II Korintemiunut 12 - Labrador Inuttitut Heritage Bible

Tatamnartomik Paulusib takotivioninganik sangêninganiglo. Naglingninganik nelâgôrtomik.

¹ Nertôtinek atornangigalloarpoᴋ uvamnut, takotitjutille nelonarungnaititaunerillo Nâlekamit pijut oᴋautigijomavakka.

² Inungmik illitarsivunga Kristûsib okpertoᴋotinganik; tâmna jârit 14 it mattoma sivorngagut, (timiminêlaungmangât nelovunga, timiminêlaungimangâllônêt nelovungatauᴋ, Gûdib kissime nelungilâ,) tâmna ᴋilait pingajuanut pititaulauᴋpoᴋ.

³ Inuk tâmna illitarivara, (timiminêlaungmangât timiminêlaungimangâllônêt nelovunga, Gûdib nelungilâ).

⁴ Tâmna pititaulauᴋpoᴋ Paradîsemut, tussâvorlo oᴋautsinik oᴋauserijaujungnangitunik, inûb kialônêt oᴋauserijungnangitanginik.

⁵ Taimaitomik nertôtijomavunga, nangminimnigle nertôtijomangilanga, sangênimnik kissianik.

⁶ Nertôtijomagumalo uvamnik, silaitotut ilinganajangilanga; mikseᴋârtomik oᴋarajarama. Tamattomingale pingilanga, idluarnersaunasugiklertoᴋarᴋonago uvamnik, takojaminit tussartaminillo pivlunga.

⁷ Ilingaᴋonangalo pingijaidlarnermut takotitjutit ussornarnartut pivlugit, kaputimik pititsiviovunga uvinipkut, tagva Satanasib tilijanganik sugiartimnik, pingijaidlarᴋonanga.

⁸ Tamanna pivlugo pingasuertorlunga Nâlegaᴋ ᴋenuvigilauᴋpara, ᴋemaktaujomavlunga taipsomunga.

⁹ Oᴋautilauᴋpângalo: Nâpkiningnera nâmagiuk, pitsartunera ajugaᴋangitôngmat sangêtune. Taimaimat sangênera nertôtigijomanersarivara, Kristûsib pitsartuninga ineᴋarᴋovlugo uvamne.

¹⁰ Taimaimat ᴋuviasukpunga, sangêdlarangama, mitautigijaujarangamalo, ajoᴋsadlarangamalo, unangmijaulerangamalo, kappiasuktitaujarangamalo Kristûse pivlugo. Sangêtarangamale pitsartudlarpunga.

¹¹ Silaitôlerpunga nertôtigama uvamnik; taimailiortilauᴋpapsinga. Ilipsingnut nertortaujuksaugalloarama; mingnersaunginama Aposteliojoᴋsoarnit ipkonangat, suksaungikalloarlunga.

¹² Apostelib nelunaikutangit akunapsingne saᴋᴋijârmatta ila, angijomik ᴋenuersârnermik, nelunaikutanik, tatamnartuniglo, pitsartudlartuniglo piniarnernik illaᴋarlutik.

¹³ Suna pivlugo mingnersauvisê illagênit assipsingnît? Tamanna pivlugo kissiane, piksakka pivlugit oᴋumaititsilaunginama ilipsingnik. Idluitulinimnit tamattomangat issumagijungnaisinga.

¹⁴ Ahâk pingajuanik tikiniarsinnalerpapse oᴋumaititsijomananga ilipsingnik; pipsingnik pinasuanginama, ilipsingnigle. ᴋitorngat katersoijuksaungimatta perᴋutinik angajoᴋâmingnut, angajoᴋalle ᴋitorngamingnut.

¹⁵ Uvangale tunijijomavunga ᴋuviasuklunga, tunijaujomavlungalo tarnise pivlugit; angijomik nagligigalloarapse, naglingnikitauvunga.

¹⁶ Unêlle, (nangminek) oᴋumaitilaungigalloarpapsegôᴋ, pingitsertordlungale terliarluse tigunerpapsegôᴋ (assipkut).

¹⁷ Ilipsingnut tililauᴋtama illanganullônêt aᴋsârtautitsilauᴋîk ilipsingnîk?

¹⁸ Tituse kaiblalauᴋpara, ᴋatangutillo ilangat ilauᴋolauᴋpara tâpsomunga. Titûsele aᴋsârnilauᴋâ sumik ilipsingnît? Anernerme atautsime arvertalaungilagût? atauserlo tupjalaungilavût?

¹⁹ Ama tagva akiorasugivitigût? Oᴋâlavogut Kristûseme Gûdib sângane: tamakkoningale tamainik, nagliktakka, âᴋiktaujutiksapsingnut (pivogut).

²⁰ Sivôragama, tikikuma, ilipse pijomajaptut naipinianginapse, uvangalo pijomangitapsitut naipiniarapsinga; akunapsingnêtoᴋarniarmallo akkerartortigêktunik, anerutjijuniglo, ningartuniglo, aivajuniglo, terliaᴋataijuniglo, kiggoijuniglo, piojoridlartuniglo, pikablartuniglo.

²¹ (Sivôravungalo) piuluatangititauniarama pivluse, tikingmiguma, kiksartuksauniarlungalo unuktut idluitulilauᴋtut pivlugit, ᴋaᴋialilaungitullo maᴋojungnartulinerilauᴋtatik, assiniarnerilauᴋtatiglo illoᴋeudlarnerilautatiglo pivlugit.