II Atannit 5 - Labrador Inuttitut Heritage Bible

Naemanib Siriamiub kallakartub kallakarungnaititauninga Elisamut. Gehasib kallaᴋartitauninga, pijomatudlarninga pivlugo.

¹ Naeman Siriamiut atanningata sorsuktuksaksoaᴋotingita angajoᴋangat, angutitsiangolaukpok angajoᴋame sângane, opigijaulunelo; tapsomuna Nâlegak sâlaᴋarnermik tunnijingmat Siriame. Angutaudlalaukporlo, kallaliolunele.

² Sorsuktukselle Siriame aularlaukput, niviârsiarlo aularutilaukpât Israelitit nunanganit, tamna kivgaulaukpok Naemanib nullianganut.

³ Tamna angajoᴋaminut arnamut oᴋarpok: ᴋanoktôk nâlegara nallautaijomênajarune Samariame, taipsoma pejaiviginajarpa kallanginik.

⁴ Tagva itterpok angajoᴋaminut oᴋautilâlo tamattominga, oᴋarlunelo: Imâglo, imâglo niviârsiak Israelitit nunanganit pijok oᴋalaukpok.

⁵ Siriamiut atanningat oᴋarpok: Tagva ailerit tagvunga, Israelitit atanningat aglagvigijomavara. Aivorlo tagvunga, naksarlunelo Talentinik 10 nik Silberemik, Sekeleniglo 6,000 dinik Goldemik, annorangniglo 10 nik uvloksiorviksiutinik;

⁶ Atsilunelo aglangnik tamakkoninga Israelitit atanninganut, imâk oᴋartunik: Aglait ukkua tikkipatta illingnut, ahâk, tagva ᴋaujilerit kivgara Naeman tillilaurapᴋo illingnut, kallaᴋarungnaitilugo piᴋovlutit.

⁷ Israelitillo atanningata aglait tamakkoa attuaramigit, annoraᴋotine allikpait, oᴋarlunelo: Gûdeovîk, toᴋotsijungnarajarlunga omartitsijungnarajarlungalo, tilliklervigingmanga, angut tamna kallangêjarlugo piᴋovlunga? Kamatsiaritse ᴋanok pitjutiksarsiormat uvamne.

⁸ Elisab Gûdib anguteᴋotingata tamanna tussaramiuk, atanniub annoraᴋotine allilaungmagit, tilliklervigiva, oᴋautsauᴋolâlo: Sôg annoraᴋotitit allilaukpigit? Uvamnut ᴋailerle tukkisilerᴋovlugo nallautaijoᴋarmat Israeleme.

⁹ Taimak Naeman ᴋaivok aksalloalikut horseliktutigut, noᴋarlunelo Elisab iglungata sângane.

¹⁰ Tagva Elisab tillijaksak tilliva tapsomunga, oᴋautsaukovâlo: Ailerit ubvarlutillo illingnik 7 êrtorlutit Jordaneme, tagva uvinît âkiktauniarpok kallaᴋarungnainiarlutillo.

¹¹ Tagva Naeman ningalerpok, aularlunelo oᴋalarmelo: Issumalaukpunga anniviginiarmanga, nangeriartorlunelo tamaunga, Nâlekablo Gûdime atinga nipliarvigilugo, aggangminullo sukkutsera tilaijarlugo, taimaglo kallak pêjarniarmago.

¹² Koksoak Amana Farfarelo Damaskusemêtuk namanersaungilâk immeksoarnit ilunnainit Israelemetunit? Tapᴋonane ubvarungnangilanga kallangêjarlungalo? Allaivorlo aularlunelo ningardlune.

¹³ Tagva kivgangita tikkipât, oᴋarvigilugolo, oᴋarlutiglo: Nagliktavut atâtak, nallautaijub pijariaᴋortôjomik pinniarᴋolaukpattit, pinniarajangilatit tamattominga? ᴋanok angiluartomik, oᴋautilaungmattit: Ubvarit, tagva kallangêrotiniarpotit.

¹⁴ Tagva niovok, missiklunelo Jordanemut, akkarlunelo 7 êrtorlune, sorlo Gûdib anguteᴋotinga oᴋalaungmat: uviningalo âkᴋiktaumavok nukapiab inosuktub uviningatut-idlune, ivsornailunelo.

¹⁵ Utterivorlo Gûdib anguteᴋotinganut, ilagijane ilunnatik ilagilugit. Itteramelo sângerpa, oᴋarlunelo: Ahâk illitarksimavunga, Gûdeᴋangimat nunane ilunnaine, Israeleme kisiane; mannalo pilliumik tigusilaurit kivgarnit.

¹⁶ Tamna oᴋarpok: Sorlo mikseᴋârtomik Nâlegak sangiartara inôngmat, tigulungilara. Innapâlo tigusiᴋovlugo; pijomalaungilarle.

¹⁷ Tagva Naeman oᴋarpok: Kivgait tunnitsiviojungnangilâk nunab oma ivjunganik, taimak angitigijomik horseojartuk magguk neksarungnartagingnik? Kivgait tunnergutiksanik, tunnergutiniglo ikkoalajaksanik tunnijijomairpok Gûdeungitunut, Nâlekamulle;

¹⁸ Nâlekab kivgait tamattomane saimarvigilugo piᴋovlugo, tuksiaraikuma Rimonib iglungane, angajoᴋara Rimonib iglunganut tuksiariartoraikune, aggakkalo egangavigivlugit pileraikune, tuksialeraikumalo Rimonib iglungane, tagva Nâlekab kivgait issumagijungnaivigilugo pile.

¹⁹ Tapsomalo oᴋautiva: Aularit ullapirsautekarlutit. Aularporlo tapsomangat, apᴋosiniub takᴋiningata ilanganik.

²⁰ Tagva Gehasi, Eliab, Gûdib anguteᴋotingata kivganga oᴋarpok: Ahâk angajoᴋama Siriamiok Naeman una nikkagilaukpa, tigusilaungimat sunamik taipsoma agganginit ᴋailauktanginik: Sorlo mikseᴋârtomik Nâlegak inôngmat, udlagomavara, tigusijomalungalo sunamik taipsomangat.

²¹ Taimak Gehasib Naeman udlapa, Naemanelo takkogame udlaningmat, niovok aksalloalingmit, pachreartorpa, oᴋarlunelo: Ilunnane idluarᴋa?

²² Tamna oᴋarpok: Ahaila. Kisiane angajoᴋama tillilaukpânga, oᴋautsauᴋolutillo: Ahâk, tikkitaumavunga, nukapiangnut, Efraimib ᴋakᴋanginit, nallautaijut erninginit; tunnitsivigilaukik Talentemik Silberemik, annorangniglo maggungnik uvloksiorviksiutinik.

²³ Naeman oᴋarpok: Nagliktara tigusilaurit Silberemik Talentingnik. Innapâlo, poksilunelo Talentingnik maggungnik Silberemik, pôngnut maggungnut, annorângniglo uvloksiorviksiutinik, tunnivaillo kivgamingnut, tapᴋoa akjarsivuk tapᴋoninga sivorngane.

²⁴ Ofelemullo tikkiname, tiguvait tapᴋoa agganginit, illivaillo iglomut, angutiglo aularᴋovak.

²⁵ Tapᴋoalo aularêrmanik, nâlegane sângerpa. Elisablo oᴋautiva: Gehasi nakit pivît? Tamna oᴋarpok: Kivgait ikkungalonêt, tagvungalonêt ailaungilak.

²⁶ Tapsomale oᴋautiva: Omattiga agvertarlaungilâk, angut taimna uttermat aksalloaliᴋotiminit, pachreartorlutit? Tamanna nalliutijolauᴋa, Silbere anorâllo, perorsêvillo orksuktaggit, perorsêvillo Weineggit, saugallo, tuktuvaillo, kivgello angutit, kivgello arnat tigulugit?

²⁷ Naemanible kallangata atâvigênarniarpâtit kinguvaᴋotitillo soraijuitomik. Tagva annilerpok tapsomangat, kallaᴋarlune apputitut.