II Korintemiunut 3 - Labrador Inuttitut Heritage Bible

Oᴋautsinik tussarnertunik oᴋâlajub kivgartorningata ânanaunersauninganik ajoᴋertutsinit Môsesib perᴋojanginik.

¹ Ama nertôtilerpitâ nangminiptingnîk? Illangititullônêt pijariaᴋarᴋitâ aglangnik nertornarneraijunik ilipsingnut, aglangniglônêt nertornarneraijunik ilipsingnît?

² Ilipse aglagivapse aglaksimajunik ômatiptingne, unungnut tamainut illitarijaujunik atuartaujuniglo;

³ Nelonarungnaititaujose, Kristûsib aglagingmase, idluarsarsimajose kivgartorniptigut, aglaksimajose aglaumu-ungitoᴋ, Gûdible ômajub Anerninganut; aglagvingnut ujaraujunu-ungitoᴋ, aglagvingnulle uviniojunut, tagva ômatinut.

⁴ Taimaitomigle tatteᴋarpogut Gûdemut Kristûsikut.

⁵ Uvagut sumiglônêt issumasijungnangilagut nangminiptingnik; sappinginivulle Gûdemit pivoᴋ.

⁶ Tâpsoma sappingitipâtiguttauᴋ kivgartorᴋovluta Testamentetâmut; aglaksimajunu-ungitoᴋ (perᴋojanut), Anernermulle; aglaksimajut (perᴋojat) toᴋotsingmatta, Anernerle ômartitsivoᴋ.

⁷ Kivgartornerle imna toᴋonartoᴋ aglaksimajunêtoᴋ, ujarᴋanut tittersimajunêtorlo ᴋaumaringmat; Israêliblo ᴋitorngangit Môsesib kênanganik takojungnangimatta tâpsoma kênangata ᴋaumaninga pivlugo, sorairtuksaugalloartoᴋ,

⁸ Angiluartomik tagva kivgartorneᴋ Anernermik tunijijoᴋ pinnarnarnersaunajangilâᴋ?

⁹ Kivgartorneᴋ erᴋartortaunermik oᴋâlajoᴋ pinnarnarmat, piluartomik kivgartornek idluarnermik oᴋâlajoᴋ pinnarnartoᴋarpoᴋ anginersavaksôjomik.

¹⁰ Pinnarnartitaujoᴋ taimna (sorairtuksaᴋ) pinnarnangimat sôrlo, pinnarnartoᴋsoaᴋ tamanna pitjutigilugo.

¹¹ Sorailauᴋtoᴋ pinnarnalaungmat, angiluartomik sorairniangitoᴋ pinnarnadlarniarpoᴋ.

¹² Taimaitomik tatteᴋarapta, sivôrajuidlarluta oᴋâlavogut,

¹³ Môsese malingnago kênaminik tâlutsêjoᴋ, Israêlib ᴋitornganginut takojauᴋonago sorairtub naggatâ.

¹⁴ Taipkoale issumangit mangaitisimavut. Sulle uvloᴋ tamanna tikidlugo tâlutamik tamattominga mattuêrsimangimatta Testamentitoᴋâb aglangit atuarpagit; tâlutaᴋ tamanna Kristûsikut sorairtilugo.

¹⁵ Uvlorlo tamanna tikidlugo, Môsesib aglangit atuartaujarangata, ômatingit tâlutsersimavut.

¹⁶ Sâgiarpattale (Israêlitit) Nâlekamut, tagva tâlutaᴋ pêrtaunajarpoᴋ.

¹⁷ Nâlegarle Anerniovoᴋ; nanêtarangalle Nâlekab Anerninga, tagvane kivgaujoᴋangilaᴋ.

¹⁸ Ilûnatale kênaptigut tâlutaᴋangitogut, sôrlo tachartôtikut Nâlekab pinnarnarninga tautukpavut, ablatsângortitaulerlutalo adsigilugo, pinnarnartomit piluta pinnarnartomut, Nâlekamit Anerniojomit (taimaititauvluta).