II Korintemiunut 6 - Labrador Inuttitut Heritage Bible

Paulusib Korintemiut kaiblarpait, Gudib ᴋaitanginik saimanartunik atutsiarᴋovlugit, illauᴋonagillo okpingitunut.

¹ Uvagulle piniarᴋattaugapta kaiblarpapsetauᴋ Gûdib saimarsautânik sulinase pilerᴋonase.

² (Imâk oᴋarmat Tussalauᴋpagit neliutome ᴋuvianartome, piulilauᴋpagillo uvlorme piulijauvingme. Âhâk mâna ᴋuvianartûb neliuninga, mâna uvloᴋ piulijauvik neliutivoᴋ.)

³ Taimailiorpogut sinaungajutaulugata kimut; kivgartornivut oᴋarnerlôtauᴋonago;

⁴ Ilinganernele tamaine saᴋᴋijârluta Gûdib kivgangititut, angijomik ᴋenuersârluta, kappiasugangapta, ajoᴋsarangaptalo, kiksarangaptalo,

⁵ Annaulertaujarangaptalo, parngnanairsimavingmêtarangaptalo, pikablâjaujarangaptalo, senajarangaptalo, pigârangaptalo, êsingitarangaptalo;

⁶ Ikliguktailinermik saᴋᴋertitsivluta, illisimanermiglo, kamangitsertornermiglo, pitsiarnermiglo, Anernermiglo ajunginermik, naglingnermiglo takkormôjuitomik;

⁷ Mikseᴋârtomik oᴋauseᴋarluta, Gûdemit pitsartuneᴋarluta idluarnerub pingit sakkogivlugit talerpiptigut saumiptigullo;

⁸ Nertortaujarangapta nachogijaujarangaptalo, ajortônerartaujarangapta ajungitônerartaujarangaptalo; uivêriklertutitut okpernaralloartogut;

⁹ Takorngartutitut takorngangikalloartogut; toᴋolertutitut, ahâglo inôvogut; sugiartaujutitut toᴋotaungikalloartogulle;

¹⁰ Kiksartutitut ᴋuviasutsainartogulle; aklujutitut, unuktunik akluititsigalloartogut; peᴋangitutitut, tamainigle piksaᴋaralloartogut.

¹¹ Korintemiut okoᴋse! ᴋanivut angmadlarput ilipsingnut, ômativut issiviput.

¹² Uvaptingne nimniortitaungilase, ilipsele nimniortitsivosê (uvaptingnik) ômatipsingne.

¹³ Akkiniaritsele neligêktomik, (sôrlo ᴋitorngamnut oᴋâlavunga), ilipsetauᴋ taimâk (ômatipsingnik) issivititsiniaritse.

¹⁴ Okpingitut illaginiarasigik idluangitomut. ᴋanoᴋ idluarnek idluinerlo illagêktuksaungmanîk? ᴋanorlo ᴋaumajoᴋ tâᴋsoarlo illagêkpâk?

¹⁵ ᴋanorlotauᴋ Kristûselo Bêlialelo adsigêkpâk? Okpertorlo okpingitorlo ᴋanoᴋ illagêkpâk?

¹⁶ ᴋanorlo Gûdib iglunga Gûdiungitullo atausiksauvâk? Ilipsele Gûdib ômajub iglogivâsê, Gûde imâk oᴋarmat: Inigijomavakka arvertarlungalo ilungine, Gûdeojomavlungalo tâpkonunga, inuᴋotiginiarpakkalo.

¹⁷ Taimaimat anititse taipkonangat, avisârlugillo, Nâlegaᴋ oᴋarpoᴋ, maᴋojungnartorlo aktorniarasiuk; uvangalo ilalioromavapse.

¹⁸ Atâtaginiarpapsingalo, uvangalo ernerivluselo panigijomavapse, taimâk Nâlegaᴋ ajugaᴋangitoᴋ oᴋarpok.