II Atannit 6 - Labrador Inuttitut Heritage Bible

Elisab poktartitsininga kikkiengmik; nollojungnaititsiningalo atannermik Siriamiut pinniarninginik. Kâviksoarlo Samariame.

¹ Nallautaijut erningita Elisa oᴋautivât: Ahâk inne innigijavut mâne sângne nimniuluarpok uvaptingnut.

² Jordanemut aiᴋolertigut, attunîllo tagvangat aiklerᴋotigut nappartunik ikkâksanik, igloliorᴋovluta tagvane, inniksariniartaptingnik. Tamna oᴋarpok: Aileritse tagvunga.

³ Tapᴋoalo ilangat oᴋarpok: Nagliktara kivgaᴋotitit ilagikit. Tamna oᴋarpok: Ilagijomavapse.

⁴ Ilagivaillo. Jordanemullo tikkinamik nappartunik nakkartsivut.

⁵ Ilangallo nappartomik nakkartsigame, ullimaut kattakpok ᴋongmut. Nipliadlarporlo oᴋarlunelo: Kappianamêk Nâlegâk! tappilugo attartugauvok.

⁶ Gûdible anguteᴋotinga oᴋarpok: Nane kattaksimava? Kattagvigilauktangalo unertutigingmago tapsomunga, ᴋejungmik kippisivok, tongnilunelo tagvunga. Tagva ullimaut poᴋilarpok.

⁷ Oᴋarporlo: Kiviguk. Tagva aggane issakpait, tigulâlo.

⁸ Siriamiullo attaningat unatadlarneᴋarpok Israelitinut, kivganelo issumaksarsiorᴋattigivait, oᴋarlunelo: Ikane tagvanelo tangmaromavogut.

⁹ Gûdible anguteᴋotinga tilliklerpok Israelitit atanninganut, oᴋautsaukolugolo: Udsertorit, inne taimna kamagitaililugo pikonak, Siriamiut attersaromangmatta tagvunga.

¹⁰ Israelitillo atanningat tilliklerpok tagva innemut tagvunga, Gûdib anguteᴋotingata unertutigilauktanganut tapsomunga, tennersarlugo, udsertorpâlo; taimailiortuinarlungilarlo attausêardlune, maggoêrtorlunelonêt.

¹¹ Tagva Siriamiut atanningata omatingata tamanna annûjutigiva, kivganelo ᴋaiᴋovait, oᴋautilugillo: Oᴋautijomangipissinga, ilapta nalliata Israelitit atanningat ilagingmangago?

¹² Tagva kivgangita ilangat oᴋarpok: Taimangungitok angajoᴋara atannek; Elisale nallautaijok Israeleme, tamainik oᴋarpok Israelitit atanninganut, oᴋauserijarnik aiparuserᴋotingne innarvikotivit najugâne.

¹³ Tamna oᴋarpok: Tagva aularitse, takkojartorluselo, nanêmangat, tilliklerniarᴋovlunga tagvunga, aijaukolugolo. Nallojungnaitipâllo, oᴋarlutiglo: Ahâk, Dotanemêpok.

¹⁴ Tagva tilliklerpok tagvunga horsinik aksalloalingniglo sorsuktuksaksoarniglo ᴋattimgajoksoarnik, tikkipullo tagvunga unnuarme, illumavaillo iglugasaksuit.

¹⁵ Gûdiblo anguteᴋotingata kivganga uvlarârsukut makkingmat, annilermallo; ahâk, tagva ᴋattimgajoksuit iglugasaksuit illumavait, horselijarlutik aksalloalijarlutiglo. Tagva kivgangata oᴋautiva: Kappianamêk nâlegâk, ᴋanok pinniaromavinuk manna?

¹⁶ Tamna oᴋarpok: sivuraniarnak; tapᴋoa unnurnersaungmatta uvaptingnêtut, tapᴋonangat tapᴋonanêtunit.

¹⁷ Elisalo tuksiarpok, oᴋarlunelo: Nâlegak ijigik uitikik takkoᴋovlugo. Nâlekablo nukapiab ijigik uitipâk takkoᴋovlugo. Ahâglo, ᴋakᴋak nâmalaukpok horsenik aksalloalingniglo ikkomalingnik Elisab avatâne.

¹⁸ Attarsimangmatta tapsomunga, Elisa tuksiarpok, oᴋarlunelo: Nâlegak innugiartoksuit ukkoa tikkitaukokit tautunginermut. Tapsomalo tautunginermut tikkitaukovait, Elisab oᴋausingit malliklugit.

¹⁹ Elisablo oᴋautivait: Apᴋosinek una tamnaulungilak, iglugasaksuillo tapᴋoangunginivut. Malliksinga, uvangalo tessioromavapse angumut ᴋennertapsingnut. Tessiorpaillo Samariamut.

²⁰ Samariamullo tikkilermatta, Elisa oᴋarpok: Nâlegak tapᴋoa ijingit uitikit tautuᴋovlugit. Nâlekablo ijingit uitipait tautuᴋovlugit; ahâglo tagva Samariab: (iglugasaksuit) kerᴋanginêmarilaukput.

²¹ Israelitillo atanningata Elisa oᴋautiva takkogamigit: Atâtâk saviksoarmut ullimaraksarivakka?

²² Tamna oᴋarpok: Ullimaraksaringilattit. Angujattit saviksoakotingnut, pittiksekotingnullo, taipkoa ullimarkit. Sâmiutsivigikit ᴋakᴋojanik immermiglo, nerriᴋovlugit immerᴋovlugillo, aularkolugillo angajoᴋakotinganut.

²³ Tagva nerᴋiksaliorpait angijomik. Nerrijarêrmattalo, immerêrlutiglo, aularkovait, aiᴋovlugit angajoᴋamingnut. Taimangat Siriamiut sorsuktuksangit tikkitsungnaiput Israelitit nunanganut.

²⁴ Tamakkoalo kingorngane pijoᴋalaukpok, Benhadadib Siriamiut atanningata sorsuktuksaksoakotine ᴋattitimagit majorarlunelo takpaunga, Samarialo illumavait.

²⁵ Kâviksoakadlarporlo Samariame. Iglugasaksuit illumavait, siuteᴋoktôjub niakunga akkekakârtinago kênaujanik, Silberlingemik atelingnik, 80 ginik. Taubillo annangit oktutib Kabemik attiggub sittamauliviningat akkekakârtinagit Silberlinginik 5 nik.

²⁶ Israelitillo atanningat avallunut aimat, arnat ilangata nipliarvigiva oᴋarlunelo: Ikajorlaunga nâlegara atannek!

²⁷ Tamna oᴋarpok: Nâlekab ikajungipattit, sunamut uvanga ikajoraksarivagit? ᴋakᴋojaksat tullerartauvinganit, Weineliksallonêt iptejaivinganit?

²⁸ Atanniublo oᴋautiva: Suvît? Tamna oᴋarpok: Arnab oma oᴋautilaukpânga: Ernit tunnilauruk uvlome nerriᴋovlunnuk, ᴋaupat ernera nerrijomavavuk.

²⁹ Taimak ernera nerrilaukpavuk. Uvangalo oᴋautilaukpara uvlub aipangane: Ernit tunnileruk, nerrilauluglo; ijersimavâle.

³⁰ Atanniub arnab oma oᴋausingit tussaramigit, annorane allikpait ailune avalunut. Tagva innugiartoksuit ilunnatik takkovât pôlijarmat timimine.

³¹ Oᴋarporlo: Gûdib imâk, imâglo pinniarvigilinga, Elisab Safatib erningata niakunga uvlome tapsomanêtsainarpat.

³² Elisale iksivavok iglomine, Israelitillo angajoᴋangita iksivaᴋattigivat. Atannerlo tilliklerpok angumik sivunermine. Tillijarle tikkikârnago tapsomunga, oᴋarpok angajoᴋaunerôjunut: Takkolaukise ᴋanok innuartub erninga una tilliklilaungmat tamaunga, niakumnik nussuksijomavlune? Takkoleritse, tillijak tikkiniarpat, tagva upkoak pallangairsiuk, ajagissiuglo upkoamut; ahâk, angajoᴋangata itigangita kikkergallijarningita mallikpât.

³³ Taimaglo oᴋartillugo sulle, ahâk, tagva tillijak tikkipok unnunga tapsomunga, oᴋarlunelo: Ahâk, ᴋanoêtok taimaitok pivok Nâlekamit; sunamik sulle nerriuktuksauvik Nâlekamit?