II Kronika 16 - Labrador Inuttitut Heritage Bible

Assab idluitullininga Gudemut, nallautaijoᴋotinganullo; toᴋᴋungalo.

¹ Assab attanniovingata Jaringita 36 ingane Baesa, Israelitit attanningat majorarlune takpaungarpok Judakut akkerartorlugit; iglugasaliorpaillo Rama, Assa Judakut attanningat agviaromavlugo aularnermik itternermiglo.

² Assale Nalekab iglungata attanniublo iglungata perᴋotitalingangnit tigusivok Silberemik Goldemiglo, tillikliutigivaillo Benhadademut Siriamiut attanninganut Damaskuseme nunaᴋartomut oᴋautsauᴋovâlo:

³ Angerᴋattigêngneᴋarpok uvamne illingnelo, atâtamnelo atâtangnelo; tamanna pivlugo tillikliutjivigilaukpagit Silberemik Goldemiglo, angerᴋattigêngnek illingnêtok Baesamêtorlo Israelitit attanningane serᴋomilugo piᴋovlutit, tamna aularᴋovlugo uvamnit.

⁴ Benhadadib attannek Assa nalakpa, sorsuktuksaᴋotimelo angajoᴋangit tillivait Israelitit iglugasaksoanginut; tapᴋoa ullimarpait Ejon, Danelo, Abelmaimelo, iglugasaksuillo ᴋemmatulliviktaggit Naftalikunêtut illunaita.

⁵ Baesab tamanna tussaramiuk noᴋarpok Ramamik iglugasaliorlune, nippotivâlo pinniarnine.

⁶ Attanniuble Assab Judakut illunamasiangit illasearivait, akjartorpaillo ujarᴋat ᴋêjuillo Baesab igloliorutigilauktangit Ramamit, tamakkonangallo Geba Mizpalo iglugasaliorpait.

⁷ Nalliutome taipsomane Hananib takkojub Assa Judakut attanningat tikkipa, oᴋautilâlo: Siriamiut attanningat sungertutigilaurangne, Nalegarlo Gudit tattigilaunginangne; tamanna pivlugo Siriamiut attanningata sorsuktuksaᴋotingit aggakpit ᴋemâjivait.

⁸ Aethiopiamiut, Libienemiullo unnuktovaksolaungilat, ᴋammuteᴋarlutik ablangajoᴋarlutiglo horsit ᴋângine unnuktunik? Sullelo Nalekab tunnilaukpait aggangnut sungertutigilaurangne.

⁹ Nalekab ijikita nunat illunaita tautungmattigik, pitsartutitsiᴋovlugo tapᴋoninga, omamut tamânut ungajunik tapsomunga. Sillaitomik pinniarlaukpotit; tamanna pivlugo mannamit unatadlartoᴋarniarpotit.

¹⁰ Assable takkojok ningarvigiva, pitilâlo parngnanêrsimavingmut; oᴋalokivigivalo pijoᴋartok tamanna pivlugo. Assablo nalliutome taipsomane innugasaksuit illangit nênerpait.

¹¹ Assable pijoᴋalaungningit, sivurlit kingurlillo, ahâk, aglaksimavut Judakut, Israelitillo attanningita aglangine.

¹² Assalo ittigalerilerpok attannionime Jaringita 39 ingane, ᴋannimasingalo sugalukpalliadlarpok ᴋannimavlunele Nalegak ᴋennerlaungila, aniasiortille.

¹³ Taimak sinnisilerpok atâtagijaminut ailune, toᴋᴋovorlo attannionime Jaringita 41 ingane.

¹⁴ Illijartortauvorlo illuviᴋotiminut, sannajauᴋolauktaminut Davidib iglugasaksoangine. Illivâllo innangavianut tattataulauktomut isserluanijutiksanik tippitsiariktunik, mingoarutiksaniglo sunatuinarnik, âniasiusiortit illusingit malliklugit sannamajunik; ikkoalaneᴋartitsivullo angijomik.