II Atannit 19 - Labrador Inuttitut Heritage Bible

Assiriamiut annaujauningit Nâlekab Engelinganut.

¹ Atanniuble Hiskiab tamakkoa tussaramigit, anorâne allikpait, pôngmiglo attitipok, ailunelo Nâlekab iglunganut,

² Tillivaillo Eliakime aulatsijok atanniub iglunganik Sebenalo aglakpaktok, ajochertuijut angajuklit ilagilugit, pôngnik attisimavlutik, nallautaijomut Jesaiasemut, Amozib erninganut,

³ Tapᴋoalo oᴋautivât: Imâk Hiskiase oᴋarpok: Tamanna uvlôvok kappianartolik, suartauneliglo, oᴋarnerlungneliglo; nutakkat tikkisimavut erniviksak tikkilugo, nukkekalungilarlo ernijungnarnermut.

⁴ Imakkâ Nâlekab Gûdivit tussaromangmangagit Rabsakib oᴋausingit ilunnaita, tillijaumajub angajoᴋaminut Assiriamiut attaninganut, Gûde omatsainartok mittautigilugo, suarlugolo oᴋautsinut, Nâlekab Gûdivit tussarlauktanginut. Tagva igvit amiakojut sulle innugiartoksoarnit tuksiarutigilaukit.

⁵ Taimaglo atanniub Hiskiab kivgangit Jesaiasemut tikkiput.

⁶ Jesaiasiblo oᴋautivait: Angajoᴋase oᴋautisiuk: Imâk Nâlegak oᴋarpok: Oᴋautsit tussarlauktatit Assiriamiut atanningata nukapiaᴋotingita oᴋarnerlutigijangit uvamnik, sivuraginiarnagit pît.

⁷ Ahâk annernermik tunnitsivigijomavara, tussaumajamiglo tussartuksauvok, uttertuksaulunelo nunaminut; saviksoarmullo ochotitsomavara nunangane.

⁸ Rabsakelo utterpok, Assiriamiullo atanningat naipipa sorsuktillugo Libnamut; tussarlaurame Lachisemit aularsimaninganik.

⁹ Tagva Tirhaka Aetiopiamiut atanningat pivlugo tussarpok: Ahâk aularpok sorsugvigijomavlutit. Tagva ama tillijat tillivait Hiskiamut, oᴋautsaukovalo:

¹⁰ Imâk Hiskia Judakut atanningat oᴋautisiuk: Uiverijautailitit Gûdekotingnut tettigijarnut oᴋarlutit: Jerusaleme tunnijauniangilat Assiriamiut agganginut.

¹¹ Ahâk, tussarlaukpotit Assiriamiut atanningita pinniarninginik nunanut ilunnainut, ᴋanok nungutilaungmattigik; igvillo piulijaujuksaunajarkît?

¹² Innuᴋattigêksuit assipse, atâtagilauktama asserorlauktangita Gûdingita piulilaukpattigik? Gosanemiut, Haranemiut, Rezefemiut, Edeniblo ᴋitorngangita, Telassaremelauktut?

¹³ Nanêkât Hemathemiut atanningat, Arpademiullo atanningat, iglugasaksuillo Sefarfaimemik attiggit atannertangat, Hanablo, Ivablo?

¹⁴ Hiskiablo aglait tamakkoa tiguvait tillijab agganginit, attuarpaillo, majorarlunelo Nâlekab iglunganut, issivipaillo Nâlekab sânganut:

¹⁵ Hiskialo tuksiarpok Nâlekab sângane oᴋarlunelo: Nâlegak Israelib Gûdinga, Kerubimit ᴋângine iksivajotit, igvit Gûdetôvotit atanniovingnut nunamêtunut ilunnainut, igvit ᴋilangmik nunamiglo pingortitsilaukpotit.

¹⁶ Nâlegak siutikik mannikik tussalaurillo, ijikik uitilaukik takkolutillo, tussarlauᴋillo Sanherib oᴋausingit, tillikliutilauktangit tamaunga, Gûde omatsainartok mittautigijomavlugo.

¹⁷ Nallagorpok Nâlegak, Assiriamiut atanningita innuᴋattigêksuit nunangillo, asserorlaukpait saviksoarmut,

¹⁸ Gûdingillo egilaukpait ikkomamut; Gûdeolaungimatta, innuille aggangita pinniarnerivait, kejungôvlutik ujarauvlutiglo; taipkoa nungutilaukpait.

¹⁹ Mannâle Nâlegak Gûdivut ikajorlauktiguttôk taipsoma agganginut, atanniovît nunamêtut ilunnamassiatik illitarksilerᴋovlugit, igvit Nâlegak Gûdetôgavit.

²⁰ Tagva Jesaiase, Amozib erninga, tilliklerpok Hiskiamut, oᴋautsaukolâlo: Imâk Nâlegak Israelib Gûdinga oᴋarpok: Tuksiarnerilauktatit uvamnut, Sanheribe Assiriamiut atanningat pivlugo, tussarlaukpakka.

²¹ Imaipullo Nâlekab oᴋauserijangit tamna pivlugo: Uigasub Zionib panningata nachogivâtit, mittautigilutillo; panniojub Jerusalemib kingunerne illekettamarutigivâtit.

²² Kina mittautigilaukiuk, oᴋarnerlutigilugolo? Kina nipiᴋarutigilaukiuk? Ijikik torartilaukpakik kôngmut Heiligeojomut Israelemetomut.

²³ Tillijakotikut Nâlegak mittautigilaukpat, oᴋalauklutillo: Kamutekotimnut unnuktojunut, ᴋakᴋat pôktoninginut majorarpunga Libanonib sivinganingane; Cederekotingillo pôktojut, Cipressekotingillo annerimajut nakᴋarpakka, tikkitsomalungalo kiglilervingita sinniktarvinganut tikkilugo, Karmelib nappartunganut.

²⁴ Uvanga poagrearpunga immerlungalo imiksanik takkorngârtanik, ittikkamalo tullerninginut Egiptenemiut kôksoangit ilunnaita ipteriliktipakka.

²⁵ Tussarlaungilatille uvanga tamanna itsaksoarme taimailingatilaurapᴋo, pigiarnermelo kajusimautigiumijarapᴋo? Manna tikkikolaukpara, asseroiᴋovlutit iglugasaksoarnik sôngojunik, ujarangortilugit kallerêktunik patsalungajunik,

²⁶ Innungillo nukkingêrotitauvlutik mungungalaukput kangusuktitaulutiglo; iviksukatitut naternametutitut-îlerlaukput, perorsijatitullo tungojortutitut, iviksukatitullo iglut ᴋânginêtutitut, kunnulertutitut innerkârtinagit.

²⁷ Nunakarnîlle, annivaktarnillo, itternerivaktarnîllo ᴋaujimavakka, pikablâvigigamgalo.

²⁸ Pikablâvigigamgale, pingijainîllo kôngmuarsimangmat siutimnut, tamanna pivlugo suvlolikotimnik illijijomavunga kingarnut, kingmiarakotimniglo kannernut, uttertitsomavagillo apᴋotigilauktakut tamaunga.

²⁹ Tamannalo nallonaikutiksarivat: Jâreme tamattomane nerrijuksauvose ingminik perorlauktunik; Jâriblo aipangane ingminik nuijomârtunik; Jâriglo pingajuangne karngasoileritse kattersoilerluselo, Weineliksaniglo illiorᴋaileritse, nerriluselo paunganginik.

³⁰ Piulijaumajullo, amiakullo Judakunit ama amâkarniarivut attimingne, paungakaromârlutiglo ᴋollimingne.

³¹ Jerusalemit anniniarmatta amiakut, piulijaumajullo Zionib ᴋakᴋanganit. Nâlekab Zebaothib ilunngertorninga tamattominga pinniarpok.

³² Tamanna pivlugo Nâlekab Assiriamiut atanningat oᴋautigiva imâk: Tikkituksaungilak iglugasaksuit makkoa illuanut, kargjullo attauserlonêt pittiksautijaksaringila illuanut, sappulutaksarlo attauserlonêt tikkituksaungilak sivurânut, talluliortuksaungilarlo avatane;

³³ Apᴋomele tikkivigijamine tamaunga uttertuksauvok, tikkituksaungilarlo iglugasaksuit tamakkoa illuanut, Nâlegab oᴋauserilaukpa.

³⁴ Uvangalo iglugasaksuit makkoa serngnigijomavakka piulijomalugillo pivlunga, kivgaralo Davide pivlugo.

³⁵ Unnuarmelo tapsomane Nâlekab Engelinga annivok annaulernilunelo Assiriamiut tangmârvingane, angutinik 185,000 dinik. Uvlarârsukullo makkilaungmatta, ahâk, tagva nallajoᴋalaukpok ilunnane timinik toᴋungajuinarnik.

³⁶ Tagva Sanheribe Assiriamiut atanningat parngnailerpok, aularlunelo utterlarmelo, nokkangalunelo Niniveme.

³⁷ Gûdimelo Nisrochib iglungane tuksiartillugo ernekita Adramelechib Sarezeriblo ullimarpâk saviksoarmut, ᴋemâvuglo nunamut Araratemik atelingmut. Erningalo Asserhadon atanningorpok innangêrlugo.