II Kronika 11 - Labrador Inuttitut Heritage Bible

Rehabeamib parngnailerninga unatadlarnermut, innertertauningalo Gudemut. Iglugasaksoaᴋotingit, nulliangillo, ᴋittorngangillo.

¹ Rehabeamelo Jerusalememut tikkiname, Judakut Benjaminekullo katterᴋovait angutit innuosuktut 120,000 dit, Israelitit sorsugvigijomavlugit, attanniovik sattortautitsomavlugo ama Rehabeamut.

² Nalekable oᴋausinga tikkipok Semajamut Gudib anguteᴋotinganut, oᴋarlunelo:

³ Rehabeame Salomob erninga Judakut attanningat oᴋautiuk, Israelitillo illunaita, Judakunut Benjaminekunullo illingajut, oᴋarlutillo:

⁴ Imâk Nalegak oᴋarpok: Majorarluse takpaungartuksaungilase, ᴋattangutiselonêt sorsugvigijaksaringilasse, illunatik attunît angerarmilit, tamanna uvamnit pingmat. Nalekpaillo Nalekab oᴋausingit nokᴋarlutiglo aularnermit Jerobeamut.

⁵ Rehabeamelo igloᴋarpok Jerusaleme, iglugasaksuillo Judame sôngotipait:

⁶ Tagva: Bethleheme, Etame, Tekoalo.

⁷ Betzur, Socho, Adullamelo.

⁸ Gath, Maresa, Sif,

⁹ Adoraime, Lachis, Aseka,

¹⁰ Zarega, Ajalon, Hebronelo, tapᴋoa iglugasaksoangolaukput songotitaksat Judame Benjaminemelo.

¹¹ Tapsomalo sôngotidlarpait, angajoᴋaᴋartilaitalo, piksaᴋartilugillo nerᴋiksanik, orksumiglo Weinemiglo.

¹² Iglugasaksoarnelo illunaine sappulutaksaᴋartitsivok, ᴋallugiaᴋartitsilunelo, sôngotidlarpaillo. Judakullo Benjaminekullo tapsomunga illingavut.

¹³ Ajochertuijullo Levitillo Israelitit illunamasiangine kiglilervinginelo illunainêtut illagilerpât.

¹⁴ ᴋemmakpaillo iglugasaksoagijatik, perᴋutitiglo, tikkilutiglo Judakunut Jerusalemut. Jerobeamib erningitalo ajaktormagit, ajochertuijuêrutilugit Nalekamut.

¹⁵ Ajochertuijungortitsivorle poktojunut, Satanasenullo, nochangoanullo, sannajauᴋojaminut.

¹⁶ Tapᴋoalo kingorngane Israelib kinguvarênginit illunainit tikkitoᴋalerpok Jerusalemut, omattemingnik tunnijijunik, Nalegak Israelib Gudinga apperᴋutigilugo, tunnergutinik tunnijijomavlutik Nalekamut atâtagijamik Gudinganut.

¹⁷ Pitsartutipâllo Judakut attanniovingat, naiterpâllo Rehabeame Salomob erninga Jarit pingasut nâlugit; agvertaramik Davidib Salomoblo apᴋosiningine Jarit pingasut nâvlugit.

¹⁸ Rehabeamiblo Mahelate Jerimotib Davidib erningata pannia tiguva nulliarivlugo, Abihaillo Eliab Isaib erningata pannia.

¹⁹ Tapsomalo erniarivait tapsomunga ernerit: Jeus, Semarjalo, Sahamalo.

²⁰ Tapsomalo kingorngane Maecha Absalomib pannia nulliarilerpa; tapsoma erniarivait tapsomunga: Abia, Atailo, Sisalo, Selomitelo.

²¹ Rehabeamiblo Maecha Absalomib pannia nagliginerpariva nulliaminit illunainit, panervgaminillo illunainit; nulliaᴋarame 18 nik, pannervgaᴋalarmelo 60 ginik; ernertarlunelo 28 ginik, pannetarlarmelo 60 ginik.

²² Rehabeamiblo Abia Maechab erninga niaᴋungortipa angajoᴋangortilâlo ᴋattangutingita akkorngane; issumavorlo attanningortitsomavlugo.

²³ Pinniarporlo sillatôlune, siamartipaillo ernine Judakut Benjaminekullo iglugasaksoanginut songojunut illunainut, nerkiksaᴋartipaillo unnuktunik, tigusilunelo tapᴋonunga illingajunik arnanik unnuktunik.