II Korintemiunut 4 - Labrador Inuttitut Heritage Bible

Paulusib manigorninganik kappianartome.

¹ Taimaimat, taimaitomik kivgartôteᴋarapta, nâpkoarijaunivut maliklugo merngortorniangilagut;

² ᴋangunartunigle ijersimajunik ulloreasukpogut, nelangaitomiglo iluseᴋangilagut, Gûdiblo oᴋausingit asserᴋotsitingilavut; mikseᴋârnermigle saᴋᴋertitsiluta perᴋovogut uvaptingnik inuit ilûnatik erᴋarsautinginut Gûdîb sângane.

³ Oᴋautsinik tussarnertunik oᴋâlanivut mattumakpatta, mattumavut tagva assioniartune:

⁴ Silaᴋsûb tamattoma Gûdingata okpingitut taipkoa issumangît takpêtilauᴋpait, oᴋautsit tussarnertut Kristûsemik, Gûdib adsingata pinnarnarninganik, ᴋaumaningat ᴋaumaᴋonago taipkonunga.

⁵ Nangminek uvaptingnik oᴋâlanginapta, Jêsuse Kristûsele (oᴋautigivavut) Nâlegaujoᴋ, uvagulle kivgaujogut ilipsingnut Jêsuse pivlugô.

⁶ Gûdele, ᴋaumajomik nuerᴋojijoᴋ tâᴋtomit, ômatiptingne ᴋaumarsaivoᴋ, uvaptigut nellonarungnaititauᴋovlugo illitarsineᴋ Gûdib pinnarnarninganik Jêsusib Kristûsib sângane.

⁷ Pivianartovaksoarle tamanna pigivavut illuleᴋutine machainarne, pitsartunersoaᴋ Gûdemit perᴋovlugo, nangminiptingnillo pinane.

⁸ Ilûnâne kappiasuktitauvogut, sivôranatale; sivôragalloarpogut mungunganatele.

⁹ Unangmijauvogut, ᴋemaktaunatale; ochotitauvogut, nungutaunatale.

¹⁰ Nâlekablo Jêsusib toᴋâtauninganik timimiutaᴋatsainarpogut, Jêsusib ômarningatauᴋ saᴋᴋijârᴋovlugo timiptingne.

¹¹ Uvagulle inôjogut toᴋomut pititautsainarpogut Jêsuse pivlugo, Jêsusib ômarningatauᴋ saᴋᴋijârᴋovlugo uviniptingne toᴋojuksame.

¹² Toᴋo tagva pitsartudlarpoᴋ iluptingne, ômarnerle ilupsingne.

¹³ Anernermigle taipsominga okpertitsijomik peᴋarapta, aglait maliklugit: “Okperama oᴋâlavunga”; uvaguttauᴋ okperapta, oᴋâlagivogut;

¹⁴ Nelunginapta, Nâlekamik Jêsusemik tupaktitsijûb uvaguttauᴋ tupaktitsomârivâtigut Jêsusikut, saᴋᴋertitsomârpâtigullo ilipse illagiluse.

¹⁵ Tamaita taimaidlarmatta ilipse pivluse, saimanersoaᴋ unuktut ᴋujalininginut angidlarᴋovlugo, Gûde angijomik nertortauᴋovlugo.

¹⁶ Taimaimat merngortorniangilagut, inuptale ᴋalininga asseroralloarpallônêt, ilumêtorle uvlut tamaita nutângortitaulerpoᴋ.

¹⁷ Kappiasungnipta mâne oᴋidlutik mânakut anigortut, piksarsiormatigut pinnarnartoᴋsoarmik neleᴋangitomik nâksaungitomik;

¹⁸ Uvagut, takuksaujunik pingitogut, takuksaungitunigle. Takuksaujut nâksaungmatta; takuksaungitulle naggateᴋangilat.