II Atannit 3 - Labrador Inuttitut Heritage Bible

Joramib atanniotininga Israelitinut. Unatadlarninga, sâlaᴋarningalo Moabiterinik.

¹ Jorame Ahab erninga atanningorpok Israelitinut Samariame. Josafatib Judakut atanningata jâringita 18 ingane; atanniotilunelo jârinik 12 inik.

² Pinniarporlo Nâlekab idluigijanginik, atâtamitungitorle, anânamitungitorlo. Baalib nappajunga atâtangata sanajauᴋolauktanga pêjarpa.

³ Jerobeamible Nebatib erningata Israelitinik idluitullititsilauktub idluiningit ungagitsainarpait, allailungilarlo tapᴋonangat.

⁴ Mesale Moabiterit atanningat saugaᴋuteᴋalaukpok unuktunik, akkilêvigijariaᴋarpâlo jârine tamaine Israelitit atanningat, saugârsuit 100,000 dit, angusâlluillo 100,000 dit merᴋunginik.

⁵ Ahable toᴋungangmat, Moabiterit atanningata Israelitit atanningat nâlegungnaipa.

⁶ Tagva atannek Jorame nalliutome taipsomane aularpok Samariamit oppalungaijailunelo Israelitit ilunnamassianginik.

⁷ Tilliklerlunelo Josafatemut Judakut atanninganut oᴋautsauᴋovâlo: Moabiterit atanningata nâlegungnaipânga, ᴋailaurit sorsuᴋattigilungalo Moabiterinik. Tamna oᴋarpok: Majorarlunga takpaungaromavunga, uvanga illiktut-ipunga, inuᴋotikkalo inuᴋotititut, horseᴋotikkalo horseᴋotititut.

⁸ Oᴋarlunelo: Apᴋosinît nalliatigut takpaungaromavita? Taimna oᴋarpok: Apᴋosinekut Edomiterit sunaᴋajuitunginêtutigut.

⁹ Taimak aularput tagvunga, Israelitit atanningat, Judakut atanningat, Edomiterillo atanningat. Imerianiglo 7 inik ingerarlauᴋârmatta, sorsuktuksaksoaᴋattigêt, nergjutillo najortangit immeᴋangilat.

¹⁰ Tagva Israelitit atanningat oᴋarpok: Kappianamêk! Nâlekab atannit ukkua pingasut ᴋaiᴋolaukpait tamaunga, tunnijomangmagit Moabiterit agganginut.

¹¹ Josafatele oᴋarpok: Nâlekab nallautaijoᴋotingita ilangat ovanêngilâk, Nâlekamik appersorᴋovluta tapsomuna? Tagva Israelitit atanningata kivgangita ilangat kiovok oᴋarlunelo: Elisa Safatib erninga, kovisilauktok immermik Eliab agganginut mânêpok,

¹² Josafate oᴋarpok: Nâlekab oᴋausingit taipsomanêput. Taimak attersarput taipsomunga, Israelitit atanningat, Josafatelo Edomiterillo atanningat.

¹³ Elisable Israelitit atanningat oᴋautiva: Igvit suvigivinga? Ailerit atâtavit nallautaijoᴋotinginut, anânavillo nallautaijoᴋotinginut. Israelitit atanningata oᴋautiva: Aukak, Nâlekab atannit pingasut ukkoa ᴋaiᴋungmagit tunnijomavlugit Moabiterit agganginut.

¹⁴ Elisa oᴋarpok: Sorlo mikseᴋârtomik Nâlegak Zebaoth sângiartara inôngmat, Josafate, Judakut atanningat issumaginajangikupko, igvit takkosarajangilagit, kamaginajangilagillonêt.

¹⁵ Tagva ᴋaitsivigisinga manna nipliajortomik. Angullo noᴋakseralingmik attortillugo Nâlekab aggangita tikkipa;

¹⁶ Oᴋarporlo: Imâk Nâlegak oᴋarpok: Sunatuinarne ittersallioritse naksarme tamattomane.

¹⁷ Nâlegak imâk oᴋarmat: Annoremiglonêt, silalungmiglonêt takkoniangilase, sulle naksak tamanna nâmaniarpok immermik, illipse, ilaselo, nergjuteᴋotiselo immerungnarᴋovluse.

¹⁸ Tamannalo mikkiluarpok sulle Nâlekab sângane, Moabiterit tunniniarivait aggapsingnut.

¹⁹ Iglugasaksuillo sôngojut ilunnaita, iglugasaksuillo annerimajut ilunnaita ullimarniarpasse, nakkartsiniarluselo nappartunik ajungitunik ilunnainik, puailavillo immermik ilunnaita simingniarpasse, perorsêvillo namanersat ilunnaita asserorniarpasse ujarᴋanut.

²⁰ Uvlarmelo tunnergutit tunnijauviane, ahâk immersoak kôkpok Edomemit, nunalo nâmalerpok immermik.

²¹ Moabiterillo tussaramik, atannit majorarmatta sorsugvigijomavlugit, ᴋaiᴋojivut ilunnainik attorungnarnermut sakkunik namaktunik jâreᴋartunik, inotoᴋaunersaniglo, nangeriartorlutiglo kiglilervingmut.

²² Uvlarârsukullo parngnaimatta, seᴋinerlo nuilermat immersub ᴋângane, Moabiterit immek aupallugasugivât auktut;

²³ Oᴋarlutiglo: Aungôvok; atannit asserortaumavut saviksoarmut, ullimartigêkpallaivut. Atte, Moabitereôjose manna aksarnigakaritse.

²⁴ Israelitille tangmarvinganut tikkingmatta, Israelitit parngnailerput ullimarpaillo Moabiterit, tapᴋoalo ᴋemâvait. Israelitillo nunamut tikkiput ullimârpaillo Moabiterit.

²⁵ Iglugasaksuit serᴋomipait, ilunnatiglo attunît ujaratik egipait perorsêvingnut namanerpânut tattatipaillo, puailavillo ilunnaita simikpait, nappartullo ajungitut ilunnaita nakᴋarpait, amiakoᴋaᴋârtinagit kisiane iglugasaksuit ujarangit Kirharaseteme. Illoereartullo illumavait, illoerearlugillo.

²⁶ Moabiterillo atanningat takkogame, sorsungnek sôngoluarmat tapsomunga, angutit 700 dit saviksoarmik amusijut ingminut pitipait pittarutigomamut Edomiterit atanninganut; sappidlalaukpulle.

²⁷ Tagva taipsoma erninga erneriᴋârtanga innangêrlugo atanniojuksaulauktok tiguva, tunnilâlo tunnergumut ôtaksamut avalut ᴋângine. Tagva ningarneᴋalerpok angijomik Israelitit pivlugit, allarpaillo utterlutiglo nunamut.