II Kronika 18 - Labrador Inuttitut Heritage Bible

Josafatib illanâᴋalerninga Ahabemik. Ahabelo aipariva unatadlarnermut Siriamiunut. Ahabib toᴋᴋunga.

¹ Josafatelo akluineᴋadlalaukpok, opigijauneliolunelo, Ahabelo illanârilerpa.

² Jariglo magguk nângmanik, attersarpok Ahabemut Samariamêtomut. Ahabiblo tamna pivlugo, innugasaksuillo najortingit pivlugit, saukat tuktuvaillo unnuktut toᴋᴋotauᴋovait. Tilliorpâlo takpaungarᴋattauᴋovlugo Ramotemut Gileademêtomut.

³ Ahabiblo Israelitit attanningata Josafate Judakut attanningat oᴋautiva: Aularᴋattigilaunga Ramotemut Gileademêtomut. Tapsoma oᴋautiva: Uvanga illiktun-îpunga innuᴋotikkalo innuᴋotititut, illagijomavaptigit unnatadlarnermut.

⁴ Josafatible Israelitit attanningat oᴋautiva: Nagliktara uvlome Nalekab oᴋausinga apperilauruk.

⁵ Tagva Israelitit attanningata nallautaijut angutit 400 dit kattiᴋovait, oᴋautilugillo: Sorsugiariartortuksauvita Ramotemut Gileademêtomut nippotitaksarivigolonêt? Tapᴋoa oᴋarput majorarlutit takpaungarit, Gudib tunniniarpait attanniub agganginut.

⁶ Josafatele oᴋarpok: Pittaᴋangilâk sulle Nalekab nallautaijoᴋotingita illanganik, tapsomuna appertsorajarluta?

⁷ Israelitit attanningat Josafatemut oᴋarpok: Anguteᴋârpok sulle attautsemik, appertsorungnarajarutigijaptingnik Nalekamik, kissiane omigivara, ajungitomik nallautaivigingimanga, idluitomigle kissiane; tagva Micha Jemlab erninga. Josafate oᴋarpok: Attannek taimak oᴋarniarane.

⁸ Israelitillo attanningata angajoᴋaᴋotime illangat ᴋaiᴋova, oᴋarlunelo: Micha Jemlab erninga tamaungartisaruk!

⁹ Israelitillo attanningat, Josafatelo Judakut attanningat iksivavuk attunit iksivautaksoaᴋotimingne annorarsimavlutik attanneksiutinik, iksivavugle inneme Samariab itterviksoangata sillatanêtome; nallautaijullo illunatik nallautaivut tapᴋoa sângangne.

¹⁰ Zedekialo Knaenab erninga sannavok ingminut naksungnik kikkiangojungnik, oᴋarlunelo: Imâk Nalegak oᴋarpok: Ukkungnunga Siriamiut nakjumigarniarpattit nungutitsiᴋârtinnak taipkoninga.

¹¹ Nallautaijullo illunatik taimak nallautailaurivut, oᴋarlutiglo: Majorarlutit takpaungarit, sullidlarniarpotit; Nalekab tunniniarpait attanniub agganginut.

¹² Tillijablo aimalauktub Micha ᴋaiᴋolugo, oᴋarᴋattigiva, oᴋarlunelo: Ahâk nallautaijut oᴋalâningit illunatik adsigêktomik attanniub idluarᴋutinganut illingavut; nagliktara, oᴋautsitit taimailingalaulittauk taipkoa illangata oᴋausingititut, oᴋarlutillo ajungitomik.

¹³ Michale oᴋarpok: Sorlo Nalegak mikseᴋârtomik innôngmat, Gudima oᴋauseriniartanganik oᴋaromavunga.

¹⁴ Attannermullo tikkimat, attanniub oᴋautiva: Micha, aulartuksauvita Ramotemut Gileademêtomut sorsungniarluta, nippotijaksarivigolonêt? Tamna oᴋarpok: Ahaila majorarluse takpaungaritse, sullidlarniarpose, tunnijauniarput aggapsingnut.

¹⁵ Attanniublo oᴋautiva: Kapseartorlunga oᴋautimarijariaᴋarpagit, assianik oᴋauseᴋarᴋonak uvamnut, mikseᴋârnermik kissiane Nalekab attingane?

¹⁶ Tagva oᴋarpok: Israelitit illunamasiatik takkolaukpakka siamarsimatillugit ᴋaᴋᴋat ᴋângine saukatitut mianerijeᴋangitutitut. Nalegarlo oᴋarpok: Ukkoa angajoᴋaᴋangilat, illunatik attunît angerarlit iglomingnut ullapirsauteᴋarlutik.

¹⁷ Tagva Israelitit attanningata Josafate oᴋautiva: Oᴋautilaungilagit: Nallautaivigilungimanga ajungitomik, idluitomigle?

¹⁸ Tamnale oᴋarpok: Tamanna pivlugo Nalekab oᴋausingit tussarsigik: Nalegak takkolaukpara iksivatillugo iksivautaksoarmine, ᴋillangmiugasaksuillo illunamasiatik nangertillugit tallerpiane saumianelo.

¹⁹ Nalegarlo oᴋarpok: Kia Ahabe Israelitit attanningat tillioromavaûk, majorarlune takpaungarᴋovlugo, ochoᴋovlugo Ramoteme Gileademêtome? Tamnalo imâk oᴋarmat, assialo imâk;

²⁰ Annernerit illangat ᴋaivok, Nalegarlo sângeriarpa, oᴋarlunelo: Uvanga tillioromavara. Nalekable oᴋautiva: Sunamut?

²¹ Tamna oᴋarpok: Aularomavunga, annerniôjomalungalo nallagongitok, tapsoma nallautaijoᴋotingita illunatik ᴋanningine. Tamnalo oᴋarpok: Tilliorniarpat, sullidlarniarlutillo, aularit taimailiorlutillo.

²² Mannalo ahâk, Nalekab annernek nallagôngitok tunnimava nallautaijoᴋotivit tapᴋoa ᴋanninginut, Nalekablo idluitomik oᴋarutigilaukpâtit.

²³ Tagva Zedekia Knaenab erninga tikkilerpok tagvunga, ulloarokpâlo Micha, oᴋarlunelo: Apᴋosinit nalliagut Nalekab annerninga nûsimava uvamnit, oᴋarᴋovlugo illingnut?

²⁴ Micha oᴋarpok: Ahâk takkojomârpat, iglorutsit ᴋamanenerpânganut tikkitsomâruvit ijerᴋovlutit.

²⁵ Israelitille attanningat oᴋarpok: Tigusiuk Micha, noᴋarᴋolugolo Amoneme iglugasaksuit angajoᴋangane, Joasemelo attanniub erningane;

²⁶ Oᴋarluselo: Imâk attannek oᴋarpok: Una parngnanairsimavingmut pitisiuk, nerritilugolo ᴋaᴋᴋojamik, immertilugolo immermik kiksarnartomik, utterᴋârtinanga ullapirsauteᴋarlunga.

²⁷ Micha oᴋarpok: Ullapirsauteᴋarlutit utterniaruvit, tagva Nalegak uvapkut oᴋalaungilak. Oᴋarporlo: Tussaritse innugasaksôjose illunase!

²⁸ Taimak Israelitit attanningat, Josafatelo Judakut attanningat majorarput takpaunga Ramotemut Gileademêtomut.

²⁹ Israelitillo attanningata Josafate oᴋautiva: Pissertorlunga sorsungnermut aijomavunga; igville annorâᴋotitit attikit. Israelitillo attanningat pissertorpok ingminik annorâminut, tikkipullo unatadlarnermut.

³⁰ Siriamiulle attanningata ᴋamuteᴋotime angajoᴋangit perᴋolaukpait, oᴋarlunelo: Sorsuktuksaungilasse mikkijunullonêt, angijunullonêt, Israelitille attanninganut kissiane.

³¹ Pijoᴋalaukporlo ᴋamutit angajoᴋangita Josafate takkogamitsuk aulajitigivât attannionasugivlugo Israelitinut, sangulutiglo tunarilugo sorsugomavlugo. Josafatele nipliadlarpok; Nalekablo ikajorpa, Gudiblo sangutipait tapsomangat.

³² Kamutille angajoᴋângit takkogamik attanniolungimat Israelitinut, allarpât.

³³ Angutille illangata maungatuinak pittiksine ᴋelluva, pittikpâlo Israelitit attanningat sagvingmiutab pêrniublo akkorngagut. Tagva ᴋemuksertoᴋotiminut oᴋarpok: Sangulerit nûtilungalo sorsungnermit, ikkilersimagama.

³⁴ Sorsungnerlo sugalulerpok uvlorme taipsomane. Israelitillo attanningat nangerpok ᴋamutiᴋotimine, Siriamiut akkiane, unnuk tikkilugo, toᴋᴋolunelo seᴋᴋinek nippilertillugo.