II Atannit 4 - Labrador Inuttitut Heritage Bible

Elisab tattamnartulliningit tallimat.

¹ Nallautaijullo erningita nulliangita ilangata Elisa nipliutiva oᴋarlunelo: Kivgait, uiga toᴋungavok, ᴋaujimavotillo, kivgavit Nâlegak sivoragilaungmago, mannalo akkiliksaᴋarvinga tikkipok ᴋitorngâka tigujomavlugik, kivgangortitsomavlugiglo ingminut.

² Elisab oᴋautiva: Sunamik pinniarvigijaksarivagit? Oᴋautinga, sunamik pittaᴋarᴋît iglungne? Tamna oᴋarpok: Kivgait arnak sunaᴋalungilak iglome publaujab orksuᴋautib assianik.

³ Tamna (Elisa) oᴋarpok: Attarsijartolerit silalingnit arnanit ilunnainit illulerᴋutinik illuleᴋangitunik ikkitolungitunik.

⁴ Itterlutillo, tunnungnelo ernikpîllo tunnukingne upkoak pallangairuk, kovisilutillo illulerᴋutinut ilunnainut, tatatullo âtaulît asianut.

⁵ Arnak aivok, upkuarlo tunnumine erningmelo tunnuᴋingne pallangairpa; tapᴋoa illulerkutit âpait tapsomunga, tamnalo kovisivok kamunga.

⁶ Illulerᴋutillo tattalaungmatta, ernine oᴋautiva: Illulerᴋumik atautsemik sulle issautjivigilaunga. Tapsoma oᴋautiva: Illulerᴋuteᴋarungnaipok mâne. Tagva orksuk noᴋarpok.

⁷ Tamnalo arnak aivok, oᴋarlunelo tamattominga Gûdib anguteᴋotinganut. Tamna oᴋarpok: Ailerit orksuglo niorvgotigiuk, akkiliksaᴋarvillo akkilêvigiuk; igville ernikpillo amiakunga inogutigisiuk.

⁸ Nalliutomelo taipsomane pijoᴋalaukpok, Elisa Sunememut aingmat. Tagvane arnaᴋalaukpok akluitomik, tapsoma innapa nerriᴋovlugo tapsomane. Tagvûnarlaurangamelo ittervigitsainnarpa nerriᴋattigilâlo.

⁹ Tamnalo arnak uiminut oᴋarpok: Ahâk takkovunga Gûdib anguteᴋotinga ovûnatsainartok ivsornaidlarmat.

¹⁰ Inniliorlaulavuk mikkijomik iglupta ᴋollâne, innarvingmiglo, sâmiglo, iksivautamiglo, nenergoabvingmiglo pititsilauluk takkamunga, tikkilerangatiguk itterᴋovlugo tamaunga.

¹¹ Pijoᴋalaukporlo uvlut ilangane, itterame tagvunga, innarpok ᴋollâne inneme siniklunelo tamâne.

¹² Kivgaminullo Gehasimut oᴋarpok: Sunamemiok arnak ᴋaiᴋolauruk. ᴋaiᴋungmagolo sângerpa.

¹³ Tapsomalo (Elisab) Gehasi oᴋautiva: Oᴋautiuk: Ahâk, kivgartornermik tamattominga tamainik pinniarvigilaukpâptiguk, sunamik uvanga pinniarvigijaksarivagit? Oᴋausiksaᴋarᴋît atannermut, sorsuktuksallonêt angajoᴋanganut? Tamna (arnak) oᴋarpok: Nunaᴋarpunga inuᴋotima akkorngane.

¹⁴ Tamna (Elisa) oᴋarpok: Sunamigle pinniarviojungnarka? Gehasi oᴋarpok: Atso ila, erneᴋangilak, uingalo itôvok.

¹⁵ Tamna oᴋarpok: ᴋaiᴋoleruk. ᴋaiᴋungmagolo, upkuêrdlune nangeriartorpok.

¹⁶ (Elisalo) oᴋarpok: aggâgo nalliutome tamattomane ernermik kuningniktuksauvotit. Tamna (arnak) oᴋarpok: Aukak ila, nâlegâk, angutaujotit Gûdemut, kivgait arnak sagloᴋiniarnago!

¹⁷ Arnarlo tamna singailerpok ernilunelo ernermik nalliutome taimaluatsiame aggâgolermat, sorlo Elisab oᴋautilaungmago.

¹⁸ Soruserlo angijororame pijoᴋarpok uvlut ilangane, annilerame atâtaminut kippisijunut (ᴋakᴋojaksanik),

¹⁹ Oᴋarporlo atâtaminut: Kappianamêk niaᴋora, niaᴋora! Tamna oᴋarpok nukapiaᴋotiminut: Anânanganut âleruk.

²⁰ Tapsomalo tiguva âlâlo anânanganut. Tapsomalo (anânangata) sârliarpa uvlub ᴋetterarninga tikkilugo, tagva toᴋovok.

²¹ Tamnalo (arnak) majoarpok ᴋollânut, illivâlo Gûdib anguteᴋotingata innarvianut, pallangairsivok annilunelo,

²² Uinelo ᴋaiᴋova, oᴋarlunelo: Nukapitset ilanganik tilliklervigilaunga siuteᴋoktôjomiglo; Gûdib anguteᴋotinganut aijomavunga utteromalungalo.

²³ Tamna oᴋarpok: Sôg aivigijomaviûk? Uvlome takᴋêlaulungimat Sabbateolungilarlonêt. Tamna (arnak) oᴋarpok: Nipportuinarit.

²⁴ Siuteᴋoktôjorlo iksivaviktarpa oᴋarlunelo nukapiamut: Ungortuinarit katsungailutit, noᴋartailitilungalo ablanganerme sivumut, kisiane oᴋautigupkit.

²⁵ Taimak aularpok, tikkilunelo Gûdib anguteᴋotinganut ᴋakᴋamêtillugo Karmelemik atelingme. Gûdible anguteᴋotingata ᴋaningitomit takkogamiuk, oᴋarpok nukapiaᴋotiminut Gehasimut: Ahak arnak Sunememiok tikkilerpok.

²⁶ Taimak manna akpangerdlutit pachreartoruk, apperilugolo, tamna nangminek, uingalo erningalo ᴋanoêngitsiarolloarmangatta? Tamna oᴋarpok: Ahaila ᴋanoêngitsiarpogut.

²⁷ Tikinamele Gûdib anguteᴋotinganut ᴋakᴋab ᴋânganut, iitigangit erᴋisimiarpait; Gehasile ᴋaivok ajagomavlugo. Gûdible anguteᴋotinga oᴋarpok: Taimailingale, tarninga kiksadlarmat; Nâlekablo angigutilaukpânga tamattominga, nallojungnaitilaungilângalo.

²⁸ Arnak oᴋarpok: ᴋânga ernermik tuksiarlaukîk nâlekamnit? Oᴋalaungilanga, uiverijaksaringilarma?

²⁹ Tamna (Elisa) oᴋarpok Gehasimut: Makkitingnik tapseruserit, ajaupiaᴋotigalo tiguleruk aggangnut, aivigilugolo; pârtauguvit kinamut, tagva salutiniarnago pit; salutitaugalloaruvillo, tagva kioniarnak, ajaupiaᴋotigalo illiuk nukapiab kênanganut.

³⁰ Nukapiable anânanga oᴋarpok: Sorlo mikseᴋârtomik Nâlegak inôngmat tarnîllo, allarniangilagit. Tagva parngnailerpok mallikpalo (arnak).

³¹ Gehasile tapᴋoa sivorngangne aimalaukpok tagvunga, ajaupiarlo illiva nukapiab kênanganut; tagvanele nipiᴋalaungilarlonêt ikipigineᴋangilarlonêt. Utterporlo pachrearlugo, nallojungnaitipâlo, oᴋarlunelo: Nukapiak tuppalungilak.

³² Elisalo iglomut tikkimat, ahâk tagva nukapiak toᴋungavlune nallavok innarvingane.

³³ Itterporlo, upkoarlo pallangairpa, tuksiarlunelo Nâlekamut,

³⁴ Kagvalerporlo pallungerlunelo sorrutsib ᴋânganut, ᴋaninelo illiva sorrutsib ᴋaninganut, ijingnelo ijekingnut, agganelo tapsoma agganginut, taimaglo tessiterpok tapsoma ᴋânganut, sorrutsib timinga aukanerᴋovlugo.

³⁵ Tamnâle (Elisa) makkipok uttertarlunelo iglome, kagvarlunelo tessiterporlo tapsoma ᴋânganut. Tagva nukapiak tagioksavok 7 êrtorlune, kingorngane nukapiak ijingne uitipâk.

³⁶ Elisablo Gehasi ᴋaiᴋova, oᴋarlunelo: Arnak Sunememiok ᴋaiᴋoleruk. ᴋaiᴋovâlo. Tapsomalo tikkipa. Tamna oᴋarpok: Tagga ernît tiguleruk.

³⁷ Tagva (arnak) tikkilerpok, pamakterlunelo itiganginut, opigosulunelo netterme, erninelo tiguva annilunelo.

³⁸ Elisale tikkingmat Gilgalemut, kâviᴋarpok nuname, nallautaijullo erningit, nunaᴋalaukput tapsoma sângane. Tapsomalo kivgane oᴋautiva: Ukkusiksoak oklertorvigiuk, igalutillo perortunik nallautaijut erningita nerᴋiksanginik.

³⁹ Tagva tapᴋoa ilangat naternamut aivok, perortunik kattersijomavlune, naipitsilunelo perortunik, manetuinartome perortunik, nunivarlunelo tapᴋonangat paungâlukullungnik, Kolokwintenik atelingnik, anoraᴋotine tattadlugo, tikkinamelo okliutivait savingmut ukkusingmut; illitarilungimattigik.

⁴⁰ Navingmagolo nerrijauᴋovlugo angutinut, nerriᴋamiglo nerᴋiksamit tamattomangat, tagva nipliarput oᴋarlutiglo: Igvit Gûdib anguteᴋotinga, toᴋo ukkusingmêpok! Nerrilugo sapperamik.

⁴¹ Tamnâle (Elisa) oᴋarpok: Sanauᴋamik ᴋaitsileritse. Pitipâlo ukkusingmut, oᴋarlunelo: Naviuk innuit sânginut nerriᴋovlugit. Tagva idluitoᴋalaungilak ukkusingme.

⁴² Tikkitoᴋarporle angumik Baalsalisamit, ᴋaitsivigilugolo Gûdib anguteᴋotinga niaᴋojanik ᴋakᴋojaksanit innersimaᴋârtunit, niaᴋojanik 20 ginik Gerstemit, ᴋakᴋojaksaniglo togarsimajunik ikpiârsukotimine. Tamnâle oᴋarpok: Tunnikit inungnut nerriᴋovlugit.

⁴³ Kivganga oᴋarpok: ᴋanok angutit 100 dit tunnitsivigijaksarivakka tamakkonangat? Tamna oᴋarpok: Inugasaksuit tunnitsivigikit nerriᴋovlugit. Nâlegak imâk oᴋarmat: Nerrijoᴋarniarpok, amiakoᴋarniarlunelo.

⁴⁴ Tagva illivait tapᴋoa sânginut, nerriᴋovlugit; amiakoᴋarporlo sulle, Nâlekab oᴋausingit malliklugit.