo; âᴋiksoiningalo kivgartornermik Gudemik.

¹ Josafatele Judakut attanningat ullapirsauteᴋarlune utterpok Jerusalemut.

² Jehublo Hananib erningata takkojub pachreartorpa, oᴋautilâlo attannek Josafate: Igvit Gudeᴋangitok ikajoraksariviuk, nagligilugillo Nalekamik omisuktut? Tamannalo pivlugo Nalekab ningausingata ᴋollangiarpâtit.

³ Ajungitomigle nachvartoᴋalauralloarpok illingne, nappartut Gudingoaggit pêjarlaurangne nunamit, omattillo torartilaurangne Gude ᴋennerlugo.

⁴ Taimaglo Josafate Jerusalemêtuarpok. Amalo aularpok innugasaksuit akkornganut, Bersebamit Efraimib ᴋaᴋᴋangit tikkidlugit, sattortautipaillo Nalekamut atâtagijangita Gudinganut.

⁵ Idluarsaijoᴋartitsivorlo nuname Judakut iglugasaksoangine sôngojune illunaine.

⁶ Oᴋautivaillo idluarsaijut: Kammatsiaritse pinniarnipsingnik innuit pivlugit idluarsailunginapse, Nalekamulle; tapsomalo illagivâse idluarsainerme.

⁷ Tamanna pivlugo sivuranek Nalekamik illipsingnêle, udsertutsiaritse pinniarluselo, Nalekame Gudiptingne idluineᴋalungilak, kammangineᴋangilarlonêt innub kinauninganik, illalliorneᴋangilarlo pilliutinik.

⁸ Jerusalemelotauk Josafate pittaᴋartitsivok Levitinit ajochertuijunillo, atâtanillo angajoᴋaunerôjunit Israeleme, aulatsijunik Nalekab idluarsaininganik, akkerartortigêngnerniglo, nunaᴋarᴋolugillo Jerusaleme.

⁹ Perᴋovaillo, oᴋarlunelo: Taimailioritse sivuranerme Nalekamik, nertornarluse, omamullo nallagortomut.

¹⁰ Illinganerne tamaine âtaujune illipsingnut ᴋattangutipsingnit, iglugasaksoarmingnêtunit, auk pivlugolonêt, malligaksat pivlugillonêt, perᴋojat pivlugillonêt, illutsit pivlugillonêt, idluarijaunerit pivlugillonêt, tagva ajochertorsigik, idluitulliᴋonagit Nalekamut, ningautsemiglo tikkitoᴋarᴋonago illipsingnut ᴋattangutipsingnullo. Taimailioritse, tagva idluitullitailiniarpose.

¹¹ Ahâk, Amarja ajochertuijersoak angajoᴋaunerôvok illipsingnut Nalekab illingaᴋojiningit tamaita pivlugit. Taimaktauk Sabadja Ismaelib erninga, angajoᴋaᴋsoak Judakunut, attanniub illingaᴋojiningit tamaita pivlugit. Aulatsijullo Levitit sapsingnêput. Maksoaleritse pinniarluselô; Nalekablo ajunginek aipariniarpa.