II Kronika 17 - Labrador Inuttitut Heritage Bible

Josafatib attanniôtininga

¹ Erningalo Josafat attanningorpok innangêrdlugo, makkutjilunelo Israelitinik.

² Judakullo iglugasaksoangit sôngojut illunaita, sorsuktuksaᴋartipait, aulatsijoᴋartitsivorlo Judakut nunangane, Efraimekullo iglugasaksoangine illunaine, atâtame Assab aksarnigarilauktangine.

³ Nalekablo Josafate aipariva; agvertarmat atâtame Davidib apᴋosiningine, nutaungitune, ᴋennertaililugillo Baalit,

⁴ Atâtagijamele Gudinga, agvertarlunelo tapsoma perᴋojangine, Israelitillo pinniarningit malliklugiungitok.

⁵ Tamanna pivlugo Nalekab attanniôvik pallangairpa aggangine. Judakullo illunamasiatik pilliutinik tunnitsivigivât, akluineᴋalaukporlo, opigijauneliolunelo arklingnartomik.

⁶ Omattingalo maksoapalliavok Nalekab apᴋosiningane, piganerporlo poktojut, nappartullo Gudingoaggit pêjarlugit Judakunit.

⁷ Attannionime Jaringita pingajuane, angajoᴋaᴋotine Benhail, Obadjalo, Sacharjalo, Nethaneello, Michajalo tillivait, ajochertuijartorᴋovlugit Judakut iglugasaksoangine;

⁸ Tapᴋoalo illagilugit Levitit, Semaja, Nethanjalo, Sebadjalo, Asaello, Semiramotelo, Jonathanelo, Adonialo, Tobialo, Tobadonialo; illagilugillo ajochertuijut Elisamalo, Joramlo.

⁹ Ajochertuivullo Judame, najorteᴋalutiglo Nalekab aglaᴋotinginik perᴋotitalingnik, ingergavullo Judakut iglugasaksoangittigut illunaitigut, ajochertuilutiglo innugasaksoarnik.

¹⁰ Nalekablo sivuranarningata nunat attanniovingit Judakut avatinginêtut illunaita tupvigilerpait sorsuᴋonagit Josafatemut.

¹¹ Filisterillo illangit âtsivut Josafatemut pilliutinik, Silberemiglo nangmakamik attautsemik. Arabiamiullo ᴋaitsivigivât saukanik angusallungnik 7,700 dinik, tuktungajuniglo angusallungnik 7,700 dinik.

¹² Taimaglo Josafate pivalliavok, angijororpallialunelo; igloliorsalunelo Judakut nunangane igloksoarnik avaluliorsimajunik, ᴋemmatullivingniglo.

¹³ ᴋemmatullisimajoᴋuteᴋalaukporlo unnuktunik Judakut iglugasaksoangine, anguteᴋuteᴋalarmelo sorsugungnartunik angutaudlartuniglo Jerusaleme.

¹⁴ Tamadsalo tapᴋoa ingmigolinganingit atâtagijamik iglungine, Judakune angajoᴋaunerolauktut tausendinut: Adna angajoᴋaunerôjok, angutillo sorsugungnartut 300,000 dit illagivât.

¹⁵ Tungânelo Johananeôlaukpok angajoᴋâk, 280,000 dillo illagivât.

¹⁶ Tungânelo Amasjaôlaukpok Sichrib erninga, pijarellune kivgautitok Nalekamut, angutillo sorsugungnartut 200,000 dit illagivât.

¹⁷ Benjaminib ᴋittornganginit Eliadaôlaukpok, angutaudlartok, 200,000 dillo illagivât, oppallungêrsimajut pittiksalijarlutik sappulutalijarlutiglo.

¹⁸ Tungâne Josabadeôlaukpok; 180,000 dillo illagivât oppalungêrsimavlutik sorsungnermut.

¹⁹ Tapᴋoa illunatik attannek naipertorpat, attanniub pitilauktangit iglugasaksoarnut sôngojunut Judame illunâne kittiᴋassiutinagit.