II Korintemiunut 7 - Labrador Inuttitut Heritage Bible

Kaiblainermik ivsornainermut.

¹ Taimaimat taimaitomik angersimaneᴋarapta, nagliktakka, epᴋêjarniarta uvingûb tarniblo sujungninginit tamainit, nâmaksititsivalliavlutalo ivsornainermik Gûde sivôragivlugo.

² Tukkisitigut; kinalônêt idluitulivigilaungilavut, kinalônêt perᴋutailaungilavut.

³ Passiluse taimâk oᴋangilanga; sivorngagut oᴋautilauᴋpapse ômatiptingnênapse, toᴋoᴋatigijomavluselo inôᴋatigijomavluselo.

⁴ Sivôrajuimariklunga oᴋâlavigivapse, angijomik nertôtigivapse, manigortaunermik ilumertauvunga, angijoᴋsoarmik ᴋuviasuklunga, siorniorniptingne ilûnaine.

⁵ Mazedôniamut pigapta, uvinivut inilangajungnangilaᴋ; ilûnaitigulle kappiasuktitaulauᴋpogut; ᴋaliniptigut sorsuktauvluta, iluptigut erᴋsijogut.

⁶ Gûdible, kiksartunik manigorniktub, manigorpâtigut Titusib tikininganut.

⁷ Tâpsomale tikininganut kissianu-ungitoᴋ, manigortaujutiksamulletauᴋ, manigorutigilauᴋtanganut pivluse, unipkautingmatigullo tussunipsingnik ᴋugviornipsingniglo ilungertornipsingniglo pivlunga, tamanna ᴋuviasûtigilualauᴋpara.

⁸ Kiksartilauralloarapse aglamnut, ᴋakialingilanga, ᴋakialerutigilauralloarapko sivorngagut. Tukkislerâmale aglangnut taipkonunga anikitomik kiksartitaugapse,

⁹ Tagva mâna ᴋuviasukpunga, tamanna pivlugoungitoᴋ, kiksartitaulaurapse, kiksartitauvlusele sâgiarapse; Kiksartitaugapse Gûdemut, sukutsianelônêt idluiliorvioᴋonase uvaptingnut.

¹⁰ Kiksarneᴋ Gûdemit pijoᴋ ᴋaᴋialerneᴋartitsingmat piulijaunartomik, kialônêt ᴋaᴋialerutiginiangitanganik; kiksarnerle silaᴋsûb ilusingatut toᴋotitsivoᴋ.

¹¹ Tagga ahâk, Gûdemut kiksartitaugapse, tamanna sulilauᴋpoᴋ ilâ ilupsingne katsungainermik, akiornermiglo, sinaunganermiglo, erᴋsinermiglo, ᴋilanârnermiglo, ilungertornermiglo, pidlarningnermiglo; tamakkonunga tamainut nelunailivose, ilangiutilaunginapse idluitulinermik taipsominga.

¹² Taimaimat, aglagvigilauralloarapse, idluitulijoᴋ imna pivlugo pingitunga, (atâtangalo) idluitomik pijaunertoᴋ pivlugo pinginivungatauᴋ; ilipsingnulle nelonairᴋovlugo ilungertornivut pivluse, Gûdib takoane.

¹³ Tamanna pivlugo manigortaulerpogut manigortaunipsingnut. Anginersamigle ᴋuviasûteᴋaluarpogut Titusib ᴋuviasungninganik; tâpsoma anerninga nakoᴋsijaungmat ilûnase pivluse.

¹⁴ Tâpsomunga oᴋautigilaurapse nertorluse, (tamanna) kangusûtigingilara; sôrlole oᴋausikka ilûnatik ilipsingnut mikseᴋârtôngmatta, taimaktauᴋ mikseᴋârtôgivoᴋ nertordlernivut ilipsingnik Titûsemut.

¹⁵ Tâpsomalo angijomik ômamut nagligivâse, ilûnase nâlengnipsingnik erᴋaigangame, sivôravluselo sajukluselo ilaliulaurapsiuk.

¹⁶ ᴋuviasukpunga, sungertûtigijungnarapse ilûnâne.