II Korintemiunut 11 - Labrador Inuttitut Heritage Bible

Pauluse akiogannerpoᴋ, ingminiglo nertôtijariaᴋartitauvoᴋ.

¹ ᴋanoktôk issumaginiarasinga silaigotoluârsungnimnik; nelungilanga, issumaginiangitapsinga tamattominga.

² Ilungertorama pivluse Gûdib ilungertûtânut. Katitinapse angumut, tagva Kristûsemut, uigasungmik ivsornaitomik âtsivigijomavlugo.

³ Sivôravungale, sôrlo ᴋuglugiab pingitsertorlune Eva uivêridlalaungmago, taimâktauᴋ issumase asserorniarasugilugit issumalingasuernermit Kristûsemêtomit.

⁴ Tikitise Jêsusemik assianik oᴋâlakpat, oᴋâlatigilaungitaptingnik; assianiglônêt Anernermik pigupse, pilaungitapsingnik; assianiglônêt oᴋautsinik tussarnertunik, illaliulaungitapsingnik, taimaitoᴋ kamaginajartase ilâ!

⁵ Apôsteliojoᴋsoarnit ipkonangat mingnersaunasuginginama uvanga.

⁶ Oᴋâlaloringikumalônêt, ᴋaujimanermigle ajoᴋsangilanga. Ilâ ilûnainik ᴋaujimagalloarpapsinga.

⁷ Ubvalo idluitulilauᴋpîk, uvamnik nikarnarsârama, ilipse opigijauᴋovlusê? Akkeᴋangitomik oᴋâlavigilaurapse oᴋautsinik tussarnertunik Gûdemit pijunik.

⁸ Illagêt assise aᴋsâlauᴋpakka akkilertauvlunga taipkonunga, ilipse kivgartoromavluse.

⁹ Najorluselo ajoᴋsarama, pagvisâlaungitunga ᴋimiglônêt, ᴋatangutigêt Mazedôniamit pijut ajortamnik tunijilauᴋput; nangminerlo ilinganasualauᴋpunga ilûnâne pagvisâromanase, taimâktauᴋ sulle pitsainaromavunga.

¹⁰ Nelâgut Kristûsib mikseᴋârninga ilumnêngmat, nertornarnera tamanna soᴋᴋosertitauniangilaᴋ Achajâb nunangine.

¹¹ Sôᴋ taimâk? Nagligosunginama ilipsingnîk? Gûdib ᴋaujimavânga.

¹² Piniarnerale piniaromaneralo, tamanna pivlugo piniarutigivara passitiksairomavlugit patsitiksarsiortut, nertôtigijamingnut adsigijomavluta pijut.

¹³ Apostelit taimaitut nelangaitut sagloᴋitsivlutik ajoᴋertuijôvut, Kristûsemut Aposteliojârlutik.

¹⁴ Tamannalo tatamnangilaᴋ; Sâtanase nangmineᴋ saᴋᴋijârmat sôrlo ᴋaumajûb Engelingatut.

¹⁵ Taimaimat kivgangittauᴋ opinaratik idluarnerub kivgangititut ilinganasuarput takkormôrlutik; piniarnitik maliklugit naggateᴋaromarput taipkoa.

¹⁶ Ama oᴋarpunga, silainasugiklertoᴋarane uvamnik; taimainasugigupsingale, silaitotut taimaitotut illaliorsinga, uvangatauᴋ nertôtiluârsulerᴋovlunga.

¹⁷ Oᴋautsikka makkoa Nâlekab oᴋauseringilait, sôrlole silainermut atorpakka, nertôtigama.

¹⁸ Unungmatta nertôtijut uviningmingnut, nertôtijomagivunga uvangatauᴋ.

¹⁹ Silaitut ᴋunutigitsanginapsigik, nangmineᴋ silatujoᴋsôgapse.

²⁰ Erᴋasungilase kivgautitaugupse, nungutaugupse, ivajaijaugupse, tapagijaugupse, kênapsigut tigluktaugupse.

²¹ Nertornangitomik oᴋarpunga, sôrlo sangêlertutitun-idluta. Assimale nertôtijutiksaᴋarningit, (silaidlunga oᴋarpunga) uvangatauᴋ nertôtijutiksarigivakka.

²² Taipkoa Ebrêeriovut, uvangatauᴋ. Israêlitiovut, uvangatauᴋ. Abrahâb kinguvârivait, uvangatauᴋ.

²³ Kristûsemut kivgauvut: silaitotut oᴋarpunga: pinersaugalloarpunga uvanga. Senanersaulauᴋpunga (taipkonangat), unatarnersaulauᴋpunga, unorᴋejanginiglo parngnanairsimavingmêlauᴋpunga, nangianartunêᴋattalauᴋpunga toᴋoviksauᴋôrtune.

²⁴ Jûdinut issaᴋajaulauᴋpunga tellimairtorlunga issaᴋanernik 40 nik, atauseᴋ pinago.

²⁵ Pingasuertôrlunga annaulertauvunga annautanut, atausisiarlunga ujarᴋanut milortauvunga, pingasuertorlunga umêjalauᴋpunga, imarbiub itininganêlauᴋpunga uvlorlo unnuarlo nâvlugik.

²⁶ Ingergalauᴋpunga unuktunik: nangianartomêlauᴋpunga kôksoarne, nangianartomêlauᴋpunga inuartune, nangianartomêlauᴋpunga inuᴋatimne (Jûdine), nangianartomêlauᴋpunga nelojune, nangianartomêlauᴋpunga iglogasangne, nangianartomêlauᴋpunga inuᴋajuitome, nangianartomêlauᴋpunga imarbingme, nangianartomêlauᴋpunga ᴋatangutine nelangaitune.

²⁷ Oᴋumaitunik unuktunik tukkiseᴋattalauᴋpunga senanermelo, pigârnermelo, kângnermelo imerungnermelo, nerritailiᴋattarnermelo, ᴋeujanermelo, annorâᴋanginermelo.

²⁸ Assingillo pivaktut tainagit; ilâ, uvlut tamaita pagvisârtaugama (inungnut), issumajârutigijaᴋattarapkillo illagêt ilûnaita.

²⁹ Kina sangêtoᴋ sangêtjutigingilarâ? kina sinaungasartaujoᴋ ônarsijutigingilarâ?

³⁰ Nertôtijariaᴋarumale uvamnik, sangêneranertôtigijomavara.

³¹ Gûdib, Nâlegapta Jêsusib Atâtangata ᴋaujimavânga saglunginama; tâmna nertortaule issoᴋangitomut.

³² Damaskusemêtilunga, ataniub Arêtasib angajoᴋângortitangata Damaskusemiut iglugasaksoangit udjertortauᴋovait, tigujomavlunga.

³³ Igalâkulle ᴋarmaᴋsûb silatânut ningititaulauᴋpunga amârgaujaᴋsoarmut, ᴋemâvungalo agganginit.