II Atannit 25 - Labrador Inuttitut Heritage Bible

Iglugasaksuit Jerusalemib serᴋomitaungit; innugiartoksuillo aularutsauningit Babelemut.

¹ Pijoᴋalaukporlo atannioningata Jâringita 9 ingane, takkit 10 ingata uvlungita 10 ingane, tagva Nebukadnezar Babelemiut atanningata sorsuktuksaksoakotine tamaita ilagillugit tikkipok Jerusalemut; illumavaillo, talluliorlaitalo.

² Taimak iglugasaksuit illujaumalaukput Zedekiab atannioningata Jâringita 11 ingat tikkidlugo.

³ Takᴋillo 4 ingata uvlungita 9 ingane kâksoak angijororpalliavok iglugasaksoarne, nerᴋiksakalungilarlo nunab innugiartoksoanginut.

⁴ Iglugasaksuillo pittaktauvut, sorsuktuksallo ilunnatik unnuarme ᴋemâvut itterviksoakut atanniub perorsevingata avalukita akkorngangnetokut. Kaldarille iglugasaksuit avatânelaukput. Atannerlo kemmâvok apᴋosinerme naternamut torartome.

⁵ Kaldarillo sorsuktuksaksoangita atannek udlapât, angulâllo Jerichub naternangane, sorsuktuksaksoakotingillo ilunnatik siamalerput tapsomangat.

⁶ Tapᴋoalo atannek tiguvât, aularutivâllo takpaunga Babelemiut atanninganut Riblatemut; kakkimiojutigivlugo illingajuksauninga oᴋautigivât.

⁷ Zedekiablo ᴋitorngangit toᴋopait ijikita sângangne, ijigiglo tautugungnaitipakit, kellaksorlâllo kellaumgujanut aularutivâllo Babelemut.

⁸ Takᴋillo 5 ingata uvlungita 7 ingane, tagva Nebukadnezarib Jâringita 19 ingane, Nebusaradan sorsuktuksat angajoᴋaksoangat, Babelemiut atanningata kivganga, Jerusalemut tikkipok,

⁹ Ikkipaillo Nâlekab iglunga, atanniublo iglunga, iglullo ilunnaita Jerusaleme, iglullo angijut ilunnaita ikkipait.

¹⁰ Kalderillo ᴋattimgajoksoangita, sorsuktuksat angajoᴋaksoanganetut Jerusalemib avaluksoangit serᴋomipait.

¹¹ Innugiartoksuille amiakungit iglugasaksoarne, ᴋemâlauktullo Babelemiut atanninganut, innugiartoksuillo assingita amiakungit, Nebusaradanib sorsuktuksat angajoᴋangata aularutivait.

¹² Nunamiullo erkananginerpânginit sorsuktuksat angajoᴋangata ilangit nokkarkovait, perorsêvilerijioᴋovlugit Weineliksanik, ᴋakᴋojaksaniglo.

¹³ Kalderillo nappajut kannujaujut, Nâlekab iglunganêlauktut, ikkovrallo, immarbingoarlo kannujaujok, Nâlekab iglungane serᴋomipait, kannujangillo aularutivait Babelemut.

¹⁴ Ukkusillo, poargitillo, sâvillo, allupsautillo, illulerkutillo kannujaujut, kivgartornermut attortaulauktut tiguvait.

¹⁵ Taimaktauk sorsuktuksat angajoᴋangata, êliᴋautit, kallutaujallo, illulerkutillo Goldeôjut, Silbereôjullo tiguvait.

¹⁶ Nappajûk, immarbingoarlo, ikkovrallo, Salomob sennalauktangit, Nâlekab iglunganut; illulerkutit tamakkoa tamaita kannujangit kiktitarlugit ajornalaukpok.

¹⁷ Nappajûk aipa tallitut 18 tut poktôtigijolaukpok, niaᴋojartungalo ᴋânganêtok kannujaulaurivok, tallitullo pingasotut pôktotigijôlaukpok, nulluangoakalaukporlo, paungâlungoakalarmelo, Granatenik atelingnik, niaᴋojartub avatane, ilunnâllo kannujaulaukpok, nappajûglo aipanga, taimailingalaurivok nulluangoat ilaliudlugit.

¹⁸ Sorsuktuksallo angajoᴋangata tiguva ajochertuije Seraja, sivurliojit ilangat, ajochertuijorlo Zefanja tuglit ilangat, udsertortullo upkoanik pingasut,

¹⁹ Iglugasaksoarnillo angajoᴋaksuit ilangat, angajoᴋangortitaumajok sorsuktuksanut, angutillo tallimat, atanniub najuganetsainarlauktut, naipitaumajut iglugasaksoarne, Soferelo sorsuktuksaksoaᴋattigêt angajoᴋangat, innugiartoksoarnik nuname illinniartitsijok sorsungnermik, angutillo 60 git nunab innunginit, iglugasaksoarne naipitaumajut;

²⁰ Tapᴋoa Nebusaradanib sorsuktuksat angajoᴋaunerojungata tiguvait, âpaillo Babelemiut atanninganut Riblatemut.

²¹ Babelemiullo atanningata ullimârlugit toᴋopait Riblateme, Hematib nunanganetome. Taimak Judakut aularutitaumalaukput nunakotimingnit.

²² Innugiartoksuille amiakunginut nuname, Nebukadnezarib Babelemiut atanningata amiakokojanginut, Gedalja Ahikamib Safanib erningata erninga angajoᴋangortipa.

²³ Sorsuktuksallo angajoᴋangit ilunnatik, angutillo tapᴋonanêtut tussaramik, Babelemiut atanningata Gedalja angajoᴋangortimago nunamut, tikkiput Gedaljamut Mizpamut, tapᴋoa: Ismael, Nethanjab erninga, Johananelo Kareab erninga, Serajalo Thanhumetib erninga, Netofatemiovinek, Jaesanjalo, Maechatib erninga, anguteᴋotitik ilagilugit.

²⁴ Gedaljablo tapᴋoa anguteᴋotingillo angermarikpait, oᴋautilaitalo; Sivuratailititse Kaldemiut nâleklugit; nunamêtuaritse, Babelemiullo atanningat nâleksiuk, tagva pilloringniarpose.

²⁵ Takᴋille 7 ingane Ismaele, Nethanjab Elisamab erningata erninga atanniub kinguvanginit pijok, tikkipok, angutit 10 ilagilugit, Gedaljalo ullimârlugo toᴋopât, tappilugillo Judit, Kalderillo tapsomanêlauktut Mizpame.

²⁶ Tagva innugiartoksuit ilunnatik mikkijut angijullo, sorsuktuksallo angajoᴋangit parngnailerput, aularlutiglo Egiptenemut; Kalderit illimagigamigit.

²⁷ Jârillo 37 ingane Jojachin Judakut atanningat aularudsaulaukârdlune, takkit 12 ingata uvlungita 27 ingane Evil-Merodachib Babelemiut atanningata, atannionime Jâringita sivorlingane, Jojachimib Judakut atanningata niakunga kivikpa parngnanairsimavingmit,

²⁸ Ilanaksarlunelo oᴋarᴋattigiva, iksivautangalo sivorliotipa atannît tapsomanêlauktut Babeleme ilunnatik iksivautanginit;

²⁹ Annorairkovalo parngnanêrsimavingmêsiutinginik; nerrimarkattautsainarlaukporlo tapsoma sângane innôsingane tamât.

³⁰ Nerᴋiksangillo attoriakartangit, nerᴋiksat pijariakatsainartangit tunnitsiviôlaukpok atannermut, uvlut tamaita, innôsingane tamât.