II Korintemiunut 13 - Labrador Inuttitut Heritage Bible

Paulusib pidlarnigomanane kaiblarpait ᴋaᴋialerᴋovlugit.

¹ Mâna pingajuanik tikiniaruma ilipsingnut, tagva maggûk pingasullônêt kigligiudsijut oᴋautigijanginut ilinganerit sunatuinait soᴋosijuititauniarput.

² Sivorngagut oᴋautilauᴋpapse, ama sivorngagut oᴋautipsârpapse, najorluse sôrlo; mânalo apsimavlunga aglagvigivakka sivorngagut ajortulilauᴋtut, assingillo ipkoa tamaita, imâk: tikingmiguma, pidlarniktailiniangilanga.

³ Pinasuarapse ikpigititaujomavluse tâpsominga, uvapkut oᴋâlajomik, tagva Kristûsemik; tâmna akunapsingne sangêngitoᴋ, pitsartudlartorle akunapsingne.

⁴ Tâmnalo kikiaktortaugalloarame sangênerme, omârivoᴋ Gûdib pitsartuningane; uvaguttauᴋ tâpsomane sangêgalloartogut, inôᴋatigivavut Gûdib pitsartuninganut akunapsingne.

⁵ Nautsertoritse nangminipsingnik okpernermêngmângapse, kiglisiniaritse ilipsingnik. Ubvalo nangminipsingnik illitaringilasê, Jêsusib Kristûsib ilupsingnêninga maluginagô? Atungitutitunilungikupse.

⁶ Issumavungale ᴋaujimaniarapse uvagut atungitutitun-itsanginapta.

⁷ Gûdele tuksiarvigivara, sumiglônêt piungitulerᴋonase; uvagut atortutitut saᴋᴋeromavluta pingilanga, ilipsele ajungitulerᴋovluse, uvagullo sôrlo atungitutitut-erᴋovluta.

⁸ Mikseᴋârneᴋ akkerartorungnangilavut, piniarlutale mikseᴋârneᴋ pivlugo.

⁹ ᴋuviasukpogulle, sangêtarangapta, ilipsêlo pitsartuneᴋarupse. Tamannalo ᴋilanârutigivavuttauᴋ, tagva nâmaktungortitaunise.

¹⁰ Taimaimat aglakpakka ukkua apsimavlunga, erᴋartuijomananga najulerupse, pitsartuneᴋ Nâlekab tunijanga uvamnut idluarsaijutiksaᴋ asserornangitorlo atorlugo.

¹¹ Tagva, ᴋatangutikka, ᴋuviasugitse, nâmaksiniaritse, manigortigêgitse, adsigêktomik issumaᴋaritse, ullapirsauteᴋaritse; taimâk naglingniktub ullapirsaijublo Gûdib illaginiarpâse.

¹² Salutiᴋatigêgitse salutimut ivjornaitomut. Ivjornaitut ilûnatik salutipâse.

¹³ Nâlegapta Jêsusib Kristûsib saimaningata, Gûdiblo naglingningata, Anernerublo ajunginerub illagêngningata illagilise ilûnase. Amen. Aglait aipaingit Korintemiunut aglaktaumavut Filippimit Mazedôniamêtomit. Titûsib Lukasiblo neksalauᴋpait.