II Korintemiunut 10 - Labrador Inuttitut Heritage Bible

Paulusib akiorninganik akkerartortiminik. Pitsartuningata sunauninganik.

¹ Uvangale Pauluse kaiblarpapse Kristûsib ᴋenuêninganut kamangitsertorninganullo, uvanga takupsingne nikanarsârtunga apsimanimnele ilerasungitunga ilipsingnut.

² ᴋenuvungale, takupsingne pijariaᴋarᴋonanga ilerasunginermut, iktoriktainermiglo atoriaᴋarᴋonanga, sôrlo oᴋautaugama illangit pivlugit, tâpkoa uvinik maliklugo arvertarasugingmatigut.

³ Uviningme inôgalloarapta, sorsungniangilagut uvinik maliklugo.

⁴ Sakkuvut sorsungnermut atortavut uviningmit pingimatta, pitsartûneliksôvulle Gûdib sângane ungalujijoᴋsuit asserorlugit.

⁵ Issumalungnerit asseroraptigik, ilûnaitalo piojorinerit akkerartortut Gûdemik illitarsinermut, erᴋarsautiâluillo tamaita parngnanairpavut Kristûsemik nâlektilugit;

⁶ Nâlengitullo tamaita akkiniarlugit opalungairsimavogut, nâlengnise nâmaksikpat.

⁷ Kalineᴋ kissiat takunârpisiûk? Neliat tatteᴋarune perᴋutaunine Kristûsemut pitjutigilugo, tâmna issumaᴋarletauᴋ ingmine, sôrlo nangmineᴋ perᴋutaungmat Kristûsemut, taimâktauᴋ uvagut perᴋutaugapta Kristûsemut.

⁸ Anginersamiglônêt nertôtijomaguma pitsartuniptingnik, Nâlekab tunijanganik uvaptingnut, âᴋiktauᴋovluse asserortauᴋonaselo, kangusungniarajatsangilanga.

⁹ Taimâgle oᴋarpunga, issumalerᴋonase, aglangnut kappiasuktitsinasugilunga ilipsingnik.

¹⁰ Oᴋartoᴋarmat: Aglait oᴋumaidlalarmiglo ipiktoᴋsôvut; inualle najortiogune, nikanarpoᴋ; oᴋausingillo nachonarput.

¹¹ Taimaitoᴋ issumaᴋarmile imâk, sôrlo apsimatiluta oᴋausiptigut aglangne pivakkapta, taimaktauᴋ piniarungnarapta najorluse.

¹² Ipkonunga ingmingnik nertôtijunut ilingatiluta adsiotilutalo sapperpogut; ipkoa ingmingnênaᴋ ôktûtigivlutik ajunginasugivlutiglo pigamik, silatulungilat.

¹³ Uvagulle angiluartomik (ôktûteᴋarata sôrlo) nertungilagut nangminiptingnik, kissianele ôktût maliklugo, Gûdib kiglilerviksauᴋojanga uvaptingnut, ilipsetauᴋ tikidluse.

¹⁴ Ungasiluadlartomut pinginapta, inorluse perᴋojaujutitut; ilipsingnulletauᴋ tikisimavogut oᴋautsit tussarnertut Kristûsemik oᴋâlatigilugit.

¹⁵ Angiluartomigle nertungilagut nangminiptingnik assipta senajangit pivlugit, nerriukpogullo okpernise ilupsingne aglisivalliakpat, piganneromavluta ilusioᴋojavut maliklugo;

¹⁶ Oᴋautsillo tussarnertut oᴋautigilugit ungatipsingnêtunuttauᴋ, assipta senajangit pijarêrsimajullo pivlugit nertoromanata.

¹⁷ Nertôtijomajorle Nâlekame nertorle.

¹⁸ Nangminerminik nertortoᴋarune, nâmagijaujutigingilâ, Nâlekable nertorpago kissiane.