II Atannit 24 - Labrador Inuttitut Heritage Bible

Jojakime, Jojachine, Zedekialo attanît Judakunut. Jerusalemib illujaumaninga.

¹ Tapsoma nalliuningane majorarlune takpaungarpok Nebukadnezar Babelib atannertanga; Jojakimiblo nâlekpa Jârit pingasut nâvlugit; allârpale nâlegungnailugolo.

² Tagva Nâlekab tikkitaukovait sorsuktuksanut Kaldamit, Siriamillo, Moabemillo, Amoniblo ᴋitornganginit, tapᴋoa tillivait Judiamut, asseroiᴋovlugit tamattominga, Nâlekab oᴋausingit malliklugit, oᴋauserilauktangit kivgamigut nallautaijutigut.

³ Nâlekab oᴋausingit malliklugit kisiane Judakut taimak pinniarviovut, kênaminit pêjaromangmagit, Mannassib idluitulliningit pivlugit, pinniarlauktangit.

⁴ Auk passijaksaungitok kovilauktanga pivlugotauk, Jerusalemelo nâmatilaungmagit aungmut passijaksaungitomut, Nâlekab issumagijungnaivigijomalaungilait.

⁵ Unipᴋautsille tamakkoa assingit Jojakime pivlugo, tamaitalo pinniarlauktangit, ahâk tamanna aglaksimavok Judakut atanningita aglangine.

⁶ Jojakimelo sinnisilerpok atâtagijaminut ailune; erningalo Jojachin atanningorpok innangêrlugo.

⁷ Egiptenemiullo atanningat aularungnairpok nunaminit; Babelemiut atanningata aksarlaungmago tamainik Egiptenemiut atanningata pigijanginik, Egiptenib kônganit, kôk Frate tikkilugo.

⁸ Jojachin Jârekalaukpok 18 nik atanningorame, atanniotilunelo takkit pingasut nâlugit Jerusaleme. Anânanga attekalaukpok Nehustamik Elnatanib pannia Jerusalemit.

⁹ Pinniarporlo Nâlekab idluigijanginik, sorlo atâtanga pinniarlaungmat.

¹⁰ Nalliutome taipsomane Nebukadnezarib Babelemiut atanningata kivgangit majorarlutik takpaungarput Jerusalemut, tikkilutiglo iglugasaksoarnut, talluliorutiksalijarlutik.

¹¹ Nebukadnezarelo Babelemiut atanningat tikkipok iglugasaksoarnut, kivgangit iglugasaksoarnik illumajitillugit.

¹² Jojachinele Judakut atanningat annivok Babelemiut atanninganut, anânane, kivgakotinelo, angajoᴋakotinelo, aulatsijoᴋotinelo ilagillugit. Babelemiullo atanningata tiguva atannionime Jâringita 8 ingane;

¹³ Tiguvaillo tagvangat Nâlekab iglunganit, atanniublo iglunganit, perkutit pivianartut tamaita, illulerkutillo Goldeôjut Salomob Israelitit atanningata sennajaukolauktangit Nâlekab Tempelinganut, serᴋomipait, sorlo Nâlegak oᴋalaungmat.

¹⁴ Aularutivaillo Jerusalemiut illuêngarlutik, angajoᴋajat ilunnaita, sorsuktuksat ilunnaita, parngnanaigutsaumajut 10,000 dit, igloliortut ilunnaita, sabviortullo ilunnaita; amiakoᴋarkojilungilarlo nunab innunginik erkananginerpangojunik kisianik.

¹⁵ Aularutivâlo Jojachin Babelemut, atanniublo anânanga, atanniublo nulliangit, angajoᴋakotingillo; tapᴋoalo ilaliudlugit sôngojut nuname parngnanaigutsauvlutik aularutikassiutivait Jerusalemit Babelemut.

¹⁶ Innuillo erkanarnerpât 7,000 dit, igluliortullo, sabviortullo 1,000 dit, sorsugungnartut, unatadlarnermut piojut ilunnaita; tapᴋoa Babelemiut atanningata parngnanaigutsauvlutik âpait Babelemut.

¹⁷ Babelemiullo atanningata Methanja, akkanga atanningortipa innangêrlugo, atingalo ablatsangortipa Zedekiamut.

¹⁸ Zedekia Jârekalaukpok 21 ginik atanningorame, atanniotilunelo Jârit 11 it nâvlugit Jerusaleme. Anânanga attekalaukpok Hamitalemik Jeremiab pannia Libnamiovinek.

¹⁹ Pinniarporlo Nâlekab idluigijanginik, sorlo Jojakime piniarlaungmat.

²⁰ Nâlekable ningarninga pitjutigillugo, Jerusalemiut Judakullo taimailiortitaulaukput ajaktuiᴋârtinane tapkoninga kênaminit. Zedekiablo Babelemiut atanningat nâlegungnailerpa.