II Korintemiunut 1 - Labrador Inuttitut Heritage Bible

Paulusib ᴋujalininganik Gudib ikajorninga oᴋumaitune pivlugo. Akiorninganiglo sangusarainerartaunine pivlugo.

¹ Pauluse, Jesusib Kristûsib Apôstelinga, Gûdib pijomajanganut, ᴋatangullo Timôteuse (aglakpoguk) Gûdib illagêktoᴋotinginut Korintemêtunut, okpertunullo tamainut Achâjame ilûnâne.

² Gûdib Atâtapta, Nâlekablo Jêsusib Kristûsib saimarsautingata ulapirsautingatalo illagilisetôᴋ!

³ Nertortaule Gûde Nâlegaptalo Jêsusib Kristûsib Atâtanga, nâpkiniktoᴋsoaᴋ Atâta, tamainiglo manigoijoᴋ Gûde.

⁴ Tâpsoma manigormatigut kappiasugviptingne, uvaguttauᴋ manigoijungnarᴋovluta sunatuinarnut kappiasuktitaujunik, manigoiniksamut, uvagut manigortautigijaptingnut Gûdemut.

⁵ Sôrlo Kristûsib ânianganik angijomik illangiutititaumagapta, taimaktauᴋ Kristûsemut angiluartomik manigortauniarpogut.

⁶ Kappiasûteᴋarangaptalônêt, tamadja pivoᴋ ilipse manigortaulerᴋovluse, piulijauᴋovluselo; manigortaulerangapta, tamadja manigortauniksapsingnut ilingavok; tamadja angijomik saᴋᴋijârpoᴋ ᴋenuersârnerme ânernartunik tâpkoninga, sôrlo uvaguttauᴋ âniaᴋarapta.

⁷ Nerriungnivullo soᴋᴋosingimarikpoᴋ pivluse; ᴋaujimagapta, sôrlo ilipse âniamik illangiutititaugapse, taimaktauᴋ manigortaunermik illangiutititauniarivose.

⁸ Neloᴋojomangilapsele, ᴋatangutikka, kappiasungniptingnik Asiame atortaptingnik nellekangitomik pagvisârtauvluta nukkingertitaugapta, inôniarniptingnik ᴋolartitauvluta aglât;

⁹ Nangminerlo uvagut issumaᴋalauralloarpogut toᴋojuksauniptingnik. Taimaitoᴋalerporle, nangminiptingnik tattiksaᴋarᴋonata, Gûdele tattigivlugo toᴋungajunik tupaktitsijoᴋ.

¹⁰ Toᴋomit taimaitomit tâpsoma piulilauᴋpâtigut, sullelo mâna piulivâtigut: tattigivavullo mattoma kingorngaguttauᴋ piulijomârmatigut,

¹¹ Tuksiutjinipse pivluta ikajorninganuttauᴋ; tunergut saimanartoᴋ unuktut tuksiutjininginut ᴋaitaumajoᴋ uvaptingnut pitjutigilugo, ᴋujalidlartoᴋarᴋovlugo unuktunik pivluta.

¹² Nertornautigijavut tamadja: issumapta kigligiutigingmatigut, issumalingasuerluta nelâgôrlutalo Gûdib sângane, uviniliuble issumanga atornago, saimarsauteᴋarlutalo arvertalaurapta nuname, angiluartomigle akunapsingne.

¹³ Assianik aglagviginginapse, atuartapsingnik tukkisijapsingniglônêt kissianik; tatteᴋarpungale, issuanut aglât tukkisijomârivaptigut, sôrlo ᴋaujimagaptigut.

¹⁴ Nertornautigigaptigut, sôrlo ilipsetauᴋ nertornautigigapse Nâlekab Jêsusib uvluksangane.

¹⁵ Taimaitomigle tatteᴋarlunga tikitsomalauᴋpapse mattoma sivorngagut, saimaneᴋarᴋojomavluse aipaksanganik,

¹⁶ Nunapsigullo intergajomavlunga Mazedôniamut, amalo Mazedôniamit utervigiluse, ilipsingnullo ᴋanilârtaujomavlunga Jûdêamut.

¹⁷ Koksalainermulle ilingalauᴋpîk taimaitomik issumaᴋalauramâ? Sumiglônêt issumalerangama, uvinik maliklugo (inuktut) pivîk? Maungatuinaᴋ âhailârᴋîk, aukârlungalônêt?

¹⁸ Gûdele okpernartoᴋ nertortaule, oᴋausivut ilipsingnut âhailârnermiglo aukârnermiglo pingimatta.

¹⁹ Gûdib Erninga Jêsuse Kristûse akunapsingne oᴋautigijaujoᴋ uvamnullo Silvânusemullo Timôteusemullo âhailângovlunelo aukangovlunelo pilaungilaᴋ, tâpsomanele âhailângolauᴋpoᴋ.

²⁰ Ilûnatik Gûdib angersimaningit tâpsomane âhailauvut Ameneovlutiglo tâpsomane, Gûde nertortauᴋovlugo uvaptingnut.

²¹ Gûdele Kristûsemut tungatitsijôvoᴋ uvaptingnik illagivluse, mingoarlutalo.

²² Naᴋisimavâtiguttauᴋ, Anernermiglo tunitsivigiluta nelunaikutaksaptingnik ômatiptingnut.

²³ Gûdele nipliutivara kigligiudsijigijomavlugo tarnimnik, Korintemut pilaunginama sulle, annajagijomavluse kissiane.

²⁴ Okpernipsingnut ataniojomanata; ikajorteovogulle ᴋuviasungnise pivalliarᴋovlugo; okpernermut nangerapse.