II Atannit 21 - Labrador Inuttitut Heritage Bible

Manasse, Amonelo atanniôjuk Judame.

¹ Mannasse Jârekalaukpok 12 inik atanningorame, atanniotilunelo Jârit 55 git nâlugit Jerusaleme. Anânanga attekalaukpok Hefzibamik.

² Pinniarporlo Nâlekab idluigijanganik, innuᴋattigêksuit Nâlekab pêjarlauktangita Israelib ᴋitorngangita sivorngane, makkojungnartulliningit malliklugit;

³ Pôktojullo atâtangata asserorlauktangit sennapsarivait, Altarillo sennavait Baalemut, nappartuniglo Gûdingoalingnik âkiksoivok, sorlo Ahabe Israelitit atanningat pinnialaungmat, ᴋilangmiogaseksuillo tamaita (uvloritsat) tuksiarvigivait kivgartorlaitalo.

⁴ Altarillo sennavait Nâlekab iglungane, Nâlekab oᴋautigilauktangane: Jerusalemut attera pititsomavara.

⁵ Uvloriagaseksoarnullo ilunnainut Altarinik sennavok Nâlekab iglungata innigingne avaluliorsimajungne tamangne.

⁶ Erninelo ikkomakôrkova, tingmitjello nipjarningit nallonaikutallo kammagivait, angakoktorlunelo nallautainarluklarmelo, pinniarporlo unnuktunik Nâlekab idluigijanginik, ningaksarlugo.

⁷ Gûdingoarlotauk sennalauktane pitipa iglomut tapsomunga, Nâlekab oᴋautigilauktanganut Davidemut, Salomomullo: Iglomut tamattomunga, Jerusalemullo, annerimajamnut Israelib kinguvarênginit tamainit, attera pititsomavara soraijuitomik,

⁸ Israelitillo itigangit aularkojomairpakka nunamit tunnilauktamnit atâtagilauktanginut, kisianele kammatsiarpatta, pinniarpattalo tamaita perkolauktakka malliklugit, perkojallo tamaita malliklugit, kivgama Mosesib perkolauktangit tapᴋonunga.

⁹ Nâlelaungilelle; Mannassible uiverivait sugaluluarᴋovlugit innuᴋattigêksoarnit, Nâlekab pêjarlauktanginit Israelib ᴋitorngangita sivorngane.

¹⁰ Tagva Nâlegak oᴋalavok kivgamigut nallautaijutigut oᴋarlunelo:

¹¹ Taimaimat Manassib Judakut atanningata makkojungnartut tamakkoa pinniarlaungmagit, sugaluluartut Amoriterit sivornganelauktut makkojungnartullininginit tamainit, Judakullo idluitullitilaungmagittauk Gûdingoakotiminut.

¹² Tamanna pivlugo Nâlegak Israelib Gûdinga oᴋarpok imâk: Ahâk, ᴋanoêtomik ᴋaitsijomavunga Jerusalemut, Judamullo, tamattominga tussarniartub tapsoma siutigik aviojiniartuksaungmanik.

¹³ Jerusalemelo noakservalleromavakka Samariab noakservallautinganut, Ahabiblo iglungata nausaikotinganut; Jerusalemelo nâvitsomavakka, sorlo pogutak nâvitaungmat, pussititsomavakkalo;

¹⁴ Kingormgutijamalo amiakungit kemagomavakka; tunnijomalaitalo omigijingita agganginut, aksarnigauᴋovlugit, ivajarijauᴋovlugillo omigijinginut ilunnainut.

¹⁵ Tamanna pivlugo, pinniarlaungmatta idluigijamnik, ningaksarlaukpângalo uvlormit taipsomangamit atâtagilauktangit Egiptenemit aularlaungmatta uvlok tamanna tikkilugo.

¹⁶ Manasselo kovisilaurivoktauk aungnik passijaksaungitunik unnuktunik, nâmatitsilerkârtinnago Jerusalemik tamattomunga; idluitulliningita senniatigut idluitullititsijutigijangita Judakunik, pinniarᴋovlugit Nâlekab idluigijanginik.

¹⁷ Unipᴋautsit tamakkoa assingit Manasse pivlugo, tamaitalo pinniarlauktangit, ahâk, tamakkoa aglaksimavut Judakut atanningita aglangine.

¹⁸ Manasselo sinnisilerpok atatagijaminut ailune, illijartortaulunelo perorsêvingme iglome kiglinganêtome, tagva Usab perorsêvingane. Erningalo Amon atanningorpok innangêrlugo.

¹⁹ Amon Jârekalaukpok 22 ginik atanningorame, atanniotilunelo Jârîk magguk nâvlugik Jerusaleme. Anânanga attekalaukpok Mesulemetemik, Harozib pannia, Jatbamiovinek.

²⁰ Pinniarporlo Nâlekab idluigijanginik, sorlo atâtanga Manasse pinniarlaungmat.

²¹ Agvertarmarikporlo apᴋome, atâtame agvertarvigilauktangane; kivgartorpaillo Gûdingoat atâtame kivgartorlauktangit, tuksiarvigilaitalo.

²² Kemmakpâlo Nâlegak, atâtagilauktame Gûdingat, agvertarlungilarlo Nâlekab apᴋosiningane.

²³ Kivgangillo angerᴋattigêngnekartitsivut Amon akkerartorlugo, toᴋopâllo atannek iglungane.

²⁴ Innugiartoksuille nuname ullimârpait ilunnaita angerᴋattigêngnekartitsilauktut atannek Amon akkerartorlugo. Nunablo innugiartoksoangita erninga Josia atanningortipât innangêrlugo.

²⁵ Amoniblo pinniarningita assingit, ahâk, tamakkoa aglaksimavut Judakut atanningita aglangine.

²⁶ Illijartortauvorlo illuvikotiminut, Usab perorsêvikotinganêtomut. Erningalo Josia atanningorpok innangêrlugo.