II Atannit 7 - Labrador Inuttitut Heritage Bible

Elisab nallautaininganik uvlub aipangane nerᴋiksat akkekitojuksaungmatta.

¹ Elisale oᴋarpok: Nâlekab oᴋausingit tussarsigik: Imâk Nâlegak oᴋarpok: ᴋaupat nalliutome tamattomane, oktut attausek sennaukamik kaortamik, akkeᴋaniarpok Sekkelemik attautsemik, oktutiglo Gerstenik Sekkelemik attautsemik, Samariab itterviksoangata attâne.

² Tagva angajoᴋaksuit ilangata, atanniub aggangita ajakpagangata Gûdib anguteᴋotinga kiova, oᴋarlunelo: Nâlegarlo igalangnik sennanajarune ᴋilangme, ᴋanok tamanna pijungnarajarka? Tamna oᴋarpok: Ahâk ijingnut takkoniarpet, nerriniangilatille tamattomangat.

³ Anguteᴋalaukporlo sittamanik kallalingnik upkoame itterviksub silatâne, tapᴋoa ingmingnut oᴋautiutivut: Suna pivlugo ovanêtsomavita toᴋokârtinata?

⁴ Iglugasaksoarnut itterungnarasuginajaralloarupta, tagva kâviksoaᴋarpok iglugasaksoarne, tokojariakarajaralloarpogullo tagvane: ovanêtuarupta toᴋojariakarivogut. Taimak manna ᴋaileritse, Siriamiullo tangmarvinganut akpangerta. Innokopattigut, tagva innôvogut, toᴋopattigullo, tagva toᴋunganiarpogut.

⁵ Tavligarârsukullo parngnaiput, tikkitsomavlutik Siriamiut ᴋattimgajoksoakotinginut. Siriamiullo tangmarvingata issuanut tikkingmatta, ahâk, tagva inuᴋatsengilak tagvane.

⁶ Nâlekab Siriamiut tussarkolaungmagit horsit kikkergallijarninginik, kemuksillo aksalloaggit kallergallijarninginik, ᴋattimgajoksuillo kikkergallijarninginik; ingmingnut oᴋalaungmatta: Ahâk, Israelitit atanningata ᴋaiᴋolaukpait Hetiterit atanningit, Egipteniblo atannertangit, sorsugvigivluta piᴋovlugit, opingartauᴋovlutalo taipkonunga.

⁷ Parngnailerpullo ᴋemâlutiglo tavligarârsukut; kemailutiglo tuppermingnik, horsekotimingnik, siuteᴋoktojoᴋotimingniglo tangmarvingmetunik sokkoseratik, ᴋemâlutiglo innôsermingnik piulikleromavlutik.

⁸ Kallakartut tapᴋoa manna tangmarvingmut tikkinamik, tuppit ilanganut itterput, nerrivut immerlutiglo, tigusilarmiglo Goldemik Silberemiglo, annorangniglo, ijersijartorlutiglo tamakkoninga, utterpullo, itterlarmiglo tuppiub assianut, tigusilutigle tapsomangat ijeriartorpaillo.

⁹ Tagvale ingminut oᴋautiutivut: Taimailiorniarata, uvlok tamanna uvlôvok taigotaksalik ajungitomik; angigutiguptigo tamanna uttakilutalo ᴋaulermarikârtinago, tagva pitlartauniksarsiniarpogut. Tagvalo manna ᴋaititse, ailerlutalo, nallojungnaititsilutalo tamattominga atanniub iglungane.

¹⁰ Tikkinamiglo nipliarput iglugasaksuit upkoaksoangane, oᴋautilaitalo udsertortut, oᴋarlutiglo: Siriamiut tangmarvinganut tikkisimavogut; ahâglo inuᴋangilak tagvane, nipiᴋalungilarlonêt innungmit; horsille siuteᴋoktojullo pittuksimatillugit, tuppillo sokkoseratik tagvanêput.

¹¹ Upkoaksublo udsertortingit ᴋaiᴋovait, oᴋariartorᴋovlugit tamattominga atanniub iglungane.

¹² Tagva atannek makkipok unnuarme, oᴋarlunelo kivgaminut: Oᴋautijomavapse, sunamik Siriamiut piniarvigingmattigut: ᴋaujimavut kâdlarapta, ailaukpullo tangmarvingmit, ijeriartoromamut ingmingnik natername, issumatillugit: Taipkoa annilerniarpatta iglugasaksoarnit, tagva innôtillugit tigujomavavut, ittajomalutalo iglugasaksoarnut.

¹³ Tagva kivgangita ilangat kiovok oᴋarlunelo: Horsit tallimat amiakojut sulle kamane, (ahâk kamane amiakovut Israelitit unnurninginit sakkijarungnaitunit) tapᴋoa tillikliutilavut, takkolutalo.

¹⁴ Tagva kammutik maggoit aksalloalik horsit ilaliutilugit tiguvait! atanniublo tillivait Siriamiut ᴋattimgajoksuit malliklugit oᴋarlunelo: Aileritse takkoluselo.

¹⁵ Mallikpaillo Jordan tikkidlugo; ahâglo, tagva apᴋosinek nâmalaukpok anorângnik perkutiniglo, Siriamiut egilauktanginik, tuavilukalauramik. Tillijallo utterput oᴋarlutiglo tamattominga atannermut.

¹⁶ Tagva innugiartoksuit annilerput aksarpâllo Siriamiut tangmarvingat. Oktullo attausek sennaukamik kaortamik akkeᴋarpok Sekelemik attautsemik, oktutiglo magguk Gerstenik akkekarivuk Sekelemik attautsemik, Nâlekab oᴋausingit maliklugit.

¹⁷ Atanniuble angajoᴋak taimna aggangme ajakparvigijangat tilliva ittertarviksub attânnut. Innugiartoksuillo tullerarpât ittertarviksoarme, toᴋolugolo sorlo Gûdib anguteᴋotinga oᴋalaungmat, atannek attersartillugo tapsomunga.

¹⁸ Pijoᴋalaukporle Gûdib anguteᴋotinga oᴋartillugo atannermut oᴋarlunelo: ᴋaupat nalliutome tamattomane oktutik Gerstenik akkekarniarpuk Sekelemik attautsemik, oktullo attausek sennaukamik kaortamik Sekelemik attautsemik Samariab ittertarviksoangata attâne.

¹⁹ Tagva angajoᴋab oma Gûdib anguteᴋotinga kiova oᴋarlunelo: Ahâk, Nâlegak igalangnik sennanajarune ᴋilangme, ᴋanok tamanna pilerungnarajarka? Tamnâle oᴋarpok: Ahâk ijingnut takkoniarpat, nerriniangilatillo tamattomangat.

²⁰ Taimailingaluatsialaurivok, innugiartoksuit tullerajarmatsuk ittertarviksoarme, toᴋovorlo.