II Korintemiunut 2 - Labrador Inuttitut Heritage Bible

Idluitulijib ᴋaᴋialilauᴋtub utertitauᴋojauninganik. Kristûsemik oᴋâlanerub pitsartuninganik.

¹ Uvamnele imâk issumasimalauᴋpunga, kiksarlunga ama tikitsomanase.

² Kiksartikupsele, kia ᴋuviasuktinajarpângâ, kiksartitama pingipangâ?

³ Tamattomingalo aglagvigilauᴋpapse, tikikuma kiksautigijomanagit ᴋuviasûtigijaksaralloakka; ᴋaujimagapse ilûnase, ᴋuviasungnera ᴋuviasûtigigapsiuk tamapse.

⁴ Angijomik kiksarlunga ômatipkut kappiaktoarlarmalo ᴋugviudlarlungalo aglagvigilauᴋpapse, kiksartitsomavluse pinanga, naglingnerle pijara, ilipsingnut piluartoᴋ, tukkisijauᴋojomavlugo ilipsingnut.

⁵ Kiksartitsijoᴋarpalle, taipsoma kiksartilaungilânga (kissima) ilûnasele kiksartinivâse; sugaluluartomik pasijomanase (taimâk oᴋarpunga).

⁶ Taimaitoᴋ unuktunut taimâk pidlartaungmat, nâmakpoᴋ.

⁷ Mânale igluanut issumagijungnairaksarinersarivase manigorlugolo, kiksavaksoadlarnermut sutairᴋonago.

⁸ Taimaimat kaiblarpapse, naglingnise tâpsomunga tukkisijaule.

⁹ Tamanna pivlugotauᴋ aglagvigivapse, tukkisijomavlugo idluarnise, nâlengmangâpse sumiglônêt oᴋautjaujarangapse.

¹⁰ Issumagijungnaivigijasele uvangatauᴋ issumagijungnaivigivara; uvangatauᴋ issumagijungnaivigigupko, issumagijungnaivigivara ilipse pivluse Kristûsib sângane;

¹¹ Sâtanasemut sâlagijauᴋonata; tâpsoma issumalungninga nelunginaptigo.

¹² Troasemulle pigama, oᴋautsinik tussarnertunik Kristûsemik oᴋariartorlunga, upkuarmiglo angmartaujoᴋaralloartilugo Nâlekame,

¹³ Tarniga inilangajungnangilaᴋ, ᴋatangutiga Tituse nagvânginapko; sorairutiksamigle pivakka, Mazedôniamut aularlunga.

¹⁴ Gûdele ᴋujagiviktaule! ajugautitsainarmatigut Kristuseme, tâpsominga illitarsineᴋ tippigiktotut ᴋaujitingmago nunane tamaine, uvagut atorluta.

¹⁵ Kristûsib tippigiksautigingmatigut Gûdemut, piulijaujomârtunelo assiojomârtunêlô:

¹⁶ Tâpkonunga toᴋosungnipogut toᴋonartomik; ipkonungale inôserungnipogut ômanartomik. Kinalo taimailingavlune ajungilâᴋ?

¹⁷ Gûdib oᴋausingit asserᴋotsitilugit pinginapta, asserᴋotsititsijutitut ipkotitunaᴋ unuktutitut; nelâgôrlutale Gûdemillo Gûdiblo sângane oᴋâlavogut Kristûsemê.