II Kronika 1 - Labrador Inuttitut Heritage Bible

Salomob tunnijininga tunnergutiksamik Gibeame, sinnaktomaningalo, akluiningalo.

¹ Salomolo, Davidib erninga pallangêrtaulaukpok nalegauvingmine, Nalekablo Gudingata aipariva, angijovaksôtipalo.

² Salomoblo Israelitit illunamasiatik oᴋarᴋattigivait, angajoᴋâksuit 1,000 dinut, 100 dinullo, idluarsaijullo, Israelitillo angajoᴋangit illunaita, atâtat anginerôjungit,

³ Aiᴋovlugit, Salomo, illagêllo illunamasiatik illagilugo poktojomut Gibeamêtomut; Gudib kattimavinga, tuppek, Mosesib, Nalekab kivgangata sannalauktanga sunaᴋajuitome, tagvanêmat.

⁴ Davidible Gudib iklervinga takpaungartilaukpa Kiriatjearimemit, tagvunga Davidib âᴋiksoivigilauktanganut tapsomunga, tuppermik tuppertârlaungmago Jerusaleme.

⁵ Altarele kannujaujok, Bezaleelib Urib erningata, Hurib erningata sannalauktanga, tagvanêlaukpok Nalekab iglungata sângane; Salomoblo, illagêllo tamna nallipsarpât.

⁶ Salomolo tunnijivok Altareme kannujaujome, tuppiub kattimaviôjub sânganêtome Nalekab sângane, tunnergutinik ôtaksanik 1,000 dinik.

⁷ Unnuarmele taipsomane Gudib Salomo saᴋᴋervigiva oᴋautilâlo: Tuksiarit, sunamik tunnitsivigijaksarigapkit?

⁸ Salomoblo Gude oᴋautiva: Napᴋoanersoarmik atâtaga Davide pinniarvigilaukpat, uvangalo taimna innangêrdlugo attanningortilaukparma;

⁹ Tagva manna Nalegak Gude oᴋautsitit atâtamnut Davidemut nallautsitikittôk! Uvânga attanningortilaukparma innugasaksoarnut taimak unnuktigijojunut nunab sanningititut.

¹⁰ Tagva manna tunnitsivigilaunga sillatunermik, illitarksinermiglo, innugasaksuit tapᴋoa sângine anniᴋovlunga itterᴋovlungalo; kiale ukkoa innugasaksoaᴋotitit idluarsarungnarᴋagit?

¹¹ Tagva Gudib Salomo oᴋautiva: Taimaitunik issumagavit, akluinermiglo perᴋutinik, nertortaunermiglonêt, omigijivillo toᴋᴋunginik, innôtsemiglo sivitôjomik tuksiarlaunginavit; sillatunermigle, illitarksinermiglo, innuᴋotikka attanningortitsijutigijakka illingnik idluarsarungnarlugit:

¹² Tagva sillatunermik illitarksinermiglo tunnitsiviomavotit; tamakkoalo tappilugit akluinermik, perᴋutiniglo, nertortaunermiglo tunnitsivigijomavagit, attannît akkorngane adseᴋalauᴋonak sivunerne, kingunernelo, pittaᴋarᴋonaglonêt.

¹³ Taimaglo Salomo poktojomit Gibeonemêtomit tikkipok Jerusalemut, Nalekab tuppingata sânganit; attanniotilunelo Israelitinut.

¹⁴ Salomolo kattersoivok ᴋamutingnik aksalloalingnik, ablangajuniglo horsit ᴋângine, ᴋamuteᴋuteᴋalaukporlo 1,400 dinik, ablangajoᴋutelaukporlo horsit ᴋângine 12,000 dinik, inneᴋarᴋovaillo iglugasaksoarne ᴋamutingnut illingajune, Jerusalemelo attanniub najugâne.

¹⁵ Attanniublo Silberit Goldillo Jerusaleme taimak unnuktigijotipait ujarᴋatitut, Cederillo nappartutitut Sikomorinik atteᴋartutitut naksarne perortutitut.

¹⁶ Salomolo âtsiviolaukpok horsenik Egiptenemit, perᴋutiniglo niuviaksanik sunatuinarnik. Attanniublo niuverteᴋotingita niuviaksat tamakkoa pissiarivait.

¹⁷ ᴋaitsivullo Egiptenemit ᴋammutingnik, attautsingnik kênaujanut Silberlingenik attelingnik 600 dinut, horsemiglo attautsemik Silberlingnut 150 ginut. Taimak âtsivuttauk Hetiterit attanninginut illunainut, Siriamiullo attanninginut illunainut.