II Kronika 12 - Labrador Inuttitut Heritage Bible

Rehabeamib salagijauninga Sisakemut, Egiptenemiut attaninganut, toᴋᴋungalo.

¹ Rehabeamible attaniôvinga pallangêrsimangmat songongmallo, Nalekab perᴋojangit ᴋemmakpait, Israelitillo illunamasiangita tamna illagilugo.

² Rehabeamible attannioningata Jaringita tallimangane aularlune takpaungarpok Sisak Egiptenemiut attanningat Jerusaleme sorsugvigijomavlugit, (idluitullilaungmatta Nalekamut),

³ Najorteᴋarlune ᴋammutingnik aksalloalingnik 1,200 dinik, ablangajuniglo horsit ᴋângine 60,000 dinik; kittiksaulaungilallo innugasaksuit illaulauktut tapsomunga Egiptenemit Libienemillo, Suchimemillo, Aetheopiamillo.

⁴ Iglugasaksuillo sôngojut sâlagivait Judamêtut, tikkilunelo Jerusaleme tikkidlugit.

⁵ Tagva Semajab nallautaijub Rehabeame Judakullo angajoᴋaunerôjungit Jerusaleme kattimalertut sivuramut Sisakemik, oᴋautivaillo: Imâk Nalegak oᴋarpok: Illipse ᴋemmalaukpapsinga, tamanna pivlugo tunnilaukpapse Sisakib agganginut.

⁶ Tagva angajoᴋaunerôjut Israeleme, attannerlo mannigotitilerput, oᴋarlutiglo: Nalegak idluarpok.

⁷ Nalegarle takkogame manigotitingmatta, Nalekab oᴋausinga Semajamut tikkipok, oᴋarlunelo: Manigotitikauvut, tamanna pivlugo asseroromalungilakka; piulijaunermigle tunnitsivigijomavakka, illungertorneralo kovijaujuksaungilak Jerusalemut Sisakekut.

⁸ Taimaigalloarmalle kivgartoraksarivât, tukkisilerᴋovlugit sunaumangat kivgartorlunga, nunallo attanniovingit kivgartorlugit.

⁹ Taimak Sisak Egiptenemiut attanningat takpaunga majorarpok Jerusalemut, tigusilunelo perᴋutinik pivianartunik Nalekab iglunganêtunik, attanniublo iglunganêtunik, illunaitalo aksarnigarivait, tiguvaillotauk sappulutaksat Goldeôjut Salomob sannajauᴋolauktangit.

¹⁰ Attanniublo Rehabeamib taipkoa inninginut sappulutaksat kannujaujut sannajauᴋovait, unertutigivaillo sorsuktuksat, attanniub iglungata upkoanginik udsertortut angajoᴋânginut.

¹¹ Attannerlo Nalekab iglunganut itterlaurangat, udsertortut akjarᴋattariartorpait, uttertiᴋattarlaitalo udsertortut iglunganut.

¹² Manigotitingmallo Nalekab ningarningata allarpa, asserortaumariᴋonago. Judakune sulle idluarneᴋarmat.

¹³ Taimak attannek Rehabeame pallangilak Jerusaleme, attanniotilunelo. Rehabeame Jareᴋalaukpok 41 ginik attanningorame, attanniotilunelo Jarit 17 it nâvlugit Jerusaleme, iglugasaksoarne Nalekab annerilauktangine Israelib kinguvarênginit tamainit, atterminik pititsiᴋovlugo tagvunga. Anânanga attekalaukpok Naemamik, Amoriteriôjok.

¹⁴ Idluitullilaukporlo, omattinelo torartilaungila Nalegak ᴋennerlugo.

¹⁵ Rehabeamible pijoᴋalaungningit sivurlit kingorlillo, aglaksimavut Semajab nallautaijub, Iddoblo takkojub unnipkausingine; Rehabeamiblo Jerobeamiblo akkorngangne unnatadlartoᴋatsainarpok.

¹⁶ Rehabeamelo sinnisilerpok atâtagijaminut ailune, illijartortaulunelo Davidib iglugasaksoangine. Erningalo Abia attanningorpok innangêrdlugo.