II Korintemiunut 5 - Labrador Inuttitut Heritage Bible

Paulusib nerriungninga nâksaungitomik pinnarnartomik. Kajungertitauninga Kristûsib naglingninganut.

¹ ᴋaujimavogulle, igluvut (timivut) nuname atortoᴋ asserorpat, igloᴋarapta Gûdemut igloliangomajomik, iglomik aggangnu-ungitoᴋ senamajomik, nâksaungitomik ᴋilangme.

² Tamannatauᴋ anersaumitigivavut kajungilârluta ulliktaujomavluta igluksaptingnut ᴋilangmit pijomut.

³ Naipitaujomârupta annorârsimavluta, ussingalugata (timeᴋarluta).

⁴ Uvagut iglomêtogut (timemêtogut) anersaumigapta, oᴋumaidluta; annorairomanginapta, ᴋalinetâromavlutale pivogut, toᴋojuksaᴋ êjauᴋovlugo ômanartomut.

⁵ Uvaptingnigle taimailertitsjoᴋ tagva Gûde; tâpsomalo Anernermik nelunaikutaksaptingnik tunitsivigivâtigut.

⁶ Taimaimat sivôrangitsainarpogut, ᴋaujimavlutalo, Nâlekamit apsimagapta timemêtiluta.

⁷ Okpernerme arvertarapta, takolugatalo.

⁸ Sivôrangilagulle; timelo ᴋemaklugo angergarneᴋ Nâlekamut ᴋuviaginersarivavut.

⁹ Taimaimat najoruptigolônêt avisimaguptigolônêt, ilinganasuarpogut tâpsomunga ᴋuviagijaujomavluta.

¹⁰ Ilûnata saᴋᴋijartuksaugapta Kristûsib erᴋartuiviksangata sângane, ilûnata atunit akkiniartaulerᴋovluta iliorniptingnik timeme inôtiluta, ajungitomiglônêt ajortomiglônêt.

¹¹ Nâlegak tagva nâlektaujariaᴋartoᴋ ᴋaujimagaptigo inuit okpertinasuarpavut, ᴋaujijauvogulle Gûdemut. Nerriukpungale ᴋaujijaugaptatauᴋ issumapsingnut.

¹² Ama nertorᴋonata uvaptingnik ilipsingne, nertordlerutiksaᴋartipapsele pivluta, akkiniarutiksaᴋarᴋovluse nertôtijunut ᴋalinermikut ajungitôjârtunik, ômatib pigingitanginik.

¹³ Pinialuadlaruptale, tamattominga Gûde pivlugo pivogut; nâmatuinartuligupta, tamattominga pivluse pivogut.

¹⁴ Kristûsib naglingningata taimâk kajungertingmatigut. Issumaᴋarapta imâk: Atauseᴋ tamaita pivlugit toᴋungmat, ilûnatiktagva toᴋovut.

¹⁵ Tâpsomalo tamaita toᴋotigivait, inôjut kingorngane nangminermingnut inôniaᴋonagit, tâpsomungale pivlugit toᴋolauᴋtomut makisimangmijômullo.

¹⁶ Mânamit tagva kinamik illitarsingilagut uviningmit; Kristûse illitarilauralloaraptigo uviningme, mâna taimâk illitarijungnairpavut.

¹⁷ Taimaimat, Kristûsemêtoᴋarpat, tâmna nutângortitauvoᴋ; pitoᴋaᴋ itsungnairpoᴋ, ilûnane nutângorsimavoᴋ.

¹⁸ Tamaitale tamakkoa Gûdemit pivut, tâpsoma ullapirsarmatigut ingminut Jêsuse Kristûsikut, kivgartornermiglo pitiluta ulapirsainartomik oᴋâlaᴋojijomik.

¹⁹ Gûdib Kristûsemêdlune silaᴋsûb inungit ulapirsarmagit ingminut, ajorninginit issumagijungnaivigilugit, ulapirsainartomiglo ilumertiluta oᴋâlaᴋovâtigut.

²⁰ Taimaimat tilijaumajôvogut Kristûse simerdlugo, Gûdib uvaptigut kaiblarmase, tagva ᴋenuvogut mâna Kristûse simerdlugo: Gûdemut ulapirsartauleritsetôᴋ.

²¹ Ajortomik ᴋaujimangitoᴋ ajortungortilaungmago pivluta; uvagut tâpsomane idluartungortitauᴋovluta Gûdib sângane nâmagijaujomik.