II Atannit 9 - Labrador Inuttitut Heritage Bible

Jehub mingoartauninga atanningortitauvlune; toᴋotsiningalo Joramemik, Israelitit atanninganik, Ahasjamiglo Judakut atanninganik. Isebelib toᴋotauninga.

¹ Elisable nallautaijub nallautaijut erningita ilangat ᴋaiᴋova, oᴋautilugolo: Tapseruserit makkitingnik, publaujarlo orksuᴋaut una najortigiuk, ailutillo Ramothemut Gileademêtomut.

² Tagvungalo tikkiniaruvit, tagvane Jehu Josafatib Nimsib erningata erninga takkoniarpat. Itterit nikkovikolugolo kattangutime akkornganit; tessiorlugolo innemut kammanênerpangôjomut,

³ Publaujarlo orksuᴋaut tiguleruk, kovilugolo niakunganut, oᴋarlutillo: Imâk Nâlegak oᴋarpok: Mingoarlutit atanningortilaukpagit Israelitinut. Upkoarlo upkoêraksarivat, kemajuksaulutillo siglutonaglo.

⁴ Nallautaijublo innuosuktokotinga, nukapiak aivok Ramothemut Gileademêtomut.

⁵ Ittermallo, ahâk tagva sorsuktuksat angajoᴋangit iksivavut tagvane. Oᴋarporlo: Illingnut angajoᴋaujotit oᴋausiksaᴋarpunga. Jehu oᴋarpok: nalliptingnut? Tamna oᴋarpok: Illingnut angajoᴋaujotit.

⁶ Tagva nikkovipok itterlunelo. Tapsomale orksuk koviva niaᴋoanut, oᴋautivâlo: Imâk Nâlegak Israelib Gûdinga oᴋarpok: Mingoarlutit atanningortimavagit Nâlekab inuᴋotinginut Israelitinut.

⁷ Igvillo Ahabib angajoᴋavit iglomiukotingit ullimaraksarivattit, nallautaijut kivgakotima aungit akkiniarutigijomavakka Isebelemut.

⁸ Ahabekullo ilunnamassiatik asserortaujuksauvut, Ahabekunillo pêjaromavakka tamaita kivgallo kivgaungitullo Israeleme.

⁹ Ahabiblo iglomiukotingit illingatitsomavakka Jerobeamib Nebatib erningata iglomiokotingittitut, Baesablo Ahiab erningata iglomiokotingittitut.

¹⁰ Kingmillo Isebele nerrijaksarivât perorsêvingme Jesreeleme, kinamullo illijartortaujuksaungilak. Upkoarlo upkoêrpa ᴋemâlunelo.

¹¹ Jehulo annilermat angajoᴋame kivganginut, oᴋautsauvok: Illinganekatsiarka? Sôg uimajartok taimna tikkilauka illingnut? Tapsoma oᴋautivait: Angut taimna illitarigalloarpasse oᴋauserijangillo.

¹² Tapᴋoa oᴋarput, tamanna mikseᴋârtolungilak, oᴋautitigulle. Tamna oᴋarpok: Imâglo imâglo, oᴋautilaukpânga, oᴋarlaukporlo: Imâk Nâlegak oᴋarpok: mingoarlutit atanningortimavagit Israelitinut.

¹³ Tagva tuavidlarput, attunnillo annoratik tiguvât illilugillo tapsoma attânut tumerangnut, tiptulautelo tiptulausijautigivat, oᴋarlutiglo: Jehu atanningorpok!

¹⁴ Taimak Jehu Josafatib Nimsib erningata erninga angerᴋattigêngnekartitsivok Jorame akkerartorlugo. Joramele Israelitit ilunnatik ilagilugit Ramothib Gileademêtub sângane tangmarsimalaukpok, Hasaele Siriamiut atanningat pivlugo.

¹⁵ Joramele atannek uttersimalaukpok mamititaujomavlune Jesreeleme, ikkiminit pilauktaminit Siriamiunut, Hasaele Siriamiut atanningat sorsugvigingmago. Jehulo oᴋarpok: Taimak issumagupse, tagva kinalonêt ᴋemâjuksaungilak iglugasaksoarnit, ainajarlune unipᴋautigilugolo Jesreeleme.

¹⁶ Jehulo ikkivok aularlunelo Jesreelemut, Jorame tagvane nallangmat; taimaglo Ahasja Judakut atanningat attersarlaukpok tagvunga Jorame takkojomavlugo.

¹⁷ Udsertortuble nuvoguserme Jesreeleme nangertub Jehub ᴋattimgajoᴋotingit aggertut takkovait, oᴋarlunelo: ᴋattimgajut takkovakka. Tagva Jorame oᴋarpok: Ablangajoᴋ horsib ᴋângane ᴋaiᴋoleruk tillilugolo pachrearlugit, oᴋarlelo: Ullapirsautekarka?

¹⁸ Ablangajorlo horseme pachrearpâ, oᴋarlunelo: Imâk atannek oᴋarpok: Ullapirsautekarka? Jehu oᴋarpok: Igvit ullapirsaut sugiviuk? sangulerit tunnumnut. Udsertorte ᴋaujititsivok oᴋarlunelo: Tillijab tikkimavait, utteranelo.

¹⁹ Tagva ablangajub horseme assianik tilliklerpok. Tamna tikkiname tapsomunga, oᴋarpok: Imâk atannek oᴋarpok: Ullapirsautekarka? Jehu oᴋarpok: Ullapirsaut sugiviuk? sangulerit tunnumnut.

²⁰ Tagva udsertorte nallojungnaititsivok oᴋarlunelo: Tikkisimavait, utterungnaiporlo. Perajarniôvorlo Jehub Nimsib erningata perajarningatut; perajarmat, issumairotijotut.

²¹ Tagva Jorame oᴋarpok: Annujileritse. Aksalloalikotingalo parngnaitipât; aularpuglo, Jorame Israelitit atanningat, Ahasjalo Judakut atanningat, attunît aksalloalikotimingne, Jehu pachrearomavlugo; naipipaglo Nabotib Jesreelemiub perorsêvigilauktangane.

²² Joramiblo Jehu takkogamiuk, oᴋarpok: Jehu ullapirsautekarka? Tamnâle oᴋarpok: Ullapirsaut suna? anânavit Isebelib anguniarningit, angakoktorningillo pivalliatuinartillugit?

²³ Tagva Jorame allaivok tapsomangat, ᴋemâlunelo, oᴋalarmelo Ahasjamut: Pikkablajoksoneᴋarpok Ahasja.

²⁴ Jehuble pittikse tiguva, pittikpâlo Jorame tallikita akkorngatigut, kargjub omatterungmago, ochovorlo kammutekotimine.

²⁵ Oᴋarporlo angajoᴋangmut Bidekaremut: Tiguleruk egilugolo Nabotib Jesreelemiub perorsêvigilauktanganut. Erkaigama igvit uvangalo kemukserlauramnuk aksalloalingme attautseme atâtangata Ahabib kingorngane, Nâlekab nangmagak tamanna illilaungmago tapsomunga.

²⁶ Ahamarik, Nâlegak oᴋalaukpok, Nabotib aunga, erningitalo aungit ikpeksak takkolaukpakka, uvangalo kigluvigijomavagit tamattominga perorsêvingme tamattomane. Taimak tiguleruk manna egilugolo perorsêvingmut tamattomunga, Nâlekab oᴋausingit malliklugit.

²⁷ Ahasja Judakut atanningat tamattominga takkogame, ᴋemâvok apᴋosinerme, perorsêviub iglunganut sângmijome. Jehuble udlava, oᴋarlunelo: Ullimarsiuktauk kamutingne! Pilaukpok majoᴋame Guremut Jeblaamib ᴋanitanganêtome. ᴋemâvorlo Meggidomut, toᴋolunelo tagvane.

²⁸ Kivgangitalo kemuksiutivat Jerusalemut, illijartorpâllo tagvane illuvinganut, atâtagijanginut, Davidib iglugasaksoakotingine.

²⁹ Ahasja atanningorlaukpok Judakunut Joramib Ahabib erningata Jâringita 11 ingane.

³⁰ Jehulo Jesreelemut tikkimat, Isebelelo tussarame tamattominga, kênane mingoarpa, pinnarnartitsilunelo niaᴋominik, nuitalunelo igalakut.

³¹ Jehulo ittertarviksub attânut tikkimat, Isebele oᴋarpok: Simri, angajoᴋaminik innuarlauktok illingatsialauka?

³² Tamnalo arlorpok igalangmut, oᴋarlunelo: Kina uvamnêka mâne? Tagva magguk pingasullonêt sâpât.

³³ Tamna oᴋarpok: Kattaktisiuk unnunga. Kattaktipâllo; aungalo serᴋerarpok iglub senneranganut horsinullo; tullerajarpâllo.

³⁴ Itterêramelo nerrilaukârdlunelo, immerlaukardlarmelo, oᴋarpok: Takkojartorsiuk ominarsijaujok taimna, illijartorsiuglo, atanniub pannigingmago.

³⁵ Takkojartoramitsugle sunasilungilet tapsomangat niakungata, itigangitalo aggangitalo assianik;

³⁶ Utterivullo oᴋautilugolo mattominga. Tamnâle oᴋarpok: Tamannauvok Nâlekab oᴋauserilauktanga kivgamigut Eliakut, Tisbitemiojokut oᴋalauklunelo: Perorsêvingme Jesreelemetome kingmit Isebelib uvininga nerrijaksarivât.

³⁷ Isebeliblo timinga toᴋungajok perorsaijotut natername, nallajuksauvok perorsêvingme Jesreelemetome; oᴋarungnartoᴋarkonago: tagva Isebele.