II Atannit 22 - Labrador Inuttitut Heritage Bible

Atannek Josia. Tempelib sujungaititauninga.

¹ Josia Jârekalaukpok sittamaujortunik atanningorame, atanniotilunelo Jârit 31 git nâlugit Jerusaleme. Anânanga attekalaukpok Jedidamik, Adajab pannia Bazkatemiovinek.

² Pinniarporlo Nâlekab namagijanganik, agvertarporlo atâtagijame Davidib apᴋosiningane tamât, senniagôrlungilarlo tallerpingmullonêt saumingmullonêt.

³ Atanniublo Josiab Jâringita 18 ingane, atanniub tilliva Safan, Azaljab Mesulamib erningata erninga, aglakpaktok, Nâlekab iglunganut oᴋarlunelo:

⁴ Majorarit ajochertuijersoarmut Hilkiamut, tunnijiᴋovlugo kênaujanik Nâlekab iglunganut âtaumajunik, upkoat udsertortingita kattersorlauktanginik innugiartoksoarnit;

⁵ Tunnijauᴋovlugillo aulatsikojaujut sullijaksanik Nâlekab iglungane, agganginut, tunnijiᴋovlugit tapᴋoninga, sennajunut Nâlekab iglungane, iglub sujuksimaningit âkiksorlugit piᴋovlugit;

⁶ Tagva igluliortunut, sennajunut, karmaliortunullo, pissiniartuksaujunullo kejungnik ujarᴋaniglo ullimarsimajunik, iglub âkiktaujutiksanganut illingajunik;

⁷ Kisiane appertsortaukonnagit kenaujat agganginut tunnijaujut pivlugit, nertornarlutik pinniarmatta.

⁸ Tagva Hilkiab ajochertuijoksub Safan, aglakpaktok oᴋautiva: Aglait perkojaktaggit nachvarlaukpakka Nâlekab iglungane. Hilkiablo aglait tapᴋoa tunnivait Safanemut attuarsiᴋovlugo tapᴋoninga.

⁹ Safaniblo aglakpaktub âpait atannermut, unipᴋautivâlo mattominga, oᴋarlunelo: Kivgakotivit kênaujat iglumelauktut navilaukpait, tunnilaukpaillo aulatsijut sullijaksanik agganginut, perkojaumajut tamattomunga Nâlekab iglungane.

¹⁰ Safaniblo aglakpaktub atannek unipᴋautiva oᴋarlunelo: Hilkiab ajochertuijub aglangnik tunitsivigilaukpânga. Safaniblo attuarpait atanniub sângane.

¹¹ Atanniuble aglait perkojaktaggit oᴋausertangit tussaramigit, annorane allikpait.

¹² Atanniublo Hilkia ajochertuijok, Ahikamelo Safanib erninga, Achborelo Michajub erninga, Safanelo aglakpaktok, Asajalo atanniub kivganga perkovait, oᴋarlunelo:

¹³ Nâlegak apperiartorsiuk pivlunga innugiartoksuillo pivlugit, Judakullo illuêngarlutik pivlugit, aglait tapᴋoa nachvartaumajut oᴋausertangit pitjutigillugit; Nâlekab ningausinga ilunngertorutigijavut angijoksongmat, tamanna pivlugo, atâtagijavut nâlelaungimatta aglait tapᴋoa oᴋausertanginik, pinniaratiglo tamainik aglaksimajunik tapᴋonane.

¹⁴ Tagva Hilkia ajochertuijok, Ahikamelo, Achborelo, Safanelo, Asajalo aivut nallautaijomut arnamut Huldamut, Sallumib, Tikvab erningata Harhamib udsertortub anorânik erningata nullianganut, (igloᴋarporlo Jerusalemib abvakungata aipangine) oᴋarvigivâllo.

¹⁵ Tapsomalo oᴋautivait: Imâk Nâlegak Israelib Gûdinga oᴋarpok: Angut tillijise uvamnut oᴋarvigisiuk:

¹⁶ Imâk Nâlegak oᴋarpok: ᴋanoêtomik ᴋaitsijomavunga iglugasaksoarnut makkonunga, innunginullo, perkojat Judakut atanningata attuarlauktangita oᴋausertanginik tamainik.

¹⁷ Tamanna pivlugo, kemmalaungmanga, Gûdiblo assingit isserluanititsivigilaungmattigik, ningaksaromavlunga aggarmik pinniarninginut tamainut; tamanna pivlugo ilunngertornera iglugasaksuit tamakkoa pivlugit, ikkoalavok, kamitauniangilarlo.

¹⁸ Judakulle atanningat tillijise Nâlegak appertsorlugo, imâk oᴋautijaksarivasse: Imâk Nâlegak Israelib Gûdinga oᴋarpok:

¹⁹ Tamanna pivlugo, omattit auksititaulaungmat oᴋautsinut tussarlauktarnut, nikkanarsarlauravillo illingnik Nâlekab sângane, tussarlauravit oᴋauserilauktamnik, iglugasaksuit tamakkoa innungillo pitjutigillugit, asserortaujuksaungmatta, ominarsijaujuksaungmattalo, annoraᴋotitillo allilaurangne, kugviorlauravillo sâmne; tagva uvanga tussarlaurivara, Nâlegak oᴋarpok.

²⁰ Tamanna pivlugo atâtagijarnut ilaliutitsomavagit, ullapirsautekarlutillo illuvingnut ilautitaujuksauvotit, ijikpîllo ᴋanoêtut tamaita takkojaksaringilait tikkerkojomârtakka iglugasaksoarnut tamakkonunga. Tapᴋoalo tamakkoa oᴋautigivait atannermut.