II Kronika 14 - Labrador Inuttitut Heritage Bible

Assa attanningorpok; kivgartornek Gudeungitunik pêjarpa; sâlaᴋarninga Aethiopiamiunik.

¹ Abialo sinnisilerpok, atâtagijaminut ailune, illijartorpâllo Davidib iglugasaksoangine; Assalo erninga attanningorpok innangêrdlugo. Tapsoma nalliuningane nuna innilangalaukpok Jarinik 14 nik.

² Assalo pinniarlaukpok idluartomik, Nalekablo Gudingata namagijanganik.

³ Altarillo takkorngartat pêjarpait, poktojullo, nappajoksuillo serᴋomipait, nappartullo Gudingoaggit nakᴋarpait.

⁴ Judakullo oᴋautsauᴋovait Nalegak, atâtagijamik Gudingat ᴋenneraksaringmatsuk, pinniarᴋovlugillo malligaksat perᴋojallo malliklugit.

⁵ Judakullo iglugasaksoanginit illunainit poktojut Gudingoallo pêjarpait. Attannioviglo innilangalaukpok sângane.

⁶ Iglugasaksuillo sôngojut iglugasaliorpait Judame, nuna innilangalaungmat, unatadlatoᴋalaungimallo tapsomunga, Jarine taipkonane; Nalekab merngoêrserviksaᴋartimago.

⁷ Judakullo oᴋautivait: Iglugasaksuit ukkoa iglugasaliorlavut, avaluliorlavullo ᴋarmaksoarnik, nuvuguseartilugillo, upkoârtilugolo, nuna sulle saptingnêmat, Nalegak Gudivut ᴋennerlauraptigo; ᴋennerlaukpavut, tapsomalo merngoêrserviartilaukpâtigut avatiptingne. Taimaglo igloliorsavut, sullidlarlutiglo.

⁸ Assalo sorsuktuksâlaukpok sappulutalijartunik, ᴋallugialijartuniglo, Judakunit 300,000 dinik, Benjaminekunillo sappulutalijartunik, pittikserungnartuniglo 280,000 dinik, tapᴋoalo illunatik songovlutik angutaudlalaukput.

⁹ Serable Aethiopiamiub sorsugiartorpait najorteᴋarlune 1,000,000 nik sorsuktuksanik, ᴋamutingniglo aksaloalingnik 300 dinik, tikkipullo Maresa tikkidlugo.

¹⁰ Assalo aularpok pâromavlugit, oppalungaijarpullo sorsungnermut naksarme Zefatamik attelingme Maresab ᴋannitanganêtome.

¹¹ Assablo Nalegak Gudine nipliarvigiva, oᴋarlunelo: Nalegak adsigêngitoᴋangilak illingne, ikajorlutit unnuktut akkorngane, pitsakitorlonêt ikajorlugo. Ikajortigut Nalegak Gudivut; sungertutigigaptigit, atternelo tikkisimavogut, unnuktovaksuit tapᴋoa pârlugit sorsugomavlugit. Nalegak igvit Gudigivaptigit salagijauniarnak innungnut.

¹² Tagva Nalekab Aethiopiamiut annaulerpait Assab Judakullo sivurâne, ᴋemmâᴋovlugit.

¹³ Assablo innugasaksuillo najortane illagilugit udlapait Gerar tikkidlugo. Aethiopiamiullo ochovut taimak unnuktigijovlutik innojoᴋarungnailaungmat tapᴋonangat, serᴋomitaulaungmatta Nalekab tapsomalo sorsuktuksaksoaᴋotingita sângine. Aksarnigaujullo unnuktovaksuit naksarpait.

¹⁴ Iglugasaksuillo tamaita Gerarib avatâne sâlagivait, Nalekab sivuranarningata tupvigilaungmagit. Iglugasaksuillo illunaita aksarpait, aksarnigaksârmat tapᴋonane unnuktovaksoarnik.

¹⁵ Nergjutillo tuppingit sâlagivaittauk, saukallo unnuktovaksuit Kamelillo tikkiutivait, utterpullo Jerusalemut.