II Kronika 10 - Labrador Inuttitut Heritage Bible

Kinguvarêt 10 it apterningit Rehabeamemit.

¹ Rehabeamelo Sichememut aivok, Israelitit illunamasiangit Sichememut tikkisimagamik attanningortitsomavlugo.

² Jerobeamelo Nebatib erninga, Egiptenemêlauktok, ᴋemâvigijamine Salomo pivlugo, tussarame tamattominga utterpok Egiptenemit.

³ Tilliklerpullo taikunga ᴋaiᴋojauᴋovâllo. Jerobeamelo Israelitit illunamasiangit illagilugit, tikkilerpok oᴋarᴋattigivâllo Rehabeame, oᴋarlutiglo:

⁴ Atâtavit nangmariaᴋartavut oᴋumailuartilaukpa, tagva igvit manna atâtavit kivgartorᴋojininga oᴋumaitok, nangmagarlo siorniornartok illilauktanga uvaptingnut oᴋinersautitik; tagva nalagomavaptigit.

⁵ Tapsoma oᴋautivait: Uvlut pingasut nâkpatta ᴋaipsarniaritse uvamnut. Innugasaksuillo aularput.

⁶ Attanniublo Rehabeamib angajoᴋaunerôjut atâtame Salomob sângane innôtillugo nangerlauktut kachimiolerᴋattigivait, oᴋarlunelo: ᴋannok attannertuivise innugasaksuit taipkoa kiolugit?

⁷ Oᴋarᴋattigivât oᴋarlutiglo: Innugasaksuit taipkoa pitsiarvigigungne, nalatsiarungnelo, illanârnartuniglo oᴋauseᴋarvigigungne, tagva nalatsainarniarpâtit.

⁸ Tapsomale angajuklit attannertuiningat, tunnilauktangat tapsomunga ᴋemakpâ, innuosuktullo ikkingutine nangertullo sângane kachimiolerᴋattigivait,

⁹ Oᴋautivaillo: Sunamik illipse attannertuivise, innugasaksuit taipkoa kiolugit pijuksaugapta oᴋautjigilauktakka, oᴋarlutiglo: Nangmagak atâtavit illilauktanga uvaptingnut oᴋinersautiuk?

¹⁰ Innuosuktulle ikkingutingita oᴋarᴋattigivât oᴋarlutiglo: Imâk oᴋartuksauvotit innugasaksoarnut, oᴋarᴋattaulauktunut illingnik, oᴋarlauktunullo: Atâtavit nangmagaksavut oᴋumailuartilaukpa, igville oᴋinersautiuk, oᴋautikillo: Erᴋeᴋotiga sillinersaujuksauvok atâtama koktoragingnit.

¹¹ Manna atâtama nangmiulaukpasse oᴋumailuartomik; tagva uvanga nangmagaksase illajomavara. Atâtama ipperautinut ipperartorlaukpâse; uvangale Skorpionenut.

¹² Jerobeamelo innugasaksuillo illunatik uvlut pingajuane Rehabeamut tikkimatta, sorlo attannek oᴋalaungmat: Uvlut pingajuane ᴋaipsarniaritse uvamnut;

¹³ Attanniub kiovait oᴋumaitomik. Attanniublo Rehabeamib angajuklit attannertuiningat ᴋemmakpa,

¹⁴ Oᴋarᴋattigivaillo innuosuktut attannertuiningat malliklugo, oᴋarlunelo: Atâtama nangmagaksase oᴋumailuartilaukpagit, tagva uvanga oᴋumainersautitsomavakka; atâtama ipperautinut ipperartorlaukpâse, uvangale Skorpionenut sugiaromavapse.

¹⁵ Taimaglo attanniub innugasaksuit nalalaungilait. Gudemut taimak illingatitaungmat, Nalegak oᴋautsiminik nallautsititsiᴋovlugo oᴋauserilauktaminik Ahiakut, Silomioᴋut Jerobeamemut Nebatib erninganut.

¹⁶ Israelitille illunamasiangit takkogamik attanniub nalangimagit, innugasaksuit attannek kiovât oᴋarlutiglo: Sunamik illangiutiviᴋarkita Davidemik? kingormgutijaksaᴋangilagullo Isaib erningane! Israelitiôjose, aileritse tuppeᴋotipsingnut! Taimak manna igvit igloᴋotit takkonâruk Davide. Israelitillo illunamasiatik tupperᴋotimingnut aivut.

¹⁷ Israelib ᴋittornganginut Judakut iglugasaksoangine igloᴋartunut Rehabeame attanniotivok.

¹⁸ Rehabeamible Hadorame angajoᴋaujok sannajuksanut tilliva; Israelible ᴋittorngangita millorlugo toᴋᴋopât. Attannerlo Rehabeamible tuavidlune ikkivok ᴋamuteᴋotiminut, ᴋemmâlunelo Jerusalemut.

¹⁹ Taimak Israelitit aptertut Davidib iglunganit uvlok tamanna tikkilugo.