II Atannit 23 - Labrador Inuttitut Heritage Bible

Josiab attuartaukojininga perkojanik, serᴋomitsiningalo Gûdingoanik; toᴋungalo.

¹ Atannerlo tilliklerpok, ᴋattikovaillo ingminut Judakut Jerusalemiullo angajuklingit ilunnaita.

² Atannerlo majorarpok takpaunga Nâlekab iglunganut, Judakullo angutingita Jerusalemiullo ilunnatik ilagivât, ajochertuijut nallautaijullo, innugiartoksuillo ilunnatik, mikkijut angijullo; siutingitalo sângine aglait angerᴋattigêngniggit, nachvartaumalauktut Nâlekab iglungane oᴋausertangit ilunnaita attuartauvut.

³ Atannerlo nangerpok nappajut ilangane, angerᴋattigêngnekartitsivorlo Nâlekab sângane, Nâlegak malliklugo agvertaromagamik, perkojangillo, illusiokojangillo, idluarijangillo malligomavlugit, omamut tamânut, tarnemullo tamânut, angerᴋattigêngnerub oma oᴋausertangit aglaksimajut aglangne tamakkonane nallautsititsomavlugit. Innugiartoksuillo ilunnatik angerᴋattigêkput.

⁴ Atanniublo ajochertuijersoak Hilkia, ajochertuijullo nukardlit, upkuallo udsertortingit perkovait, annitsijuksaungmatta Nâlekab Tempelinganit, perkutinik tamainik sennajaulauktunik Baalelo Astarotelo, uvloriagaseksuillo pivlugit. Ikkipaillo Jerusalemib silatâne naksarme Kidroneme; argsangillo âtauvut Bethelemut.

⁵ Gûdingoallo ajochertuijoᴋotingit Judakut atanningita tagvanekolauktangit, isserluanititsiᴋovlugit pôktôjune, Judakullo iglugasaksoangine, Jerusalemiblo avatâne, pejarpait; tapᴋoalo isserluanititsijut Baalelo, seᴋinerlo, takkerlo Planetillo, uvloriagaseksuit tamaita pivlugit.

⁶ Gûdingoallo annitaukovait Nâlekab iglunganit Jerusalemib silatânut, kôngmut Kidronemut, ikkipaillo kôngme Kidroneme, serᴋalitilaitalo sanningortilugit, sanningillo ᴋângarsorpait innuit erkanangitut illuvingita ᴋânginut.

⁷ Ajortullijullo iglungit Nâlekab iglungata tunganelauktut, itseliorviolauktullo arnanut, Gûdingoanut, imitipait.

⁸ Ajochertuijullo ilunnaita Judakut iglugasaksoanginit tikkikovait, pôktôjullo, ajochertuijut isserluanititsivigilauktangit ivsornartipait, Gebamit Berseba tikkilugo; poktôjullo itterviksuit sângine asserorpait, tamnalotauk Josuab iglugasaksuit angajoᴋaunerôjungata iglungata sânganelauktok, iglugasaksuit ittervingata saumianêlauktok.

⁹ Pôktôjulle ajochertuijungit tunnergutinik tunnijilaungilet, Nâlekab Altarekotingane Jerusalemêtome, nerrivulle ᴋakᴋojanik sêrnaᴋangitunik kattangutimik akkorngane.

¹⁰ Tofetelo ivsornartipatauk Hinnomib ᴋitorngangita naksanganêtok, kinalonêt ernerminik panniminiglonêt ikkomakorkojikonnago Moloche pivlugo.

¹¹ Horsillo pêjarpait Judakut atanningita tunnergutautilauktangit seᴋinermut, pitilauktangit Nâlekab iglungata ittervianut, Nethanmelichib iglugasaksuit aiparusinganêtub inningata sânganut; sekkerngublo kammutingit ikkipait.

¹² Altarillo Ahasib iglungata ᴋângane Judakut atanningita sennalauktangit, Altarillo Manassib sennalauktangit, Nâlekab iglungata innigingne avaluliorsimajungne, atanniub serᴋomipait, akpangerdlunelo sanningit egipait kôngmut Kidronemut.

¹³ Poktojuttauk Jerusalemib sivuranêlauktut, ᴋakᴋab Mashitib attiggub tallerpianêlauktut, Salomob Israelitit atanningata sennalauktangit, Asthorete Zidonemiut makkojungnartokotingat pivlugo, Kamoselo Moabiterit makkojungnartokotingat pivlugo, Milkomelo Ammonib ᴋitorngangita makkojungnartokotingat pivlugo, atanniub ivsornartipait,

¹⁴ Nappajullo serᴋomipait, nappartullo pêjarpait, inningillo nâmatipait innuit sauninginut.

¹⁵ Taimaktauk Altare Betheleme, pôktôjok Jerobeamib Nebatib erningata Israelitinik idluitullititsilauktub sennalauktanga, Altare tamna, pôktojorlo serᴋomipâk; pôktojorlo ikkipa, sanningortilâlo, nappajullo Gûdingoat ikkipait.

¹⁶ Josialo ᴋeviarpok takkolaitalo illuvît tagvane ᴋakᴋamelauktut, tilliklilunelo, saunîllo illuvingnêlauktut aijaukovait, ikkipaillo Altarib ᴋângane, ivsornartipâlo, Nâlekab oᴋausingit, Gûdib anguteᴋotingata nipliarlauktangit, tamattominga nipliarlauktub, malliklugit.

¹⁷ Oᴋarporlo: Illuvek takkojara ᴋanoêka? Iglugasaksuillo innungita oᴋautivât: Tagva Gûdib anguteᴋotingata illuvinga Judamit tikkilauktub nipliadlalauktublo tamattominga pinniarnerijarnik Altaremut Bethelemêtomut.

¹⁸ Oᴋarporlo: Taimailingale, sauningit ullapitauniaratik kinamut. Taimak taipsoma sauningit piulijaulaukput, nallautaijub Samariamit tikkilauktub sauningit ilagillugit.

¹⁹ Poktojullo iglungit ilunnaita Samariab iglugasaksoangine, Israelitit atanningita sennalauktangit Nâlekamik ningaksailutik, pêjarpaittauk; taimaluatsiamiglo pinniarvigivait, sorlo Betheleme pinniarlaungmat.

²⁰ Poktojullo ajochertuijungit, tagvanelauktut tunnergutautipait Altarit ᴋângine, taimaglo innuit sauningit ikkipait ᴋângine. Taimaglo utterpok Jerusalemut.

²¹ Atanniublo innugiartoksuit perkovait oᴋarlunelo: Passamik attoleritse Nâlekamut Gûdipsingnut, sorlo aglaksimangmat aglangne, angerᴋattigêngnelingne.

²² Passa taimaitok attortaulaungimat idluarsaijut nalliuninginit, Israelitinik idluarsailauktut, Israelitillo atanningita Judakullo atanningita nalliuningine.

²³ Atanniuble Josiab Jâringita 18 ingane Passa tamanna attortaulaukpok, Nâlegak pivlugo Jerusaleme.

²⁴ Taimaktauk Josiab nallautainerluktut ilunnaita, angakullo, adsingoallo, Gûdingoallo, makkojungnartullo ilunnaita, Judiame Jerusalemelo takkojaulauktut, pêjarpait, perkojat oᴋausertangit nallautsititsomavlugit aglaksimajut aglangne, Hilkiab ajochertuijub nachvarlauktangine Nâlekab iglungane.

²⁵ Atannekalaungilarlo adsinganik tapsoma sivorngane, taimak omamut tamânut, tarnemullo tamânut, pitsartunermullo tamânut sâlauktomik Nâlekamut, Mosesib perkojangit tamaita malliklugit; tapsomalo kingorngane adsinga sakkijarlaunginivok.

²⁶ Sullele Nâlekab ningarnime ilunngertudlarninga, Judakunik ningarutijame, allarlungila, ningaksainerit tamaita pivlugit, Manassib ningaksaijutigijangit tapsominga.

²⁷ Nâlegarlo oᴋarpok: Judakut pêjaromagivakka kênama sânganit, sorlo Israelitit pêjarlaurapkit; iglugasaksuillo makkoa annerilauktakka egitsomavakka, tagva Jerusalem, iglolo oᴋautigilauktara: Attera tagvanêtuksauvok.

²⁸ Unipᴋautsille tamakkoa assingit Josia pivlugo, ahâk, tamanna aglaksimavok Judakut atanningita aglangine.

²⁹ Tapsoma nalliuningane Farao Necho Egiptenemiut atanningat takpaungarpok, koksoarmut Fratemut Assiriamiut atanningat sorsugvigijomavlugo. Atanniuble Josiab aularlune pachrearpa, toᴋolunelo Meggidome, takkolaukârdlugo.

³⁰ Kivgakotingitalo toᴋungatillugo aularutivât Meggidomit, âlâllo Jerusalemut, illijartorpâllo illuvinganut. Nunablo innungita Joahas, Josiab erninga tiguvât mingoarlâllo, atanningortipâllo atâtanga innangêrlugo.

³¹ Joahas Jârekalaukpok 23 ginik atanningorame, atanniotilunelo takkit pingasut nâlugit Jerusaleme. Anânanga attekalaukpok Hamutalemik, Jeremiab pannia Libnamiovinek.

³² Pinniarporlo Nâlekab idluigijanginik, sorlo atâtagilauktangit pinniarlaungmatta.

³³ Faraoble Nechob kellaksortaukova Riblateme nuname Hemathemik atelingme, attaniojungnaiᴋovlugo Jerusaleme, nunalo akkilêkova Talentinik 100 dinik Silberemik, Talentemiglo attautsemik Goldemik.

³⁴ Faraublo Nechob Eliakime Josiab erninga atanningortipa atâtanga innangêrlugo, atingalo ablatsangortipa Jojakimemut. Joahasele neksarpa, âlâlo Egiptenemut, tagvane toᴋolaukpok.

³⁵ Jojakimiblo Silbere, Goldelo tamakkoa tunnivait Faraomut; nunamiulle tunnijikovait, Silbere tamanna tunnijungnarlugo, Faraub perkojanga malliklugo; attunit perkutingit malliklugit nunab innungit tunnijikovait Silberemik Goldemiglo, tunnijomavlugit Faraomut Nechomut.

³⁶ Jojakime Jârekalaukpok 25 ginik atanningorame, atanniotilunelo Jârit 11 it nâlugit Jerusaleme. Anânanga attekalaukpok Sebudamik, Pedajab pannia Rumamiovinek.

³⁷ Pinniarporlo Nâlekab idluigijanginik, sorlo atâtagijangit pinniarlaungmatta.