II Korintemiunut 8 - Labrador Inuttitut Heritage Bible

Paulusib kaiblaininganik, ajoᴋsartunut tunijerᴋovlugit ᴋunulugatik.

¹ ᴋaujitipapsele, ᴋatangutikka, Gûdib saimarsautânik, tunijaumajomik illagêktunut Mazedôniame.

² Oktortauleramik kappianartunut unuktunut, angijomik ᴋuviasukput. Akludlaralloarlutik tunijivut unuktunik issumalingasuerdlutik.

³ ᴋunulugatik tunijivut ajungitamingnik, kigligiutjivunga, ajungitamingnik pituinangilat, piluarput aglât.

⁴ Inaksorpâtiguttauk ilungertudlarlutik ilaliorᴋovluta tunergumik ikajortigêgutiksamik ivjornaititaujunut ilingajomik.

⁵ Issumavullo nelaudlugit pituinangilat; ingmingnik aglât tunerᴋârput Nâlekamut, tungâgullo uvaptingnut Gûdib pijomajanga maliklugo.

⁶ Taimaimat Titûse kaiblalauᴋpavut, sôrlo sivorngagut pinialaurame, taimaktauᴋ akunapsingne ajungitulinermik taimaitomik nâmaksêniarᴋovlugo.

⁷ Sôrlole tamainik akluinapse, okpernermiglo, oᴋautsiniglo, illisimanermiglo, piniatsiarnermiglo, naglingnermiglo uvaptingnut; taimaktauᴋ kamatitse ajungitulinermik tamattominga akluilerᴋovluse.

⁸ Taimâk oᴋauseᴋangilanga, sumik perᴋojilunga; assisele taimâk piniatsiarmatta, naglingnisetauᴋ ôktutuinarpara ilungertormangât.

⁹ Nâlegapta Jêsusib Kristûsib saimarsautâ ᴋaujimagapsiuk, akluitoᴋsôgalloardlune aklulilaungmat pivluse, akluninganut akluititauᴋovluse.

¹⁰ Tamattomingalo issumaga ᴋaujijautipara. Ilipsingnut tamanna idluarmat, ilipse pigiartose achâne piniarnermik kissianeungitoᴋ, pijomanermigletauᴋ.

¹¹ Mânale tagva nâmaksiniarsiuk tunijineᴋ tamanna, sôrlolo ᴋunulaunginapse pijomanermik, taimaktauᴋ ᴋunulugase tunijititse pigijapsingnit.

¹² ᴋuviagijaungmat ᴋunulugane tunijijoᴋ ajungitaminik, ajortaminik pinane.

¹³ Imâgle issumangilanga, assise oᴋititauᴋovlugit, ilipse oᴋumaitoᴋartiluse; neligêrᴋovlusele pivunga.

¹⁴ Neliutome tamattomane taipkoa ajoᴋsalermatta, ikajorniarpase atorniangitapsingnit; kingorngagut ilipse ajoᴋsalerupse, taipkoa tagva atorniangitamingnit ikajoromârivâsetauᴋ, neligêktomik pijoᴋarᴋovlugo.

¹⁵ Sôrlo aglaksimangmat: Unuktunik katersoilauᴋtoᴋ amiakoᴋangilaᴋ: ikituniglo katersoilauᴋtoᴋ, ajoᴋsanginivoᴋ.

¹⁶ Gûdele ᴋujagiviktaule, Titûsib ômatâ taimâk ilungertortingmago pivluse.

¹⁷ Tilijaunermik nâlatuinangilaᴋ; angijomigle ataruilidlarame, issumaminik nelipsarpâse.

¹⁸ ᴋatangutiptale illangat tilivavut, aipauᴋovlugo, illagêt ilûnatik piloriktoᴋotigijangat, atutsiarmat oᴋautsinik tussarnertunik.

¹⁹ Taimaituinangilaᴋ, illagêktunulletauᴋ anerimavoᴋ, illagêrᴋovluta tunergut tamanna neksaruptigo, uvaptingnut kivgartôtaujoᴋ, Nâlegaᴋ nertortauᴋovlugo, ilipselo pitsiarnise oᴋautigijauᴋovlugo.

²⁰ Udjertorpogullo, piungitomik oᴋautigijauᴋonata tunergutivaksuit tamakkoa uvaptigut katitaumajut pivlugit.

²¹ Udjertorapta, piniarnerit idluarᴋovlugit, Nâlekab sângane kissianeungitoᴋ, inuit takoanetauᴋ.

²² ᴋatangutivullo tilivavut tâpkoa illagivlugit piniarnernik ataruilidlartoᴋ unuktunik tukkisiᴋattalauᴋtavut, mânale tamattominga pinialuarivoᴋ angijomik.

²³ Sungertûtigivapsele angijomik: Tituselônêt pivlugo, ᴋatangutigigapko ikajortigilâllo akunapsingne; ᴋatangutivullônêt pivlugit, tâpkoa Aposteliongmatta illagêktune, Kristûsiblo nertorautigingmagit.

²⁴ Taimaimat nelonainiaritse tâpkonunga, naglingnise tukkisijauᴋovlugo illagêt takoane, nertordlernivullo ilipsingnik (tukkeᴋarᴋovlugo).