II Korintemiunut 9 - Labrador Inuttitut Heritage Bible

Pauluse pitsiarᴋojigannerpoᴋ okpertunut ajoᴋsartunut.

¹ Aglagvigijariakangilapse tujûtiksanik taipkoninga ivsornaitunut.

² Pitsiarnise ᴋaujimagapko, nertornarneralauᴋpapse Mazedôniamiunut (oᴋarlungalo): Achâjamiut achâne pimajarêrtut. Ilungertornipselo unuktut kajumiksalauᴋpait.

³ ᴋatangutille ukkua tililauᴋpakka, sulinata nertoromanata ilipsingnik tamanna pivlugo; pimajarêrᴋovluselo, sôrlo oᴋautigilaurapse;

⁴ Mazedôniamiut illagikpanga, opalungairsimangitosêlo tikipase, uvagut (ilipse oᴋaromangilanga) kangusuktitauᴋonata, taimâk sungertûteᴋamut nertornarneralaurapse.

⁵ Taimaimat ᴋatangutit tâpkoa kaiblariaᴋarasugilauᴋpakka, sivorlioᴋovlugit aivigiluse, katersorᴋovlugit tunergutise sivorngagut oᴋautigimajut; pijarêrᴋovlugit tamakkoa pitsiarnermullo ununârᴋovlugit, ikinârtutitullo-erᴋonagit.

⁶ Imâgle issumavunga: Ikinârlugit karngasoijoᴋ ikituniktauᴋ katersoijomârivoᴋ; ununârdlugillo karngasoijoᴋ, unuktuniktauᴋ katersoijomârivoᴋ.

⁷ Ilûnatik issumamignik tunijilit; ᴋuviasugatiungitoᴋ, perᴋojautuinarnermullônêt pinatik; ᴋuviasuklune tunijijoᴋ Gûdib naglingmago.

⁸ Gûdible tunergutit tamaita unulertitsungnarpait ilipsingnut, tamainik ajoᴋsangitsainarᴋovluse, tunergutiksaᴋarᴋovluselo ajungitulijutaujungnartunik tamainik.

⁹ Sôrlo aglaksimangmat: Karngasoilauᴋpoᴋ aklujut tunitjivigivlugit; idluarninga issoᴋangitomut itsomârpoᴋ.

¹⁰ Karngasoijomulle tunijijoᴋ karngasûtinik, ᴋaᴋᴋôjaniktauᴋ nerᴋiksanik tunijijomârivoᴋ, karngasûtiselo unuksivalliatitsomârpait aglivalliatilugillo idluarnipse perortitangit.

¹¹ Tamainik akluilerdluse tunijitsiarᴋovluse issumalingasuerdluse, tamanna pitjutigilugo Gûde ᴋujagijaulerpoᴋ uvaptingnut.

¹² Ikajortigêgutiksat tamakkoa tujûtaujut piuliniatuinangimatigik ivsornaitut ajoᴋsarninginit; kajungersarnadlarputtauᴋ unuktunut, Gûde ᴋujagidlarlugo.

¹³ Ajungitulineᴋ tamanna nelonairsimajoᴋ pivlugo Gûde nertorpât, oᴋautsinik tussarnertunik nâlekluse Kristûse oᴋautigigapsiuk, issumalingasuerdluselo tunitjivigigapsigik tâpkoalo ilûnaitalo;

¹⁴ Tuksiarutigamiselo tussugivluse, Gûdib saimanersoarminik pingmase.

¹⁵ Gûdele ᴋujagividlartaule tunergutâ oᴋautaujungnangitoᴋ pivlugo.