II Kronika 13 - Labrador Inuttitut Heritage Bible

Abia Judakut attanningat; tapsoma sâlaᴋarninga Jerobeamik Israelitit attanninganik.

¹ Attanniub Jerobeamib Jaringita 18 ingane, Abia attanningorpok Judame.

² Attanniotilunelo Jarit pingasut nâlugit Jerusaleme. Anânanga atteᴋalaukpok Michajamik, Urielib Gibeamiub panninga. Unatadlartokalerporlo Abiablo Jerobeamiblo akkorngangne.

³ Abialo oppalungaijarpok unatadlarnermut angutit innuosuktut 400,000 dit sorsugungnartut illagilugit. Jerobeamele oppalungaijarpok sorsuᴋattigijomavlugo, angutit innuosuktut 800,000 dit sorsugungnartut illagilugit.

⁴ Abialo majorarpok ᴋaᴋᴋamut Zemaraimik attelingmut, Efraimib ᴋaᴋᴋanginêtomut, oᴋarlunelo: Nalaksinga, Jerobeame, Israelitillo illunamasiatik!

⁵ Nallungilase Nalekab Israelib Gudingata Davide tunnitsivigilaungmago Israelitit attanniovinganik soraijuitomik, tamna, erningillo, angernermut sioraujalingmut?

⁶ Jerobeamele Nebatib erninga, Salomob Davidib erningata kivganga pimariuterlaukpok nalagungnailunelo nalekaminik.

⁷ Illaulaukpullo tapsomunga innuit kuksalaitut Belialib ᴋittorngangit, tattitosarvigivâllo Rehabeame, Salomob erninga, Rehabeamele innuosuktolaukpok sulle, omateᴋalunelo nangiarsaraitomik, sorsuklune agviarlaunginamigit.

⁸ Manna illipse issumavose Nalekab attannioviᴋotinga Davidib erninginut illingajok kippalidlaromavlugo, illipse unnuktôgapse, nochangoaᴋarapselo Goldeôjungnik Jerobeamib sannalauktangangnik, Gudeôᴋovlugik illipsingnut.

⁹ Nalekab ajochertuijoᴋotingit, Aronib erningit Levitillo, pingudlalaungipissigik, ajochertuijungortitsiluselo nangminipsingnut, innuᴋattigêksoatitut nunane? Tikkitok tigumiaralijarlune tuktuvârsungmik, saukaniglo angusallungnik 7 nik, tamna ajochertuijungortitauvok, tapᴋoa Gudiolungitut pivlugit.

¹⁰ Uvagulle Nalegapta Gudipta illagivâtigut, allarlungitapta; ajochertuijullo Nalekamik kivgartortut, Aronib erningit Levitillo sullijaksamingne,

¹¹ Ikkipaillo uvlâne tamaine, unnunelo tamaine tunnergutit ôtaksat, isserluanijutiksallo tippitsiariktut Nalegak pivlugo; illijilutiglo ᴋaᴋᴋojanik takkojaksanik sâmut Goldeôjomut illaᴋangitomik; nannergoabviglo Goldeôjok, ᴋollingillo unnune tamaine ikkipait. Uvagut kammagijaksat Nalegak Gudivut pivlugo kammagigaptigik, illipsele ᴋemmalaukpasse.

¹² Ahâglo, uvagut illagivâtigut sivuniptingne, Gudib ajochertuijoᴋotingitalo, Trompetillo trompetesijautigijauᴋovlugit akkingerluse. Kittorgaujose Israelemut, akkerartorniarase Nalekamut atâtagijapse Gudinganut, sullinianginapse.

¹³ Jerobeamele terliarsiviᴋartitsivok avatâne, tunnuanit tikkitsomavlugit, taimaglo nangerput Judakut sivurâne, terliarsivingmiullo tunnungine.

¹⁴ Judakullo manna ᴋeviarmatta, ahâk tagva sângine tunnunginelo sorsugviᴋalaukpok. Tagva niplialerput Nalekamut, ajochertuijullo Trompetit trompetisijautigivait.

¹⁵ Angutillo Judakut illunamasiatik nipliarput, angutillo Judakut nipliartillugit, Gudib Jerobeame Israelitillo illunaita annauvait Abiab Judakullo sângine.

¹⁶ Israeliblo ᴋittorngangita Judakut ᴋemmâvait, Gudiblo tunnivait tapᴋoa agganginut.

¹⁷ Abialo innuᴋotingillo sâlaᴋarneᴋartitsivut angijomik tapᴋonane, ochovullo Israelitinit ullimarsimajut angutit innuosuktut 500,000 dit.

¹⁸ Taimak Israelib ᴋittorngangit mannigotititaulaukput taipsomane; Judable ᴋittorngangit maksoalerput, Nalegak atâtagijamik Gudingat tattigigamitsuk.

¹⁹ Abiablo Jerobeame udlava, aksarpâlo iglugasaksoarnik, Bethelemik aiparusinginiglo, Jesanamik, aiparusinginiglo, Efronemiglo aiparusinginiglo;

²⁰ Jerobeamelo nukkiktarlungilak Abia innôtillugo, Nalekablo annauva toᴋᴋolugo.

²¹ Abialo pallangairame arnat 14 it nulliarilerpait, ernertarlunelo 22 ginik, pannetarlarmelo 16 nik.

²² Unipkautsit assingit Abia pivlugo, apᴋotingillo pinniarningillo, tamakkoa aglaktaumavut Iddob nallautaijub aglangine.